ພິທີລົງນາມໃນສັນຍາ ໂຄງການສົ່ງເສີມຄວາມເຂັ້ມແຂງແກ່ຊາວກະສິກອນຂະໜາດນ້ອຍເພດຍິງ ໃນການປັບຕົວ ຂົງເຂດດ້ານກະສິກໍາ ໄດ້ຈັດຂຶ້ນໃນວັນທີ 16 ພຶດສະພານີ້ ທີ່ WFP ປະຈໍາ ສປປ ລາວ ໂດຍການລົງນາມລະຫວ່າງ ທ່ານ ນາງ ເດຍດຣີ ນິ ຟາລູອິນ (Deirdre Ni Fhalluin) ເອກອັກຄະລັດຖະທູດ ແຫ່ງ ອຽກລັງ ປະຈຳ ສປປ ລາວ ແລະ ທ່ານ ມາກ ອານເດຣ ໂປສ (Marc Andre Prost) ຜູ້ຕາງໜ້າອົງການອາຫານໂລກ ປະຈຳ ສປປ ລາວ ຊຶ່ງມີທ່ານ ສຸວັນທອງ ນາມວົງ ຮອງຫົວໜ້າກົມສົ່ງເສີມກະສິກໍາ ແລະ ສະຫະກອນ ກະຊວງກະສິກໍາ ແລະ ປ່າໄມ້ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມເປັນສັກຂີພິຍານ.
ໃນພິທີ, ທ່ານ ນາງ ເດຍດຣີ ນິ ຟາລູອິນ ກ່າວວ່າ: “ປະເທດອຽກລັງ ໃຫ້ຄວາມສຳຄັນກັບການສະໜັບສະໜູນການປັບຕົວ ແລະ ສ້າງຄວາມຕ້ານທານຕໍ່ການປ່ຽນແປງຂອງສະພາບອາກາດ ເປັນສ່ວນໜຶ່ງຂອງແນວທາງຄວາມຮ່ວມມືໃນການພັດທະນາຂອງພວກເຮົາໃນພາກພື້ນອາຊຽນ ໂດຍສະເພາະໃນປະເທດທີ່ມີຄວາມບອບບາງຕໍ່ຜົນກະທົບຂອງການປ່ຽນແປງຂອງສະພາບດິນຟ້າອາກາດ. ໂຄງການນີ້, ໄດ້ຮັບທຶນສະໜັບສະໜູນຜ່ານສະຖານເອກອັກຄະລະທູດອຽກລັງ ປະຈໍາ ນະຄອນຫຼວງຮ່າໂນ້ຍ, ໃນການຮ່ວມມື ກັບ WFP ປະຈໍາ ສປປ ລາວ ເປັນຕົວຢ່າງສະທ້ອນໃຫ້ເຫັນເຖິງຄວາມມຸ່ງໝັ້ນຂອງອຽກລັງ ໃນການຮ່ວມມືດ້ານສະພາບອາກາດ ແລະ ການພັດທະນາແບບຍືນຍົງ. ພວກເຮົາຍິນດີຫຼາຍທີ່ໄດ້ສະໜັບສະໜູນຊາວກະສິກອນຍິງໃນຊົນນະບົດ ຜ່ານໂຄງການນີ້ ເນື່ອງຈາກພວກເຂົາມີບົດບາດສຳຄັນໃນການຜະລິດອາຫານ ແລະ ໂພຊະນາການຂອງຄົວເຮືອນທົ່ວ ສປປ ລາວ.”
ທ່ານ ມາກ ອານເດຣ ໂປສ ໄດ້ກ່າວຂອບໃຈຕໍ່ການສະໜັບສະໜູນຈາກໄອຣແລນ; ພ້ອມກ່າວວ່າ: “ການປ່ຽນແປງຂອງສະພາບດິນຟ້າອາກາດ ກຳລັງສົ່ງຜົນກະທົບຕໍ່ການຜະລິດອາຫານ ແລະ ວິຖີຊີວິດຂອງຫຼາຍຊຸມຊົນໃນ ສປປ ລາວ. ໂຄງການນີ້, ເປັນການສະໜັບສະໜູນແນວທາງທີ່ເປັນວິທີການໃໝ່ໆ ແລະ ປັບໃຊ້ໃຫ້ແທດເໝາະກັບຊຸມຊົນທ້ອງຖິ່ນ ເພື່ອຊ່ວຍໃຫ້ຊຸມຊົນບໍ່ພຽງແຕ່ຢູ່ລອດໃນສະພາບທີ່ທ້າທາຍເຫຼົ່ານີ້ ແຕ່ຍັງສາມາດຟື້ນຟູ ແລະ ພັດທະນາຕໍ່ໄປໄດ້. ຜ່ານໂຄງການນີ້, ພວກເຮົາກໍາລັງຊ່ວຍເຫຼືອຊຸມຊົນ ທີ່ມີຄວາມໜ້າເປັນຫ່ວງທີ່ສຸດໃນປະເທດ ໃຫ້ສາມາດປັບຕົວເຂົ້າກັບການປ່ຽນແປງສະພາບອາກາດ. ການຮ່ວມມືກັນລະຫວ່າງອຽກລັງ ແລະ ລັດຖະບານ ສປປ ລາວ ຄັ້ງນີ້ ສະທ້ອນໃຫ້ເຫັນເຖິງຄວາມສໍາຄັນ ໃນການແກ້ໄຂບັນຫາຄວາມທຸກຍາກ, ຄວາມເຫຼື້ອມລໍ້າທາງເພດ ແລະ ການປ່ຽນແປງຂອງສະພາບດິນຟ້າອາກາດ ທີ່ມີຜົນກະທົບຕໍ່ຊີວິດຂອງຄອບຄົວຈໍານວນຫຼາຍໃນພື້ນທີ່ນີ້’’.
ໂຄງການດັ່ງກ່າວ, ດໍາເນີນງານຮ່ວມມືຢ່າງໃກ້ຊິດກັບກົມສົ່ງເສີມ ແລະ ພັດທະນາກະເສດຕະກອນ ຂອງກະຊວງກະສິກໍາ ແລະ ປ່າໄມ້ ໂດຍມີເປົ້າໝາຍເພື່ອຊ່ວຍເຫຼືອຊາວກະສິກອນ ແລະ ຄົວເຮືອນໃນຊົນນະບົດ ໂດຍສະເພາະຜູ້ຍິງ, ໄວໜຸ່ມ ແລະ ຊົນເຜົ່າທ້ອງຖິ່ນ ໃຫ້ສາມາດແກ້ໄຂບັນຫາການຂາດແຄນອາຫານ, ພາວະຂາດໂພຊະນາການ ແລະ ຄວາມຍາກຈົນ ຊຶ່ງຈະດຳເນີນການຜ່ານການສົ່ງເສີມການເຂົ້າເຖິງອາຫານທີ່ມີຄວາມຫຼາກຫຼາຍ ແລະ ໂພຊະນາການ, ເສີມສ້າງຄວາມຕ້ານທານໃຫ້ຊາວກະສິກອນຍິງ ຜ່ານການສົ່ງເສີມການກະສິກໍາ ທີ່ສາມາດປັບຕົວກັບສະພາບອາກາດ ແລະ ການຄວບຄຸມຄວາມສ່ຽງຈາກໄພພິບັດໃນຊຸມຊົນ, ພ້ອມທັງສົ່ງເສີມການເຂົ້າເຖິງບໍລິການທາງການເງິນ ໂດຍການມອບທຶນໃຫ້ແກ່ກະສິກອນຍິງ ເພື່ອພັດທະນາການຜະລິດໃນທ້ອງຖິ່ນອີກດ້ວຍ. ໂຄງການນີ້, ສະທ້ອນໃຫ້ເຫັນເຖິງຄວາມມຸ່ງໝັ້ນຂອງອຽກລັງ ໃນການສະໜັບສະໜູນລັດຖະບານລາວ ໃນຄວາມພະຍາຍາມບັນລຸເປົ້າໝາຍການພັດທະນາທີ່ຍືນຍົງ (SDG) ຂໍ້ທີ 2 ວ່າດ້ວຍການຂະຫຍາຍຄວາມມັ່ນຄົງທາງອາຫານ ແລະ ໂພຊະນາການ ແລະ ການກະສິກໍາທີ່ຍືນຍົງ, ພ້ອມທັງ SDG ຂໍ້ທີ 13 ກ່ຽວກັບການປ່ຽນແປງຂອງສະພາບອາກາດ.
ປະເທດອຽກລັງ ໄດ້ເປັນພັນທະມິດດ້ານການພັດທະນາກັບ ສປປ ລາວ ຕັ້ງແຕ່ປີ 2006 ໂດຍມີໂຄງການທີ່ມຸ່ງເນັ້ນໄປທີ່ການແກ້ໄຂບັນຫາການເກັບກູ້ລະເບີດ, ຄວາມມັ່ນຄົງດ້ານອາຫານ, ການສຶກສາ ແລະໂພຊະນາການ. ພາຍໃຕ້ຍຸດທະສາດຂອງສະຖານທູດອຽກລັງ ປະຈໍາສົກ 2023–2027, ອຽກລັງ ໄດ້ຂະຫຍາຍໂຄງການຮ່ວມມືດ້ານການພັດທະນາໃນ ສປປ ລາວ ໂດຍມີເປົ້າໝາຍໃນການເພີ່ມການສະໜັບສະໜູນຂອງອຽກລັງ ໃຫ້ກວ້າງຂວາງຂຶ້ນທົ່ວປະເທດ ແລະ ສະໜັບສະໜູນດ້ານສໍາຄັນເພີ່ມເຕີມ ເຊັ່ນ: ການປົກປ້ອງສິ່ງແວດລ້ອມ ແລະ ການປົກຄອງ.
(ຂ່າວ: ແສງຈັນ, ຂໍ້ມູນ-ພາບ: WFP ປະຈໍາ ສປປ ລາວ)
ຄໍາເຫັນ