ລັດຖະບານກຳປູເຈຍຈະຫຼຸດພາສີນຳເຂົ້າລົດໂດຍສານໄຟຟ້າ, ເຕົາໄຟຟ້າ ແລະ ເຄື່ອງປີ້ງເຂົ້າຈີ່ ຈາກ 35% ເປັນ 0% ແລະ ລົດໄຮບຣິດປລັກອິນຈາກ 35% ເປັນ 7%. ລວມທັງຈະຫຼຸດພາສີນຳເຂົ້າອຸປະກອນຂອງແບັດເຕີຣີລົດໄຟຟ້າ, ໝໍ້ຫຸງເຂົ້າໄຟຟ້າ ແລະ ໂຄມໄຟພະລັງງານແສງຕາເວັນ ຈາກ 7% ເປັນ 0%.
ນອກຈາກນັ້ນ, ລັດຖະບານຍັງໄດ້ຫຼຸດພາສີນຳເຂົ້າຈາກ 15% ເປັນ 0% ສຳລັບມໍເຕີຂອງລົດໄຟຟ້າ, ລົດໄຮບຣິດປລັກອິນ, ລົດໄຮບຣິດ, ລະບົບພະລັງງານແສງຕາເວັນ, ແບັດເຕີຣີລິທຽມ, ເຕົາໄຟຟ້າ ແລະ ໝໍ້ຕົ້ມນໍ້າຮ້ອນໄຟຟ້າ.
ກະຊວງການຄ້າກຳປູເຈຍລາຍງານວ່າ: ລາຄານໍ້າມັນແອັດຊັງທຳມະດາແມ່ນ 5,000 ຣຽວຕໍ່ລິດ, ນໍ້າມັນກາຊວນ 7,200 ຣຽວຕໍ່ລິດ ແລະ ແກ໊ສປີໂຕຣລຽມແຫຼວ (LPG) 3,400 ຣຽວຕໍ່ລິດ ໃນວັນທີ 29 ມີນາຜ່ານມາ. ນັບຕັ້ງແຕ່ເກີດຂໍ້ຂັດແຍ່ງໃນຕາເວັນອອກກາງ, ລາຄານໍ້າມັນແອັດຊັງທຳມະດາ, ນໍ້າມັນກາຊວນ ແລະ LPG ໃນກຳປູເຈຍໄດ້ເພີ່ມຂຶ້ນ 30%, 87% ແລະ 70% ຕາມລໍາດັບ.
ໃນວັນທີ 20 ມີນາ ຜ່ານມາ, ກະຊວງດັ່ງກ່າວໄດ້ປະກາດວ່າລັດຖະບານໄດ້ຫຼຸດພາສີນໍາເຂົ້າ ແລະ ພາສີອື່ນໆ ສຳລັບຜະລິດຕະພັນນໍ້າມັນແອັດຊັງ ແລະ ນໍ້າມັນກາຊວນ, ໂດຍມີເປົ້າໝາຍເພື່ອຫຼຸດຜ່ອນຜົນກະທົບຂອງລາຄານໍ້າມັນໂລກທີ່ເພີ່ມຂຶ້ນ ແລະ ຫຼຸດຜ່ອນພາລະຕໍ່ຜູ້ບໍລິໂພກ. ໂດຍກຳປູເຈຍອາໄສການນໍາເຂົ້າ LPG ແລະ ນໍ້າມັນກາຊວນທັງໝົດ, ເນື່ອງຈາກວ່າແຫຼ່ງນໍ້າມັນສໍາຮອງຂອງປະເທດຍັງບໍ່ທັນຖືກຂຸດຄົ້ນ.
ຄໍາເຫັນ