ຫົວພັນ ສະຫຼອງວັນສ້າງຕັ້ງກອງທັບ ປະຊາຊົນລາວ ຄົບຮອບ 75 ປີ

ແຂວງຫົວພັນ ຈັດພິທີໂຮມຊຸມນຸມ ສະເຫຼີມສະຫຼອງ ວັນສ້າງຕັ້ງກອງທັບປະຊາຊົນລາວ ຄົບຮອບ 75 ປີ ຂຶ້ນໃນວັນທີ 16 ມັງກອນ ນີ້,ໂດຍມີ ທ່ານ ຄຳແພງ ໄຊສົມແພງ ກຳມະການສູນກາງພັກເລຂາພັກແຂວງເຈົ້າແຂວງຫົວພັນ, ມີຄະນະພັກ-ອຳນາດການປົກຄອງແຂວງ, ເມືອງ, ພະນັກງານປະຕິວັດອາວຸໂສບຳນານ, ນາຍ ແລະ ພົນທະຫານ, ນາຍ ແລະ ພົນຕຳຫຼວດ, ຄະນະພັກ-ອຳນາດການປົກຄອງ-ຕາງໜ້າກຳລັງປະກອບອາວຸດແຂວງແທັງຮວາ, ເຊີນລາ ແລະ ເງະອານ ສສ ຫວຽດນາມ, ພະນັກງານ-ລັດຖະກອນ ແລະ ປະຊາຊົນອ້ອມຂ້າງເທດສະບານແຂວງ ເຂົ້າຮ່ວມ.
ໃນພິທີ, ທ່ານ ຄຳແພງ ໄຊສົມແພງ ຕາງໜ້າຄະນະພັກ ແລະ ອຳນາດການປົກຄອງແຂວງ ສະແດງຄວາມຂໍ່ານັບຊົມເຊີຍຕໍ່ພະນັກງານ-ນັກຮົບຮຸ່ນອາວຸໂສປະຕິວັດ, ນັກຮົບ, ກອງກຳລັງປະກອບອາວຸດທົ່ວປະເທດ ກໍຄືຂອງແຂວງຫົວພັນ.ພ້ອມທັງ,ຝາກຄວາມຊົມເຊີຍ, ຄວາມຮັກແພງອັນສະໜິດສະໜົມ ອົບອຸ່ນ ແລະ ຄວາມເຊື່ອໝັ້ນອັນເລິກເຊິ່ງ ຈາກຄະນະນຳຂອງແຂວງໄປຍັງນາຍ ແລະ ພົນທະຫານ ທີ່ພວມປະຕິບັດໜ້າທີ່ອັນມີກຽດຂອງຕົນ ໃນເຂດທຸລະກັນດານ, ຫ່າງໄກສອກຫຼີກທົ່ວແຂວງຫົວພັນ. ພ້ອມທັງໄດ້ຝາກຄວາມຢ້ຽມຢາມຖາມຂ່າວອັນອົບອຸ່ນ, ຄວາມເປັນຫ່ວງເປັນໃຍ ແລະ ອວຍພອນໄຊອັນປະເສີດ ໄປຍັງພະນັກງານ-ນັກຮົບ ທີ່ເສຍອົງຄະ, ຜູ້ທີ່ພວມພະຍາບານຕົວຢູ່ໂຮງໝໍແຫ່ງຕ່າງໆ ຈົ່ງຫາຍຈາກຄວາມເຈັບປ່ວຍ ໃຫ້ມີເຫື່ອແຮງ ເຂັ້ມແຂງໂດຍໄວ. ພ້ອມນີ້, ທ່ານເຈົ້າແຂວງຫົວພັນຍັງໄດ້ຮຽກຮ້ອງມາຍັງຄະນະພັກ-ອໍານາດການປົກຄອງ, ອົງການ, ຂະແໜງການຕ່າງໆ ນັບແຕ່ແຂວງລົງຫາທ້ອງຖິ່ນຍົກສູງສະຕິຄວາມຮັບຜິດຊອບຂອງຕົນຂຶ້ນຕື່ມຕໍ່ວຽກງານປ້ອງກັນ
ຊາດ-ປ້ອງກັນຄວາມສະຫງົບ ເຮັດໃຫ້ວຽກງານດັ່ງກ່າວສອດຫ້ອຍໄປໃນທຸກຂົງເຂດ, ຕິດພັນສະໜິດແໜ້ນກັບການພັດທະນາເສດຖະກິດ-ສັງຄົມ ຂອງແຂວງ, ຂອງທ້ອງຖິ່ນ; ພ້ອມກັນເອົາໃຈໃສ່ຊ່ວຍເຫຼືອກໍ່ສ້າງ ກຳລັງປະກອບອາວຸດ ຂອງພວກເຮົາໃຫ້ເຂັ້ມແຂງຍິ່ງຂຶ້ນ, ສ້າງໃຫ້ເປັນກໍາລັງອັນສັກສິດ ໃນການປົກປັກຮັກສາໝາກຜົນ ຂອງການປະຕິວັດ ທີ່ພວກເຮົາຍາດມາໄດ້ດ້ວຍການເສຍສະຫຼະອັນໃຫ່ຍຫຼວງນັ້ນ ໃຫ້ຄົງຢູ່ຕະຫຼອດໄປ.
