ເຮືອຊ່ວງນາວານາກນ້ອຍ ຄວ້າແຊ້ມບຸນຊ່ວງເຮືອທີ່ທ່ານ້ຳຄານ

ການຈັດງານຄັ້ງນີ້, ເປັນການຂໍານັບຊົມເຊີຍການປ່ອນບັດເລືອກຕັ້ງສະມາຊິກສະພາແຫ່ງຊາດຊຸດທີ 10 ແລະສະພາປະຊາຊົນແຂວງຊຸດທີ 5, ທັງເປັນການສະເຫຼີມ ສະຫຼອງ ວັນສ້າງຕັ້ງແມ່ຍິງສາກົນ (ວັນທີ່ 8 ມີນາ) ຄົບຮອບ 116 ປີ, ໃຫ້ເຕັມໄປດ້ວຍບັນຍາກາດທີ່ເບີກບານມ່ວນຊື່ນ, ເພື່ອດຶງດູດເອົານັກທ່ອງທ່ຽວທັງພາຍໃນ ແລະຕ່າງປະເທດເຂົ້າມາທ່ຽວຊົມນະຄອນ ຫຼວງພະບາງ ໃຫ້ນັບມືນັບຫຼາຍຂຶ້ນ. ສຳລັບການຈັດງານບຸນຊ່ວງເຮືອ ປະເພດ 12-15 ສີພາຍ ທີ່ທ່ານໍ້າບ້ານນູນສະຫວາດ ໄດ້ເລີ່ມຕົ້ນມາແຕ່ປີ 2021 ໂດຍແມ່ນບໍລິສັດ ເຄວາຍບຸບຜາ ໃຫ້ການສະໜັບສະໜູນຫຼັກ.ສະເພາະປີນີ້, ມີເຮືອຊ່ວງເຂົ້າຮ່ວມແຂ່ງຂັນທັງໝົດ 12 ລໍາ. ຜ່ານການແຂ່ງຂັນ ທີ 1 ແມ່ນເຮືອຊ່ວງນາວານາກນ້ອຍ ໄດ້ຮັບຂັນ 1 ໜ່ວຍ ພ້ອມເງິນສົດ 4 ລ້ານກີບ, ທີ 2 ເຮືອຊ່ວງສວນລ້ານຊ້າງ ຕົ້ນກ້າສັ່ງລຸຍ ໄດ້ຮັບຂັນ 1 ໜ່ວຍ ພ້ອມເງິນສົດ 3 ລ້ານກີບ, ທີ 3 ເຮືອຊ່ວງສົມສາຄາເຟ່ ໄດ້ຂັນ1 ໜ່ວຍ ເງິນສົດ 2 ລ້ານ 5 ແສນກີບ. ສ່ວນເຮືອຊ່ວງລາວແກັດບ້ານສັງຄະໂລກ, ເຮືອຊ່ວງຮ້ານສ້ອມແປງລົດນັດຕະພົນ, ເຮືອຊ່ວງສາວສວຍເມືອງຟ້າ, ເຮືອຊ່ວງຮ້ານຂາຍໄມ້ນາງສົມຫຼ້າ-ນາງນິລະດາ, ເຮືອຊ່ວງແຝດນ້ອຍ ສີວຸດລົດຈົກ, ເຮືອຊ່ວງບໍລິສັດເຄວ່າຍບຸບຜາ, ເຮືອຊ່ວງເທບອະລິຍະທຳສີຫາລາດ, ເຮືອຊ່ວງເພັດລົດຈົກບໍລິສັດເອັຊພີອະສັງຫາລິມະຊັບຊື້ດີນ-ຂາຍດິນ ແລະເຮືອຊ່ວງດາວເບັ້ນ ໄດ້ຮັບລາງວັນຊົມເຊີຍ, ໃຫ້ກຽດມອບລາງວັນ ໂດຍແມ່ນ ທ່ານ ຊາຍພອນ ຈັນທຸມມາພ້ອມດ້ວຍຕາງໜ້າການນຳຂອງແຂວງ.

(ພາບ+ຂ່າວ: ທອງດາ ທິບພະວົງ)