ຜູ້ອຳນວຍ IMF ກ່າວໃນວັນທີ 15 ມິຖຸນາ ຜ່ານມາວ່າ: ຂໍ້ຕົກລົງລະຫວ່າງ ສະຫະລັດ ອາເມຣິກາ ແລະ ອີຣານ ທີ່ໄດ້ບັນລຸໃນວັນທີ 14 ມິຖຸນາ ຜ່ານມາ ຊຶ່ງລວມທັງການຢຸດຕິສົງຄາມ ແລະ ການເປີດຊ່ອງແຄບຮໍມຸສຄືນໃໝ່, ຖືເປັນສັນຍານທີ່ໜ້າຍິນດີ.
ຢ່າງໃດກໍຕາມ, ຜູ້ອຳນວຍການ IMF ໄດ້ເຕືອນວ່າ: ຖ້າຂໍ້ຂັດແຍ່ງຮຸນແຮງຂຶ້ນ ຫຼື ເກີດການຢຸດສະງັກດ້ານການສະໜອງ, ກໍອາດຈະກາຍເປັນຄວາມສ່ຽງທີ່ສຳຄັນຕໍ່ການເຕີບໂຕຂອງເສດຖະກິດໂລກ.
IMF ມີກຳນົດຈະເຜີຍແຜ່ການຄາດຄະເນເສດຖະກິດໂລກທີ່ໄດ້ຮັບການປັບປຸງໃໝ່ໃນວັນທີ 8 ກໍລະກົດນີ້, ຫຼັງຈາກໃນເດືອນເມສາຜ່ານມາ IMF ໄດ້ເຜີຍແຜ່ສະຖານະການກ່ຽວກັບການເຕີບໂຕຂອງ GDP ໂລກ ໃນປີ 2026 ແລະ 2027 ໄວ້ 3 ຮູບແບບ ຊຶ່ງໄດ້ແກ່ "ການຄາດຄະເນອ້າງອີງ," "ສະຖານະການທາງລົບ" ແລະ "ສະຖານະການທີ່ຮ້າຍແຮງ."
ພາຍໃຕ້ສະຖານະການທາງລົບ, ການເຕີບໂຕຂອງເສດຖະກິດໂລກຄາດວ່າຈະຊ້າລົງເຫຼືອ 2.5% ໃນປີ 2026, ໃນຂະນະທີ່ອັດຕາເງິນເຟີ້ຈະເພີ່ມຂຶ້ນເປັນ 5.4%.
ການຄາດຄະເນອ້າງອີງ ຊຶ່ງສົມມຸດວ່າມີຄວາມຂັດແຍ້ງເກີດຂຶ້ນໃນໄລຍະສັ້ນ, IMF ຄາດຄະເນການເຕີບໂຕຂອງເສດຖະກິດໂລກຢູ່ທີ່ 3.1% ແລະ ອັດຕາເງິນເຟີ້ຢູ່ທີ່ 4.4%. ສ່ວນສະຖານະການທີ່ຮ້າຍແຮງ ນັ້ນ ຄາດຄະເນການເຕີບໂຕຂອງເສດຖະກິດໂລກຈະຢູ່ພຽງແຕ່ 2% ແລະ ອັດຕາເງິນເຟີ້ຈະເພີ່ມຂຶ້ນສູງເຖິງ 5.8%.
ເຖິງແມ່ນວ່າກ່ອນໜ້ານີ້ ທ່ານນາງ ຈໍເຈຍວາ ໄດ້ຊີ້ບອກວ່າໂລກກຳລັງກ້າວໄປສູ່ "ສະຖານະການທາງລົບ," ແຕ່ຖະແຫຼງການຫຼ້າສຸດສະທ້ອນໃຫ້ເຫັນວ່າ IMF ອາດຈະເນັ້ນໜັກໃສ່ "ການຄາດຄະເນອ້າງອີງ," ຫຼາຍຂຶ້ນ, ໂດຍອີງໃສ່ສົມມຸດຕິຖານທີ່ວ່າສົງຄາມກັບອີຣານຈະສິ້ນສຸດລົງໃນໄວໆນີ້ ແລະ ເສດຖະກິດໂລກຄາດວ່າຈະຂະຫຍາຍຕົວ 3.1% ໃນປີ 2026.
ທ່ານນາງ ຈໍເຈຍວາ ກ່າວວ່າ: ເຖິງແມ່ນວ່າສົງຄາມໃນຕາເວັນອອກກາງຈະຍືດເຍື້ອເປັນເວລາຫຼາຍກວ່າ 3 ເດືອນ ແລະ ສົ່ງຜົນກະທົບຕໍ່ລາຄາສິນຄ້າ, ອັດຕາເງິນເຟີ້ ແລະ ສະຖານະການທາງການເງິນທົ່ວໂລກ, ແຕ່ຜົນກະທົບຍັງບໍ່ທັນຮຸນແຮງພໍທີ່ຈະເປັນສັນຍານຂອງການຊະລໍຕົວຂອງເສດຖະກິດໂລກ.
ຍິ່ງໄປກວ່ານັ້ນ, ຄວາມຄືບໜ້າຂອງຂໍ້ຕົກລົງສັນຕິພາບສະບັບຫຼ້າສຸດຖືເປັນບາດກ້າວທີ່ສຳຄັນໃນການແກ້ໄຂຂໍ້ຂັດແຍ່ງທີ່ເລີ່ມຕົ້ນດ້ວຍການໂຈມຕີຮ່ວມກັນໂດຍສະຫະລັດ ອາເມຣິກາ ແລະ ອິສຣາເອນຕໍ່ອີຣານໃນເດືອນກຸມພາ ຜ່ານມາ, ກ່ອນທີ່ຈະເພີ່ມຂຶ້ນເປັນວິກິດການໃນພາກພື້ນ ຊຶ່ງເຮັດໃຫ້ມີຜູ້ເສຍຊີວິດຈຳນວນຫຼາຍ, ຄວາມວຸ້ນວາຍໃນຕະຫຼາດພະລັງງານໂລກ ແລະ ເຮັດໃຫ້ເກີດຄວາມກັງວົນກ່ຽວກັບການຖົດຖອຍທາງເສດຖະກິດ.
ຄໍາເຫັນ