ໃນວັນທີ 11 ສິງຫາ ຜ່ານມາ, ພາຍຫຼັງພິທີຕ້ອນຮັບ, ທ່ານ ໂຕເລິມ ໄດ້ພົບປະກັບທ່ານນາງ ແຊມ ໂມສຕິນ. ໃນການພົບປະ, ທ່ານ ໂຕເລິມ ເນັ້ນໜັກວ່າ: ອົສຕຣາລີ ແມ່ນເພື່ອນມິດສະໜິດສະໜົມ, ຄູ່ຮ່ວມມືທີ່ໄວ້ເນື້ອເຊື່ອໃຈ, ມີຜົນປະໂຫຍດຍຸດທະສາດຫຼາຍຢ່າງຄ້າຍຄືກັນກັບ ຫວຽດນາມ, ປາຖະໜາຢາກນຳການພົວພັນສອງປະເທດນັບມື້ນັບເຂົ້າສູ່ລວງເລິກ, ແທດຈິງ ແລະ ມີປະສິດທິຜົນ. ທ່ານ ໂຕເລິມ ຖືວ່າສອງຝ່າຍຄວນເພີ່ມທະວີການຮ່ວມມືໃຫ້ຫຼາຍກວ່າເກົ່າອີກ, ປາຖະໜາຢາກໃຫ້ການຢ້ຽມຢາມອົສຕຣາລີຄັ້ງນີ້ສືບຕໍ່ຍົກສູງການພົວພັນຮ່ວມມືຂຶ້ນສູ່ລະດັບສູງໃໝ່. ສ່ວນທ່ານນາງ ແຊມ ໂມສຕິນ ຢັ້ງຢືນວ່າ: ອົສຕຣາລີ ປາຖະໜາຢາກກາຍເປັນຄູ່ຮ່ວມມືທີ່ໄວ້ເນື້ອເຊື່ອໃຈຂອງ ຫວຽດນາມ, ພ້ອມແລ້ວທີ່ຈະຮ່ວມເດີນທາງ, ສະໜັບສະໜູນຫວຽດນາມໃນການປະຕິບັດເປົ້າໝາຍພັດທະນາ.

ກ່ຽວກັບທິດທາງຮ່ວມມື, ທ່ານ ໂຕເລິມ ສະເໜີສອງປະເທດສືບຕໍ່ປັບປຸງຄວາມໄວ້ເນື້ອເຊື່ອໃຈດ້ານການເມືອງຜ່ານການແລກປ່ຽນຄະນະຜູ້ແທນຂັ້ນສູງ ແລະ ບັນດາຊ່ອງທາງຮ່ວມມື, ເປີດກວ້າງການຮ່ວມມືດ້ານປ້ອງກັນຊາດ - ປ້ອງກັນຄວາມສະຫງົບ, ຊຸກຍູ້ການຄ້າ, ການລົງທຶນ, ກ້າວໄປເຖິງເປົ້າໝາຍນຳວົງເງິນການຄ້າສອງສົ້ນບັນລຸ 20 ຕື້ໂດລາ ແລະ ເພີ່ມທະວີການລົງທຶນສອງສົ້ນ.

ທ່ານນາງ ແຊມ ໂມສຕິນ ກ່າວວ່າ: ອົສຕຣາລີປາຖະໜາຢາກສືບຕໍ່ສ້າງສະພາບແວດລ້ອມທີ່ສະດວກເພື່ອໃຫ້ປະຊາຄົມຫວຽດນາມເສີມຂະຫຍາຍທ່າແຮງ, ຮັກສາສີສັນວັດທະນະທຳ ແລະ ປະກອບສ່ວນເຂົ້າໃນຄວາມຫຼາຍຮູບຫຼາຍແບບ, ວັດທະນາຖາວອນຂອງສັງຄົມອົສຕຣາລີ.

ພາຍຫຼັງການເຈລະຈາລະຫວ່າງທ່ານ ໂຕເລິມ ແລະ ທ່ານນາຍົກລັດຖະມົນຕີ ອົສຕຣາລີ ຢູ່ Canberra, ສອງຝ່າຍໄດ້ອອກຖະແຫຼງການຮ່ວມຢັ້ງຢືນພື້ນຖານອັນໝັ້ນແກ່ນຂອງການພົວພັນຄູ່ຮ່ວມມືຍຸດທະສາດຮອບດ້ານຫວຽດນາມ - ອົສຕຣາລີ. ຖະແຫຼງການໄດ້ຢັ້ງຢືນຄຳໝັ້ນສັນຍາສືບຕໍ່ເພີ່ມທະວີການຮ່ວມມືດ້ານປ້ອງກັນຊາດ ແລະ ປ້ອງກັນຄວາມສະຫງົບ, ເຫັນດີເປັນເອກະພາບສືບຕໍ່ບັນດາການເຄື່ອນໄຫວແລກປ່ຽນຄູ່ຮ່ວມມືຍຸດທະສາດຫຼາຍຝ່າຍ, ເພີ່ມທະວີການຮ່ວມມືປ້ອງກັນ ແລະ ຕ້ານອາຊະຍາກຳ.