ສຳນັກຂ່າວສານຊິນຮວາລາຍງານໃນວັນທີ 15 ກໍລະກົດ ຜ່ານມາວ່າ: ທ່ານ ເມດຢາ ຮາຟິດ ລັດຖະມົນຕີກະຊວງການສື່ສານ ແລະ ກິດຈະການດີຈີຕອນ ຂອງອິນໂດເນເຊຍ ໄດ້ກ່າວວ່າ: ອິນໂດເນເຊຍໄດ້ບລັອກເວັບໄຊ ແລະ ເນື້ອໃນອອນລາຍທີ່ກ່ຽວຂ້ອງກັບການພະນັນທີ່ຜິດກົດໝາຍ 3.7 ລ້ານລາຍການ ນັບຕັ້ງແຕ່ເດືອນຕຸລາ 2024 ເປັນຕົ້ນມາ, ໃນຂະນະທີ່ເຈົ້າໜ້າທີ່ໄດ້ເພີ່ມທະວີການປາບປາມທົ່ວປະເທດ.
ທ່ານ ເມດຢາ ກ່າວວ່າ: ລັດຖະບານໄດ້ຮັບລາຍງານກ່ຽວກັບບັນຊີທະນາຄານທີ່ໜ້າສົງໄສ ຈໍານວນ 156,000 ບັນຊີ ແລະ ເບີໂທລະສັບມືຖື 85,500 ເບີ ທີ່ຖືກກ່າວຫາວ່າໃຊ້ໃນການສໍ້ໂກງຜ່ານແພລັດຟອມ ລາຍງານຢ່າງເປັນທາງການ. ນອກຈາກນັ້ນ, ຍັງໄດ້ປິດບັນຊີທະນາຄານ ຈຳນວນ 32,500 ບັນຊີ ຈາກ 38,000 ບັນຊີ ທີ່ກະຊວງດັ່ງກ່າວໄດ້ລາຍງານຕໍ່ອົງການບໍລິການທາງການເງິນ.
ລັດຖະບານກຳລັງປ່ຽນຈາກການຕອບໂຕ້ໂດຍການລຶບເນື້ອໃນໄປສູ່ການກວດສອບຄວາມຜິດປົກກະຕິ ແລະ ເສີມສ້າງການເຊື່ອມໂຍງຂໍ້ມູນລະຫວ່າງອົງການຕ່າງໆ ເພື່ອເລັ່ງການດຳເນີນການຕໍ່ຕ້ານເຄືອຂ່າຍການພະນັນທີ່ຜິດກົດ ໝາຍ.
ທ່ານ ພຣາໂບໂວ ຊູບຽນໂຕ ປະທານາທິບໍດີອິນໂດເນເຊຍ ໄດ້ກຳນົດການຕໍ່ສູ້ກັບການພະນັນອອນລາຍເປັນບຸລິມະສິດແຫ່ງຊາດ ເນື່ອງຈາກວ່າເປັນໄພຂົ່ມຂູ່ທີ່ຮ້າຍແຮງທີ່ສົ່ງຜົນກະທົບຕໍ່ປະຊາຊົນ, ເປັນສາເຫດຂອງບັນຫາສັງຄົມ ແລະ ກໍ່ໃຫ້ເກີດການສູນເສຍທາງເສດຖະກິດຢ່າງຫຼວງຫຼາຍ.
ຄໍາເຫັນ