ບົດລາຍງານລະບຸວ່າ: ກຳປູເຈຍສ້າງລາຍຮັບຈາກການສົ່ງອອກສິນຄ້າກະສິກຳໄປຍັງ 88 ປະເທດ ແລະ ເຂດແຄວ້ນໃນໄລຍະ 9 ເດືອນຕົ້ນປີນີ້ ທັງໝົດ 3.88 ຕື້ໂດລາ. ໂດຍສິນຄ້າກະສິກຳສົ່ງອອກຕົ້ນຕໍລວມມີ: ເຂົ້າ, ຢາງພາລາ, ມັນຕົ້ນ, ໝາກມ່ວງ, ໝາກກ້ວຍ, ໝາກເຜັດ, ເມັດໝາກມ່ວງຫິມະພານ, ລຳໄຍ, ທຸລຽນ ແລະ ສາລີ.
ທັງນີ້, ກະສິກຳແມ່ນໜຶ່ງໃນ 4 ເສົາຄ້ຳທີ່ຊຸກຍູ້ການເຕີບໂຕດ້ານເສດຖະກິດຂອງກຳປູເຈຍ, ຄຽງຄູ່ກັບການສົ່ງອອກແຜ່ນແພ, ເກີບໜັງ, ສິນຄ້າເພື່ອການເດີນທາງ, ການທ່ອງທ່ຽວ, ການກໍ່ສ້າງ ແລະ ອະສັງຫາລິມະຊັບ.
ກະຊວງການຄ້າຂອງກຳປູເຈຍ ລະບຸວ່າ: ຈີນແມ່ນຕະຫຼາດຂະໜາດໃຫຍ່ສຳລັບສິນຄ້າກະສິກຳຂອງກຳປູເຈຍ. ມີການສົ່ງອອກສິນຄ້າກຳປູເຈຍຫຼາຍປະເພດ, ໂດຍສະເພາະແມ່ນສິນຄ້າກະສິກຳຄຸນນະພາບສູງເຊັ່ນ: ເຂົ້າສານ, ໝາກກ້ວຍ, ໝາກມ່ວງ, ລຳໄຍ, ໝາກເຜັດ ແລະ ໝາກທຸລຽນ ໄປຍັງຈີນພາຍໃຕ້ສິດທິພິເສດທາງອັດຕາພາສີ ແລະ ພາຍໃຕ້ສັນຍາຄູ່ຮ່ວມມືເສດຖະກິດຮອບດ້ານພາກພື້ນ (RCEP) ແລະ ສັນຍາການຄ້າເສລີກຳປູເຈຍ-ຈີນ.
ຄໍາເຫັນ