ບົດລາຍງານຕະຫຼາດນ້ຳມັນລ້າສຸດຂອງ IEA ຊີ້ໃຫ້ເຫັນວ່າ: ການໄຫຼວຽນຂອງນ້ຳມັນດິບ ແລະ ຜະລິດຕະພັນນ້ຳມັນຜ່ານຊ່ອງແຄບຮໍມຸສ ຊຶ່ງເປັນໜຶ່ງໃນເສັ້ນທາງການຂົນສົ່ງທີ່ສຳຄັນທີ່ສຸດຂອງໂລກ, ໄດ້ຫຼຸດລົງຈາກປະມານ 20 ລ້ານບາເຣວຕໍ່ມື້ກ່ອນເກີດສົງຄາມເຫຼືອພຽງສ່ວນນ້ອຍໃນປັດຈຸບັນ. ສົ່ງຜົນໃຫ້ຜູ້ຜະລິດນ້ຳມັນໃນອ່າວເປີເຊຍຕ້ອງຫຼຸດກຳລັງການຜະລິດຢ່າງໜ້ອຍ 10 ລ້ານບາເຣວຕໍ່ມື້. ດັ່ງນັ້ນ, ການສະໜອງນ້ຳມັນທົ່ວໂລກຄາດວ່າຈະຫຼຸດລົງປະມານ 8 ລ້ານບາເຣວຕໍ່ມື້ໃນເດືອນມີນາ. ໂດຍການຫຼຸດລົງໃນຕາເວັນອອກກາງແມ່ນໄດ້ຮັບການຊົດເຊີຍບາງສ່ວນຈາກການເພີ່ມການຜະລິດຂອງບັນດາປະເທດທີ່ບໍ່ແມ່ນ OPEC+ ເຊັ່ນ: ກາຊັກສະຖານ ແລະ ຣັດເຊຍ, ຫຼັງຈາກປະເຊີນກັບການຢຸດສະງັກກ່ອນໜ້ານີ້ ໃນປີ 2026.
ບົດລາຍງານຍັງລະບຸວ່າ: ການໂຈມຕີ ແລະ ເສັ້ນທາງສົ່ງອອກທີ່ຈຳກັດເຮັດໃຫ້ກຳລັງການກັ່ນນໍ້າມັນໃນພາກພື້ນ ຫຼາຍກວ່າ 3 ລ້ານບາເຣວຕໍ່ມື້ຕ້ອງຢຸດການດໍາເນີນງານ.
ລາຄານ້ຳມັນມີຄວາມຜັນຜວນຢ່າງຮຸ່ນແຮງນັບຕັ້ງແຕ່ ສະຫະລັດ ອາເມຣິກາ ແລະ ອິສຣາແອນ ເປີດການໂຈມຕີທາງອາກາດຕໍ່ອີຣານ. ລາຄານ້ຳມັນດິບ Brent ລ່ວງໜ້າໄດ້ເພີ່ມຂຶ້ນເກືອບ 120 ໂດລາຕໍ່ບາເຣວ ກ່ອນທີ່ຈະອ່ອນລົງມາຢູ່ສູງກວ່າ 90 ໂດລາຕໍ່ບາເຣວ ຊຶ່ງຍັງສູງກວ່າປະມານ 20 ໂດລາຕໍ່ບາເຣວ ເມື່ອທຽບກັບເດືອນກ່ອນ.
ເພື່ອຕອບສະໜອງຕໍ່ການຢຸດສະງັກຂອງການສະໜອງດັ່ງກ່າວ, ບັນດາປະເທດສະມາຊິກ IEA ໄດ້ຕົກລົງກັນໃນວັນທີ 11 ມີນາ ຜ່ານມາ ໃຫ້ປ່ອຍນ້ຳມັນຈາກຄັງສຳຮອງສຸກເສີນເຂົ້າສູ່ຕະຫຼາດໃນປະລິມານທີ່ບໍ່ເຄີຍມີມາກ່ອນ ເຖິງ 400 ລ້ານບາເຣວ.
ອົງການ IEA ໄດ້ເຕືອນວ່າ: ຜົນກະທົບຂັ້ນສຸດທ້າຍຂອງຄວາມຂັດແຍ້ງທີ່ມີຕໍ່ຕະຫຼາດນ້ຳມັນ ແລະ ອາຍແກ໊ສ, ລວມເຖິງເສດຖະກິດໃນວົງກວ້າງ, ຈະບໍ່ພຽງແຕ່ຂຶ້ນຢູ່ກັບຄວາມຮຸນແຮງຂອງການໂຈມຕີທາງທະຫານ ແລະ ຄວາມເສຍຫາຍທີ່ອາດເກີດຂຶ້ນຕໍ່ພື້ນຖານໂຄງລ່າງພະລັງງານເທົ່ານັ້ນ, ແຕ່ຍັງຂຶ້ນກັບໄລຍະເວລາຂອງການຢຸດສະງັກໃນການຂົນສົ່ງຜ່ານຊ່ອງແຄບຮໍມຸສ ອີກດ້ວຍ.
ຄໍາເຫັນ