ທັງນີ້, ຄວາມຕ້ອງການໄຟຟ້າຈາກອຸດສາຫະກຳລົດ EV ແລະ ສູນຂໍ້ມູນ ເພີ່ມຂຶ້ນ 38% ແລະ 17% ຕາມລຳດັບ.
ບົດລາຍງານຂອງ IEA ຊີ້ໃຫ້ເຫັນວ່າ: ຄວາມຕ້ອງການໃຊ້ໄຟຟ້າມີການເຕີບໂຕໄວກວ່າຄວາມຕ້ອງການພະລັງງານໂດຍລວມປະມານ 2.3 ເທົ່າ ໃນປີ 2025, ໂດຍການເຕີບໂຕຂອງຄວາມຕ້ອງການພະລັງງານທົ່ວໂລກຊ້າລົງເຫຼືອ 1.3% ຊຶ່ງຕໍ່າກວ່າຄ່າສະເລ່ຍຂອງທົດສະວັດທີ່ຜ່ານມາເລັກນ້ອຍ.
IEA ລະບຸວ່າ: ຄວາມຕ້ອງການໄຟຟ້າໃນບັນດາປະເທດທີ່ພັດທະນາແລ້ວໄດ້ຂະຫຍາຍຕົວຢ່າງແຂງແຮງເຖິງ 1.6% ຕໍ່ປີ, ໂດຍສະເພາະໃນ ສະຫະລັດ ອາເມຣິກາ ທີ່ສູນຂໍ້ມູນກວມເອົາການເຕີບໂຕຂອງຄວາມຕ້ອງການໄຟຟ້າເຖິງ 50%. ໃນຂະນະທີ່ຄວາມຕ້ອງການໄຟຟ້າໃນປະເທດຈີນກໍເພີ່ມຂຶ້ນຢ່າງຫຼວງຫຼາຍເຊັ່ນກັນ, ແຕ່ເນື່ອງຈາກຄວາມຕ້ອງການດ້ານຄວາມເຢັນຫຼຸດລົງເລັກນ້ອຍ, ເຮັດໃຫ້ລະດັບຄວາມຕ້ອງການໃນປີ 2025 ຍັງຄົງຕໍ່າກວ່າໃນປີ 2024.
ບົດລາຍງານຂອງ IEA ຍັງລະບຸວ່າ: ພະລັງງານແສງຕາເວັນປະກອບສ່ວນຫຼາຍທີ່ສຸດຕໍ່ການເຕີບໂຕຂອງການສະໜອງພະລັງງານທົ່ວໂລກເປັນຄັ້ງທຳອິດໃນປີ 2025. ທ່ານ ຟາຕີ ບິໂຣລ ຜູ້ອຳນວຍການໃຫຍ່ຂອງ IEA ກ່າວວ່າ: ພະລັງງານແສງຕາເວັນແບບ Solar PV ກວມເອົາຫຼາຍກວ່າໜຶ່ງສ່ວນສີ່ໃນການເຕີບໂຕຂອງຄວາມຕ້ອງການພະລັງງານທົ່ວໂລກ ຊຶ່ງຫຼາຍກວ່າແຫຼ່ງພະລັງງານອື່ນໆ, ໃນຂະນະທີ່ອາຍແກ໊ສທຳມະຊາດຖືສ່ວນແບ່ງໃຫຍ່ເປັນອັນດັບສອງຢູ່ທີ່ 17%.
ສ່ວນຄວາມຕ້ອງການນ້ຳມັນທົ່ວໂລກເພີ່ມຂຶ້ນພຽງແຕ່ 0.7%, ສອດຄ່ອງກັບການຄາດຄະເນຂອງ IEA ຊຶ່ງສະທ້ອນໃຫ້ເຫັນເຖິງການເຕີບໂຕຢ່າງຕໍ່ເນື່ອງຂອງລົດ EV ໄດ້ເຮັດໃຫ້ຄວາມຕ້ອງການນ້ຳມັນເຊື້ອໄຟສຳລັບລົດທົ່ວໄປຫຼຸດໜ້ອຍລົງ.
ຄໍາເຫັນ