ທ່ານນາງ ຈໍເຈຍວາ ກ່າວວ່າ: ຖ້າບໍ່ມີສົງຄາມໃນຕາເວັນອອກກາງ, IMF ຄາດວ່າຈະປັບປຸງການຄາດຄະເນການເຕີບໂຕຂອງເສດຖະກິດໂລກຂຶ້ນເລັກນ້ອຍຈາກໂຕເລກການຄາດຄະເນກ່ອນໜ້ານີ້ທີ່ 3.3% ສຳລັບປີ 2026 ແລະ 3.2% ສຳລັບປີ 2027, ຍ້ອນເຫັນວ່າເສດຖະກິດໂລກຍັງຄົງຟື້ນຕົວຈາກພະຍາດລະບາດ. ແຕ່ໃນທາງກົງກັນຂ້າມ, ສະຖານະການໃນປັດຈຸບັນກຳລັງຊຸກຍູ້ໃຫ້ລາຄາສິນຄ້າເພີ່ມຂຶ້ນ ແລະ ການເຕີບໂຕທາງເສດຖະກິດຊ້າລົງ.
ທ່ານນາງ ຈໍເຈຍວາ ໄດ້ອະທິບາຍຕື່ມອີກວ່າ: ພວກເຮົາອາໄສຢູ່ໃນໂລກທີ່ມີຄວາມບໍ່ແນ່ນອນສູງ, ໂດຍອ້າງອີງເຖິງສະຖານະການຄວາມເຄັ່ງຕຶງທາງພູມິສາດການເມືອງ, ຄວາມກ້າວໜ້າທາງດ້ານເຕັກໂນໂລຊີ, ການປ່ຽນແປງຂອງສະພາບອາກາດ ແລະ ການປ່ຽນແປງທາງດ້ານປະຊາກອນ ຊຶ່ງທັງໝົດນີ້ໝາຍຄວາມວ່າ ຫຼັງຈາກເສດຖະກິດໂລກຟື້ນຕົວຈາກການປ່ຽນແປງຄັ້ງນີ້ແລ້ວ, IMF ຕ້ອງລະມັດລະວັງຕໍ່ວິກິດການທີ່ອາດເກີດຂຶ້ນໃນອະນາຄົດ.
ນອກຈາກນັ້ນ, ຜູ້ອຳນວຍການຝ່າຍບໍລິຫານຂອງ IMF ໄດ້ກ່າວວ່າ: ສົງຄາມດັ່ງກ່າວໄດ້ເຮັດໃຫ້ການສະໜອງນ້ຳມັນດິບທົ່ວໂລກຫຼຸດລົງ 13%, ໂດຍຜົນກະທົບເຫຼົ່ານີ້ມີຜົນກະທົບຕໍ່ການຂົນສົ່ງນ້ຳມັນ ແລະ ອາຍແກ໊ສ ລວມເຖິງລະບົບຕ່ອງໂສ້ການສະໜອງທີ່ກ່ຽວຂ້ອງເຊັ່ນ: ຮີລຽມ ແລະ ປຸ໋ຍ. ທ່ານກ່າວຕື່ມວ່າ: ເຖິງວ່າສົງຄາມອາດຈະສິ້ນສຸດລົງຢ່າງໄວວາ ແລະ ເສດຖະກິດອາດຟື້ນຕົວໄດ້ໄວພໍສົມຄວນ, ແຕ່ຜົນສະທ້ອນທີ່ເກີດຂຶ້ນຈາກສົງຄາມຄັ້ງນີ້ຈະເຮັດໃຫ້ IMF ພິຈາລະນາການປັບປຸງການຄາດຄະເນການເຕີບໂຕຂອງເສດຖະກິດໂລກລົງເລັກນ້ອຍ ແລະ ການປັບປຸງການຄາດຄະເນອັດຕາເງິນເຟີ້ໃຫ້ສູງຂຶ້ນ. ແຕ່ຖ້າສົງຄາມຍືດເຍື້ອ, ຜົນກະທົບຕໍ່ອັດຕາເງິນເຟີ້ ແລະ ການເຕີບໂຕຂອງເສດຖະກິດຈະຮ້າຍແຮງກວ່າເກົ່າ. ຄຳເຫັນເຫຼົ່ານີ້ມີຂຶ້ນກ່ອນທີ່ IMF ຈະເປີດເຜີຍໂຕເລກການຄາດຄະເນເສດຖະກິດໂລກໃນອາທິດໜ້າ. ໂດຍມີການຄາດຄະເນວ່າ IMF ຈະເຜີຍແຜ່ສະຖານະການຕ່າງໆໃນບົດລາຍງານທ່າອ່ຽງເສດຖະກິດໂລກ ຊຶ່ງຈະອອກໃນວັນທີ 14 ເມສາ ຈະມາເຖິງນີ້.
ກ່ອນໜ້ານີ້, ໃນວັນທີ 30 ມີນາ ຜ່ານມາ, IMF ໄດ້ສົ່ງສັນຍານເຖິງຄວາມເປັນໄປໄດ້ໃນການຫຼຸດການຄາດຄະເນເສດຖະກິດໂລກ, ໂດຍອ້າງອີງເຖິງຜົນກະທົບຈາກສົງຄາມ ແລະ ສະພາບທາງດ້ານການເງິນທີ່ເຕັ່ງຕຶງຫຼາຍຂຶ້ນ.
ສົງຄາມໃນຕາເວັນອອກກາງໄດ້ສົ່ງຜົນໃຫ້ການສະໜອງພະລັງງານໂລກທົ່ວໂລກປະເຊີນກັບການສະຢຸດສະງັກຮ້າຍແຮງທີ່ສຸດ, ໂດຍການຜະລິດນ້ຳມັນຫຼາຍລ້ານບາເຣວໄດ້ຢຸດສະງັກລົງ ຍ້ອນການປິດລ້ອມຊ່ອງແຄບຮໍມຸສຂອງອີຣານ ຊຶ່ງເປັນເສັ້ນທາງຂົນສົ່ງນ້ຳມັນ ແລະ ອາຍແກ໊ສໜຶ່ງສ່ວນຫ້າຂອງໂລກ.
ຄໍາເຫັນ