ຫົວໜ້າຄະນະໂຄສະນາອົບຮົມສູນກາງພັກ ໂອ້ລົມໜັງສືພິມປະຊາຊົນ

ພ້ອມດ້ວຍພະນັກງານຂອງໜັງສືພິມປະຊາຊົນ ສຽງຂອງສູນກາງພັກປະຊາຊົນປະຕິວັດລາວ ໃນວັນທີ 23 ກັນຍາ ນີ້ ຊຶ່ງໄດ້ເນັ້ນບາງວຽກງານເພື່ອໃຫ້ໜັງສືພິມປະຊາຊົນ ສືບຕໍ່ມີການພັດທະນາ, ແກ້ໄຂບາງບັນຫາທີ່ຫຍຸ້ງຍາກ ໃຫ້ມີການຫັນປ່ຽນຢ່າງແຂງແຮງ, ເລິກເຊິ່ງ ແລະ ຮອບດ້ານ.
ໂອກາດນີ້, ສະຫາຍ ວັນໄຊ ຕະວິນຍານ ກຳມະການຄະນະພັກ ຮອງຫົວໜ້າ ຄອສພ, ເລຂາຄະນະພັກ ຫົວໜ້າບັນນາທິການໜັງສືພິມປະຊາຊົນ ໄດ້ລາຍງານໂດຍສັງເຂບຂອງໜັງສືພິມໃນໄລຍະຜ່ານມາ ຊຶ່ງເນື້ອໃນບາງຕອນວ່າ: ໄລຍະຜ່ານມາ, ເຖິງວ່າຈະມີຄວາມຫຍຸ້ງຍາກນາໆປະການປານໃດກໍຕາມ, ໜັງສືພິມປະຊາຊົນ ໄດ້ເສີມຂະຫຍາຍບົດບາດເປັນກະບອກສຽງຂອງສູນກາງພັກ, ເປັນເຄື່ອງມືອັນແຫຼມຄົມຂອງພັກ, ເປັນເວທີຂອງມະຫາຊົນ, ເປັນສາຍໃຍຜູກພັນ ລະຫວ່າງ ມະຫາຊົນກັບພັກ ນໍາເອົາແນວງທາງ, ນະໂຍບາຍຂອງພັກ, ກົດໝາຍຂອງລັດ ລົງສູ່ມະຫາຊົນ ແລະ ນຳເອົາຄວາມຄິດເຫັນຂອງປະຊາຊົນຊັ້ນຄົນຕ່າງໆ ສ່ອງແສງໃຫ້ພັກ-ລັດຢ່າງທັນການ ພະນັກງານ-ສະມາຊິກພັກ ມີຄວາມສາມັກຄີກັນຢ່າງແໜ້ນແຟ້ນ, ອົດທົນຜ່ານຜ່າຄວາມຫຍຸ້ງຍາກນາໆປະການ, ເຮັດວຽກບໍ່ມີໂມງເວລາ ຫຼື ວັນພັກລັດຖະການ ເຮັດໃຫ້ຄຸນນະພາບຂອງໜັງສືພິມ ຄ່ອຍໆໄດ້ຮັບການປັບປຸງໃຫ້ດີຂຶ້ນເທື່ອລະກ້າວ ເປັນຕົ້ນໄລຍະ 1 ປີຜ່ານມາ, ໜັງສືພິມ ປະຊາຊົນ ໄດ້ຮັບການປັບປຸງ ທັງທາງດ້ານເນື້ອໃນ ແລະ ຮູບການໃຫ້ສອດຄ່ອງກັບສະພາບ ແລະ ເງື່ອນໄຂໃນປັດຈຸບັນ; ມີຂ່າວ-ບົດ ອຸດົມສົມບູນຫຼາຍຂຶ້ນ, ມີບົດນໍາ-ບົດຄວາມບົດປະພດຕ່າງມຫຼາຍຂຶ້ນ, ຖ້າທຽບໃສ່ເມື່ອກ່ອນເພີ່ມຂຶ້ນປະມານ 40-50% ເຮັດໃຫ້ຄຸນນະພາບຂອງໜັງສືພິມປະຊາຊົນ ມີເນື້ອໃນໜັກແໜ້ນ ແລະ ມີສີສັນດີຂຶ້ນກວ່າເກົ່າ. ສໍາລັບເວັບໄຊ ຂອງໜັງສືພິມປະຊາຊົນ ກໍໄດ້ຮັບການປັບປຸງໃຫ້ໄປສູ່ລະບົບທັນສະໄໝ ເຮັດໃຫ້ຄົນສົນໃຈຕິດຕາມອ່ານໜັງສືພິມທາງເວັບໄຊຫຼາຍຂຶ້ນຕົວຢ່າງ: ໃນປີ 2022 ຄົນເຂົ້າອ່ານ 1.450.790 ເທື່ອຄົນ, ປີ 2023 ມີຄົນເຂົ້າອ່ານ 1.575.750 ເທື່ອຄົນ, ສະເພາະ 6 ເດືອນ 2024 ມີຄົນເຂົ້າອ່ານ 690.395 ເທື່ອຄົນ ສະເລ່ຍ 23.000 ເທື່ອຄົນຕໍ່ມື້; ເຂົ້າອ່ານເຟສບຸກໃນປີ 2022 ມີ 1.044.150 ເທື່ອຄົນ, ປີ 2023 ມີຄົນເຂົ້າອ່ານ 1.258.416 ເທື່ອຄົນ ແລະ 6 ເດືອນຕົ້ນປີ 2024 ມີຄົນເຂົ້າອ່ານ 629.208 ເທື່ອຄົນ ແລະ ມີຜູ້ກໍາລັງຕິດຕາມທັງໝົດ 25.814 ເທື່ອຄົນ.
