ສຳນັກຂ່າວສານຊິນຮວາລາຍງານໃນວັນທີ 22 ກັນຍາ ຜ່ານມາວ່າ: ກຳປູເຈຍ ໄດ້ພາສື່ມວນຊົນກຳປູເຈຍ ແລະ ສາກົນຫຼາຍສິບແຫ່ງເດີນທາງໄປທ່ຽວຊົມສູນທີ່ເຄີຍເປັນຖານການສໍ້ໂກງທາງອອນລາຍທີ່ຖືກທຳລາຍ, ລວມທັງຄາສິໂນທີ່ໃຊ້ເປັນສູນສໍ້ໂກງໃນແຂວງສະວາຍຣຽງ ແລະ ອາຄານທີ່ຢູ່ອາໄສຂອງກຸ່ມສໍ້ໂກງໃນແຂວງເປຣຍເວງ. ໃນຂະນະທີ່ກຳປູເຈຍກຳລັງກະກຽມຈັດກອງປະຊຸມສາກົນກ່ຽວກັບການຕ້ານການສໍ້ໂກງທາງອອນລາຍ ໃນລະຫວ່າງວັນທີ 23-24 ກັນຍາ ນີ້.
ໃນລະຫວ່າງການຢ້ຽມຊົມສະຖານທີ່, ມີການນຳສິ່ງຂອງທີ່ຢຶດໄດ້ຈາກທັງສອງສະຖານທີ່ມາວາງສະແດງ ເຊັ່ນ: ຄອມພິວເຕີໂນດບຸກ, ຄອມພິວເຕີຕັ້ງໂຕະ, ເຊີບເວີ, ກ້ອງວົງຈອນປິດ, ໂທລະສັບມືຖື, ຊິມກາດ, ໃບອະນຸຍາດເຮັດວຽກ, ໜັງສືຜ່ານແດນ ແລະ ເອກະສານຕ່າງໆ.
ທ່ານ ຮາຍ ມາກາຣາ ສະມາຊິກຂອງເລຂາທິການຄະນະກຳມະການຕ້ານອາຊະຍາກຳທາງອອນລາຍຂອງກຳປູເຈຍ ໄດ້ເປີດເຜີຍວ່າ: ກຳປູເຈຍໄດ້ກວດກາສະຖານທີ່ທີ່ໜ້າສົງໄສ 832 ແຫ່ງນັບຕັ້ງແຕ່ເລີ່ມການປາບປາມ, ໂດຍພົບສະຖານທີ່ຫຼາຍກວ່າ 600 ແຫ່ງທີ່ກ່ຽວຂ້ອງກັບການສໍ້ໂກງທາງອອນລາຍ. ໃນນັ້ນ 86 ແຫ່ງແມ່ນສູນການສໍ້ໂກງທາງອອນລາຍຂະໜາດໃຫຍ່ ຊຶ່ງໄດ້ຖືກທຳລາຍໝົດແລ້ວ. ແຕ່ເຕືອນວ່າກຸ່ມອາຊະຍາກຳເຫຼົ່ານີ້ໄດ້ປ່ຽນຍຸດທະສາດຂອງພວກເຂົາໄປສູ່ການດຳເນີນງານຂະໜາດນ້ອຍກວ່າ, ກະແຈກກະຈາຍຫຼາຍຂຶ້ນ, ລີ້ຊ່ອນຢູ່ໃນເຮືອນເຊົ່າ, ໂຮງແຮມ, ຫຼື ແມ່ນແຕ່ຍານພາຫະນະ.
ການດຳເນີນງານຂອງກຳປູເຈຍເພື່ອທຳລາຍເຄືອຂ່າຍອາຊະຍາກຳທາງໄຊເບີຄັ້ງໃຫຍ່ທີ່ບໍ່ເຄີຍມີມາກ່ອນ ມີຈຸດປະ ສົງເພື່ອຮັບປະກັນຄວາມປອດໄພຂອງປະຊາຊົນ ແລະ ຟື້ນຟູຊື່ສຽງໃນລະດັບສາກົນ. ໂດຍອີງຕາມຂໍ້ມູນຈາກສຳນັກງານເລຂາທິການດັ່ງກ່າວລະບຸວ່າ, ກຳປູເຈຍໄດ້ເນລະເທດຄົນຕ່າງປະເທດຫຼາຍກວ່າ 22,000 ຄົນ ຈາກ 38 ສັນຊາດ ລະຫວ່າງເດືອນກໍລະກົດ 2025 ເຖິງ ເດືອນສິງຫາ 2026 ຫຼັງຈາກພົບວ່າພວກເຂົາມີສ່ວນຮ່ວມໂດຍກົງໃນການດຳເນີນງານສໍ້ໂກງທາງອອນລາຍ.
ຄໍາເຫັນ