ວິທະຍຸກະຈາຍສຽງຫວຽດນາມລາຍງານວ່າ: ເມືອບໍ່ດົນມານີ້ ຢູ່ ນິວຢອກ ອາເມຣິກາ, ຄະນະກຳມະການບັນດາບັນຫາສັງຄົມ, ມະນຸດສະທຳ ແລະ ວັດທະນະທຳ ຂອງສະມັດຊາໃຫຍ່ສະຫະປະຊາຊາດ ຊຸດທີ 78, ໄດ້ຈັດກອງປະຊຸມປຶກສາຫາລືກ່ຽວກັບບັນຫາຊຸກຍູ້ຄວາມກ້າວໜ້າຂອງແມ່ຍິງ.
ຂ່າວລະບຸວ່າ: ໃນກອງປະຊຸມປຶກສາຫາລື, ທ່ານນາງ ເລທິມິນທວາ ອັກຄະລັດຖະທູດ ຮອງຫົວໜ້າຄະນະຜູ້ຕາງໜ້າ ຫວຽດນາມ ປະຈຳ ສະຫະປະຊາຊາດ ໄດ້ສະເໜີບາງມາດຕະການແກ້ໄຂເພື່ອຊຸກຍູ້ບົດບາດ ແລະ ການເຂົ້າຮ່ວມຂອງແມ່ຍິງໃນບັນດາຂົງເຂດຂອງຊີວິດສັງຄົມ. ທ່ານຜູ້ຕາງໜ້າ ຫວຽດນາມ ກ່າວວ່າ: ຕ້ອງຊຸກຍູ້ການຮ່ວມມືສາກົນ ເພື່ອຊ່ວຍເຫຼືອບັນດາປະເທດປະຕິບັດບັນດາຄຳໝັ້ນສັນຍາສາກົນເພື່ອຮັບປະກັນ ການເຂົ້າຮ່ວມຢ່າງຄົບຖ້ວນ, ສະເໝີພາບ ແລະ ມີຄວາມໝາຍຂອງແມ່ຍິງ ແລະ ເດັກຍິງໃນທຸກຂົງເຂດ ຂອງຊີວິດສັງຄົມ, ປະກອບສ່ວນສະກັດກັ້ນການໃຊ້ຄວາມຮຸນແຮງ, ການຈຳແນກການປະພຶດ. ໃນສະພາບການຫັນເປັນດີຈີຕອນ, ຕ້ອງສຸມໃສ່ຍົກສູງຄຸນນະພາບແຮງງານເພດຍິງກ່ຽວກັບທັກສະດີຈີຕອນ, ຊຸກຍູ້ບົດບາດຂອງແມ່ຍິງໃນການພັດທະນາເສດຖະກິດດີຈີຕອນ. ພ້ອມກັນນັ້ນ, ຕ້ອງສ້າງເງື່ອນໄຂເພື່ອພັດທະນາໃຫ້ແກ່ແມ່ຍິງ ແລະ ເດັກຍິງໃນບັນດາຂົງເຂດວິທະຍາສາດ ແລະ ເຕັກໂນໂລຊີ, ປົກປ້ອງສິດຂອງແມ່ຍິງໃນສະພາບແວດລ້ອມດີຈີຕອນ.
ເນື່ອງໃນໂອກາດນີ້, ຜູ້ຕາງໜ້າ ຫວຽດນາມ ໄດ້ຍົກບັນດາໝາກຜົນ ແລະ ບັນດາຜົນງານທີ່ ຫວຽດນາມ ບັນລຸໄດ້ໃນການຮັບປະກັນສິດທິຂອງແມ່ຍິງ ແລະ ຄວາມສະເໝີພາບລະຫວ່າງຍິງ-ຊາຍໃນການວາງນະໂຍບາຍ, ສ້າງກົດໝາຍ ແລະ ຍຸດທະສາດການພັດທະນາ.
ຄໍາເຫັນ