ໂອກາດດຽວກັນ, ທ່ານ ພັອ ພັນສີ ຊ່ອນມີໄຊ ຫົວໜ້າການເມືອງກອງບັນຊາການທະຫານແຂວງຫົວພັນ ໄດ້ຕາງໜ້າກຳລັງປະກອບອາວຸດ ໄດ້ສະແດງຄວາມຮູ້ບຸນຄຸນ ອັນເລິກເຊິ່ງຕໍ່ຄະນະພັກ, ອຳນາດການປົກຄອງທຸກຂັ້ນ, ປະຊາຊົນບັນດາເຜົ່າ, ກອງທັບ ແລະ ປະຊາຊົນຫວຽດນາມອ້າຍນ້ອງ ໃນການສະໜັບສະໜູນອຸ້ມຊູຊ່ວຍເຫຼືອອັນໃຫຍ່ຫຼວງ, ເຮັດໃຫ້ກຳລັງປະກອບອາວຸດເຮັດສໍາເລັດພາລະກິດຕໍ່ສູ້ປົດປ່ອຍຊາດ ແລະ ປົກປັກຮັກສາປະເທດຊາດ. ພ້ອມນີ້, ທ່ານຍັງໄດ້ລາຍງານກ່ຽວກັບຜົນງານ, ມູນເຊື້ອຂອງກອງກຳລັງປະກອບວຸດແຂວງຫົວພັນ ໃນໄລຍະ 75 ປີຜ່ານມາ.
ສະຫາຍຫົວໜ້າການເມືອງກອງບັນຊາການທະຫານແຂວງມີຄຳເຫັນວ່າ: ເພື່ອເຮັດສຳເລັດໜ້າທີ່ອັນໜັກໜ່ວງ ແລະ ມີກຽດສະຫງ່າທີ່ປະເທດຊາດ ແລະ ປະຊາຊົນມອບໝາຍໃຫ້ ພະນັກງານ-ນັກຮົບ, ນາຍ ແລະ ພົນທະຫານ ໃນທົ່ວກຳລັງປະກອບອາວຸດ ຈົ່ງອອກແຮງເສີມຂະຫຍາຍທາດແທ້, ມູນເຊື້ອຂອງຊາດ ແລະ ຂອງກອງທັບ, ເດັດດ່ຽວປະຕິບັດແນວທາງປ່ຽນແປງໃໝ່ຮອບດ້ານຢ່າງມີຫຼັກການຂອງພັກ, ເສີມຂະຫຍາຍບົດບາດເປັນກຳລັງຫຼັກແຫຼ່ງແກ່ນສານ ໃນການຈັດຕັ້ງປະຕິບັດສອງໜ້າທີ່ຍຸດທະສາດໃນໄລຍະໃໝ່, ປົກປັກຮັກສາ ແລະ ສ້າງສາພັດທະນາປະເທດ; ກອງທັບເຮົາຈົ່ງກ້າວຂຶ້ນຍາດເອົາຜົນງານໃໝ່ທີ່ໃຫ່ຍຫຼວງກວ່າເກົ່າ ໃຫ້ສົມກັບຄໍາສັ່ງສອນຂອງ ປະທານ ໄກສອນ ພົມວິຫານ ເວົ້າວ່າ: ເວລາໃດກອງທັບກໍນຳໜ້າທຸກວຽກງານ, ເດັດດ່ຽວໜຽວແໜ້ນຜ່ານຜ່າອຸປະສັກ, ສຳເລັດໜ້າທີ່, ຕີເອົາຊະນະສັດຕູທຸກໂຕ, ສົມແລ້ວເປັນກຳລັງ ແກ່ນສານທີ່ເຂັ້ມແຂງ ຂອງການປະຕິວັດ ເປັນເຄື່ອງມືອັນແຫຼມຄົມຂອງພັກ.
ຂ່າວ-ພາບ: ໄອແກ້ວ