ພ້ອມດຽວກັນນີ້, ຫົວໜ້າບັນນາທິການໃຫຍ່ໜັງສືພິມປະຊາຊົນ ກໍໄດ້ມີຂໍ້ສະເໜີ ເພື່ອຮັບປະກັນໃຫ້ແກ່ການປະຕິບັດໜ້າທີ່ການເມືອງຂອງພັກ; ນອກນີ້, ບັນດາຮອງຫົວໜ້າບັນນາທິການ ແລະ ພະນັກງານຫຼັກແຫຼ່ງຂອງໜັງສືພິມປະຊາຊົນ ກໍໄດ້ຮັບໂອກາດຈາກ ສະຫາຍ ຫົວໜ້າ ຄອສພ ໃຫ້ມີບາງຄໍາເຫັນ ເພື່ອນໍາສະເໜີບາງບັນຫາກ່ຽວກັບການເຄື່ອນໄຫວວຽກງານວິຊາສະເພາະ, ຂໍທິດຊີ້ນໍາ, ແນໃສ່ປັບປຸງການ ເຄື່ອນໄຫວວຽກງານ ໃຫ້ຄ່ອງຕົວດີຂຶ້ນກວ່າເກົ່າ.
ສະຫາຍ ຄໍາພັນ ເຜີຍຍະວົງ ໄດ້ມີຄໍາເຫັນໂອ້ລົມ ໂດຍໄດ້ສະແດງຄວາມຊົມເຊີນຕໍ່ບັນດາຄະນະພັກ-ຄະນະບັນນາທິການ ແລະ ພະນັກງານຫຼັກແຫຼ່ງຂອງໜັງສືພິມປະຊາຊົນ ທີ່ໄດ້ມີຄວາມອົດທົນຜ່ານຜ່າ, ມີຄວາມເສຍສະຫຼະສູງ ເຮັດຫຼ້ອນໜ້າທີ່ການເມືອງຂອງຕົນ ຊຶ່ງຖືວ່າເປັນການສືບຕໍ່ເສີມຂະຫຍາຍມູນເຊື້ອອັນດີງາມຂອງໜັງສືພິມປະຕິວັດ ໄດ້ເປັນຢ່າງດີ; ພ້ອມດຽວກັນນີ້, ກໍໄດ້ເນັ້ນບາງວຽກງານວ່າ: 1). ກ່ອນອື່ນໝົດຕ້ອງສ້າງຄວາມຮັບຮູ້ເຂົ້າໃຈໃໝ່ ກ່ຽວກັບສະພາບການປັດຈຸບັນຂອງໜັງສືພິມ ກໍຄືຈຸດພິເສດທີ່ຕັ້ງ, ພາລະບົດບາດ ທຽບໃສ່ເມື່ອກ່ອນ ຊຶ່ງຕ້ອງໄດ້ຍົກສູງບົດບາດໃຫ້ໄດ້ດີຂຶ້ນກວ່າເກົ່າ; ປັບ ປຸງແບບແຜນວິທີເຮັດວຽກ ໃຫ້ມີການຫັນປ່ຽນ ໃຫ້ບຸທະລຸ ບຸກບືນວຽກງານໃຫ້ດີກວ່າເກົ່າ; ຮັບຮູ້ສະພາບການຂອງໂລກໃນປັດຈຸບັນ ຊຶ່ງເປັນຍຸກແຫ່ງຂໍ້ມູນຂ່າວສານ ທີ່ທັນສະໄໝ ເພື່ອປັບປຸງໜັງສືພິມໃຫ້ທັນກັບສະພາບການ; 2). ຕ້ອງທົບທວນຄືນຂອດການພົວພັນລະຫວ່າງໜັງສືພິມປະຊາຊົນ ກັບສາຍຕັ້ງ ກໍຄື ຄອສພ ແລະ ໜັງສືພິມປະຊາຊົນ ກັບ ກະຊວງຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ ເພື່ອໃຫ້ການພົວພັນເຄື່ອນໄຫວວຽກງານຕ່າງໆ ໃຫ້ຄ່ອງຕົວ ແລະ ດີຂຶ້ນເລື້ອຍໆ; 3). ຕ້ອງຫັນເອົາມະຕິ 04/ກມສພ ແລະ ມະຕິ 05/ລບ ເພື່ອຫັນເປັນແຜນລະອຽດຂອງຕົນ ໃຫ້ສອດຄ່ອງກັບແນວທາງນະໂຍບາຍຂອງພັກ-ລັດ; ບັນຫາໜຶ່ງ ກໍແມ່ນກ່ຽວກັບງົບປະມານ ທີ່ຕ້ອງແຍກໃຫ້ລະອຽດ ອັນໃດທີ່ນໍາໃຊ້ງົບປະມານລັດ ແລະ ອັນໃດທີ່ນໍາໃຊ້ລາຍຮັບວິຊາການ ເພື່ອຫັນສູ່ການກຸ້ມຕົນເອງເທື່ອລະກ້າວ ຊຶ່ງໃນນີ້ຕ້ອງໄດ້ຂຶ້ນແຜນແຕ່ຫົວທີ ເພື່ອຂໍງົບປະ ມານລັດ ນໍາໃຊ້ເຄື່ອນໄຫວວຽກງານຕາມລະບຽບການ. ບັນຫາດ້ານການເກັບລາຍຮັບວິຊາການ ກໍຕ້ອງນໍາເກັບລາຍຮັບຂອງໜັງສືພິມໃຫ້ໄດ້ ແລະ ເພີ່ມທະວີວຽກງານການຕະຫຼາດຂອງໜັງສືພິມ, ພ້ອມນັ້ນກໍຄົ້ນຄວ້າກ່ຽວກັບການສ້າງລາຍຮັບຈາກຜະລິດ ຕະພັນອື່ນ ລວມເຖິງການແກ້ໄຂບັນຫາຄ່າພິມໜັງສືພິມ; 4). ໃຫ້ສຸມໃສ່ວຽກງານທ້າຍປີ ເປັນຕົ້ນການກະກຽມຮັບໃຊ້ກອງປະຊຸມສຸດຍອດອາຊຽນ, ການສະເຫຼີມສະຫຼອງ 3 ວັນປະຫວັດສາດ, ກອງປະຊຸມ 3 ຂັ້ນ; 5). ຕ້ອງກະກຽມຄວາມພ້ອມທຸກດ້ານ ທັງດ້ານຈິດໃຈ ແລະ ວັດຖຸ, ຄຽງຄູ່ກັບການສ້າງແຜນລະອຽດ ແລະ ການສືບຕໍ່ປັບປຸງກົງຈັກການຈັດຕັ້ງ ໃຫ້ມີຄວາມສົມບູນຄົບຊຸດ ເພື່ອຮອງຮັບການເຄື່ອນ ໄຫວວຽກງານຂອງໜັງສືພິມ ສ້າງການຫັນປ່ຽນຢ່າງແຂງແຮງ, ເລິກເຊິ່ງ ແລະ ຮອບດ້ານ ເຮັດໃຫ້ໜັງສືພິມມີການພັດທະນາດີຂຶ້ນເລື້ອຍໆ.
ພ້ອມດຽວກັນນີ້, ກໍເນັ້ນໃຫ້ຄະນະພັກ-ຄະນະບັນນາທິການ ແລະ ພະນັກງານທັງໝົດຂອງໜັງສືພິມປະຊາຊົນ ສືບຕໍ່ຍົກສູງຄວາມສາມັກຄີກັນ ພ້ອມກັນເສີມຂະຫຍາຍມູນເຊື້ອອັນດີງາມຂອງໜັງສືພິມປະຕິວັດ ໜັງສືພິມຂອງພັກ ເຮັດຫຼ້ອນໜ້າທີ່ການເມືອງໃຫ້ດີກວ່າເກົ່າ.
(ຂ່າວ-ພາບ: ສຸກສະຫວັນ)