 |
ໃນພິທີ, ທ່ານ ນາງ ຟອງສະໝຸດ ອັ່ນລາວັນ ໄດ້ຍົກໃຫ້ເຫັນເຖິງຂະບວນການກໍາເນີດ ຂອງພັກປະຊາຊົນປະຕິວັດລາວ, 71 ປີ ແຫ່ງການຊີ້ນໍາ-ນໍາພາ ຂອງພັກປະຊາຊົນ ປະຕິວັດລາວ, ເສີມຂະຫຍາຍມູນເຊື້ອທາດແທ້ ຂອງພັກປະຊາຊົນ ປະຕິວັດລາວ. ວັນທີ 22 ມີນາ 1955 ກອງປະຊຸມໃຫຍ່ສ້າງຕັ້ງພັກປະຊາຊົນປະຕິວັດລາວ ຈຶ່ງໄດ້ເປີດຂຶ້ນຢູ່ທີ່ບ້ານນາແມວ ເມືອງວຽງໄຊ ແຂວງຫົວພັນ ໂດຍເອີ້ນຊື່ວ່າ: “ພັກປະຊາຊົນລາວ” ປະທານ ໄກສອນ ພົມວິຫານ ໄດ້ຖືກເລືອກຕັ້ງເປັນເລຂາຄະນະຊີ້ນໍາສູນກາງ (ເລຂາທິການໃຫຍ່) ພ້ອມທັງໄດ້ວາງແຜນດໍາເນີນງານຂອງພັກ 12 ຂໍ້ ຖືກຮັບຮອງໃນກອງປະຊຸມໃຫຍ່ຄັ້ງທີ I ຂອງພັກ ໃນວັນທີ 22 ມີນາ 1955 ເປັນໂຄງການການເມືອງສະບັບທໍາອິດ ເພື່ອແນໃສ່ເຮັດຫຼ້ອນໜ້າທີ່ ຂອງພັກໃນໄລຍະໃໝ່, ກາຍເປັນແນວທາງກູ້ຊາດ ຕ້ານຈັກກະພັດຜູ້ຮຸກຮານ, ພັກໄດ້ຊັກຈູງ ປະຊາຊົນເຮົາດໍາເນີນການຕໍ່ສູ້ຍາດເອົາໄຊຊະນະ ນັບມື້ນັບໃຫຍ່ຫຼວງ, ສາມາດເຕົ້າໂຮມຄວາມສາມັກຄີທົ່ວປວງຊົນ ສູ້ຊົນເຮັດສໍາເລັດພາລະກິດປົດປ່ອຍຊາດ. ເຮັດໃຫ້ປະເທດລາວເປັນປະເທດ ສັນຕິພາບ, ເອກະລາດ, ປະຊາທິປະໄຕ ເອກະພາບ ແລະ ວັດທະນາຖາວອນ.
ຕະຫຼອດ 71 ປີ ແຫ່ງການນໍາພາ ພັກເຮົາໄດ້ແບກຫາບພາລະກຳປະຫວັດສາດອັນຍິ່ງໃຫຍ່ໃນແຕ່ລະ ໄລຍະທີ່ແຕກຕ່າງກັນ ແລະ ສາມາດປະຕິບັດພາລະກໍາປະຫວັດສາດເຫຼົ່ານັ້ນໄດ້ຢ່າງສະຫງ່າງາມ. ແຕ່ດ້ວຍມູນເຊື້ອອົງອາດກ້າແກ່ນ ພັກເຮົາຕັດສິນໃຈນໍາພາ ສືບຕໍ່ຍູ້ແຮງພາລະກິດປ່ຽນແປງໃໝ່ຮອບດ້ານມີຫຼັກການ, ພາປະເທດຊາດກ້າວຂຶ້ນຢ່າງໜັກແໜ້ນສູ່ຈຸດໝາຍທີ່ກໍານົດໄວ້ໃຫ້ເປັນຈິງ ດ້ວຍການເສີມຂະຫຍາຍມູນເຊື້ອ ທາດແທ້ຂອງພັກ ປະຊາຊົນປະຕິວັດລາວ ຄື: ພັກເຮົາມີຄວາມຈົງຮັກພັກດີ ແລະ ຢືດໝັ້ນ ໃນແນວຄິດ-ທິດສະດີມາກ-ເລນິນ, ແນວຄິດ ໄກສອນ ພົມວິຫານ ກໍຄືຈຸດໝາຍສັງຄົມນິຍົມຢ່າງໜັກແໜ້ນ, ບໍ່ຄໍາພີຕາຍຕົວ ແຕ່ຫາກມີຄວາມເປັນເຈົ້າການ ປະດິດສ້າງໃນການໝູນໃຊ້ທິດສະດີ ແລະ ບົດຮຽນດ້ານຕ່າງໆ ເຂົ້າກັບເງື່ອນໄຂຕົວຈິງ ແລະ ສະພາບຈຸດພິເສດຂອງປະເທດຊາດ, ຢຶດໝັ້ນ ແລະ ປະຕິບັດຢ່າງຖືກຕ້ອງບັນດາຫຼັກການພື້ນຖານດ້ານການຈັດຕັ້ງ ແລະ ການເຄື່ອນໄຫວຂອງພັກ ນັ້ນຄືຫຼັກການລວມສູນປະຊາທິປະໄຕ, ເວລາໃດກໍຖືສໍາຄັນການເສີມຂະຫຍາຍຄວາມສາ ມັກຄີເປັນເອກະພາບບົນພື້ນຖານແນວທາງແຜນນະໂຍບາຍຂອງພັກ, ພັກນໍາພາເປັນໝູ່ຄະນະບົນພື້ນຖານການແບ່ງ ງານ ແລະ ມອບໝາຍຄວາມຮັບຜິດຊອບໃຫ້ບຸກຄົນໃນໝູ່ຄະນະ, ຖືສໍາຄັນການເສີມຂະຫຍາຍປະຊາທິປະໄຕ ໄປຄຽງຄູ່ກັບການປະຕິບັດກົດລະບຽບຂອງພັກ ແລະ ລະບອບດໍາເນີນຊີວິດການເມືອງ, ພັກເຮົາເວລາໃດກໍຢຶດໝັ້ນໃນທາດແທ້ ຖືປະຊາຊົນເປັນກົກ ແລະ ມີຄວາມຈົງຮັກພັກດີຕໍ່ຜົນປະໂຫຍດລວມຂອງຊາດ, ຂອງປະຊາຊົນ, ຖືການສະໜັບສະໜູນຂອງປະຊາຊົນ ເປັນສິ່ງສໍາຄັນຕັດສິນ ບົດບາດນໍາພາ ແລະ ການກໍາອໍານາດຂອງພັກ, ພັກສະແດງຄວາມກ້າຫານ, ກ້າປະເຊີນໜ້າ ກັບບັນຫາຕົວຈິງ, ກ້າຮັບເອົາຄວາມເປັນຈິງ ແລະ ກ້າປ່ຽນແປງຕົນເອງ, ດ້ວຍການນໍາພາເດັດຂາດ, ໂດຍກົງ, ຮອບດ້ານ, ກໍາອໍານາດຕາມກົດໝາຍ ແລະ ວຽກງານອື່ນໆ.
ໃນພິທີ, ທ່ານ ນາງ ຄູນມະລີ ສິງຫາຄໍາ ຮອງຫົວໜ້າກົມຈັດຕັ້ງ ແລະ ກວດກາ ໄດ້ຂຶ້ນຜ່ານຂໍ້ຕົກລົງ ວ່າດ້ວຍການແຕ່ງຕັ້ງພະນັກງານ ຂັ້ນຮອງຫົວໜ້າກົມ ເລກທີ 108/ຫສປທ,ຈກ, ລົງວັນທີ 27 ກຸມພາ 2026 ຫົວໜ້າຫ້ອງວ່າການສໍານັກງານປະທານປະເທດ ຕົກລົງແຕ່ງຕັ້ງພະນັກງານດໍາລົງຕໍາແໜ່ງບໍລິຫານຂັ້ນຮອງຫົວໜ້າກົມ ຢູ່ພາຍໃນ ຫສປທ ຈໍານວນ 3 ທ່ານ ຄື: ທ່ານນາງ ພອນສະຫວັນ ໂພທິລາດ ຫົວໜ້າພະແນກຍ້ອງຍໍ ກົມຄົ້ນຄວ້າສັງລວມ ເປັນຮອງຫົວໜ້າກົມຄົ້ນຄວ້າສັງລວມ, ທ່ານ ເມກາ ຄຸນມີໄຊ ຫົວໜ້າພະແນກພັກ ແລະ ອົງການຈັດຕັ້ງມະຫາຊົນ ກົມຈັດຕັ້ງ ແລະ ກວດກາ ເປັນຮອງຫົວໜ້າກົມຈັດຕັ້ງ ແລະ ກວດກາ, ທ່ານ ສະຖາພອນ ພານຸວົງ ຫົວໜ້າພະແນກຮ່ວມມືສອງຝ່າຍ ກົມພົວພັນຕ່າງປະເທດ ເປັນຮອງຫົວໜ້າກົມພົວພັນຕ່າງປະເທດ.
 |
ຈາກນັ້ນ, ຍັງສືບຕໍ່ເຜີຍແຜ່ວັນນັກຮົບເສຍອົງຄະແລະ ເສຍສະຫຼະຊີວິດເພື່ອຊາດ ຄົບຮອບ 80 ປີ (21 /3/1949-21/3/2026) ຊຶ່ງໃຫ້ກຽດເຜີຍແຜ່ໂດຍ ທ່ານ ອິນທະປັນຍາ ຂຽວວົງພະຈັນ ຮອງເລຂາພັກ ຮອງຫົວໜ້າ ຫສປທ.
(ຂ່າວ: ແສງຈັນ)
ຄໍາເຫັນ