ກຳປູເຈຍ-ລາວ-ຫວຽດນາມປຶກສາຫາລືການຮ່ວມມືດ້ານເສດຖະກິດວັດທະນະທໍາ-ສັງຄົມຢູ່ສາມຫຼ່ຽມພັດທະນາ 

ກອງປະຊຸມກ່ຽວກັບວຽກງານການຮ່ວມມືດ້ານເສດຖະກິດ ແລະ ວັດທະນະທຳ-ສັງຄົມ ໄດ້ຈັດຂຶ້ນໃນວັນທີ 5 ທັນວາ ນີ້ ທີ່ນະຄອນຫຼວງວຽງຈັນ ພາຍໃຕ້ຫົວຂໍ້ “ເພີ່ມທະວີການຮ່ວມມືຂອງລັດຖະສະພາໃນການຊຸກຍູ້ການເຊື່ອມຈອດທາງດ້ານເສດຖະກິດຂອງ ກຳປູເຈຍ-ລາວ-ຫວຽດນາມ (CLV) ໄປສູ່ເປົ້າໝາຍການພັດທະນາແບບຍືນຍົງ ແລະ ກວມລວມ” ໃນນີ້ຝ່າຍລາວ ກໍໄດ້ສະເໜີແລກປ່ຽນບາງບັນຫາ ກ່ຽວກັບສະພາແຫ່ງຊາດຂອງ 3 ປະເທດ ແລະ ຂະແໜງການກ່ຽວຂ້ອງ ເພື່ອໃຫ້ວຽກງານດັ່ງກ່າວ ຢູ່ສາມຫຼ່ຽມພັດທະນາ ໃຫ້ເປັນຮູບປະທໍາ ແລະ ມີປະສິດທິຜົົນດີຂຶ້ນ.
    ກອງປະຊຸມດັ່ງກ່າວ, ເປັນຫົວຂໍ້ກອງປະຊຸມຍ່ອຍທີ 2 ຈາກຫົວຂໍ້ຫຼັກຂອງກອງປະຊຸມສຸດຍອດລັດຖະສະພາ CLV ຄັ້ງທີ 1ໂດຍການເປັນປະທານຮ່ວມຂອງ ທ່ານ ຊຽງ ວອນປະທານກຳມາທິການການເສດຖະກິດ, ການເງິນ, ການທະນາຄານ ແລະ ການກວດສອບ ສະພາແຫ່ງຊາດ ແຫ່ງ ຣາຊະອານາຈັກກໍາປູເຈຍ, ທ່ານ ຫວູ ຮວາງ ແທັງ ປະທານກຳມາທິການເສດຖະກິດສະພາແຫ່ງຊາດ ສສ ຫວຽດນາມ, ທ່ານລິນຄໍາ ດວງສະຫວັນກໍາມະການຄະນະປະຈໍາປະທານກໍາມາທິການເສດຖະກິດເຕັກໂນໂລຊີ ແລະ ສິ່ງແວດລ້ອມສະພາແຫ່ງຊາດ ແຫ່ງ ສປປ ລາວ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.
    ທ່ານ ນາງ ທຸມມາລີ ວົງພະຈັນກຳມະການຄະນະປະຈຳສະພາແຫ່ງຊາດປະທານກຳມາທິການວັດທະນະທຳ-ສັງຄົມໄດ້ຕາງໜ້າຝ່າຍລາວມີຄໍາເຫັນ ຊຶ່ງໄດ້ໃຫ້ຮູ້ວ່າ: ຄຽງຄູ່ກັບດ້ານດີ ແລະ ຜົນສຳເລັດໃນໄລຍະຜ່ານມາ ວຽກງານເສດຖະກິດ, ວັດທະນະທໍາ-ສັງຄົມຢູ່ສາມຫຼ່ຽມພັດທະນາ ກໍຍັງມີຂໍ້ຫຍຸ້ງຍາກຈໍານວນໜຶ່ງ ທີ່ພວກເຮົາຈະໄດ້ສືບຕໍ່ຮ່ວມກັນປັບປຸງແກ້ໄຂ ເປັນຕົ້ນ:1) ຂອດການປະສານງານ ລະຫວ່າງ ລັດຖະບານ 3 ປະເທດ ແລະ ສະພາແຫ່ງຊາດ,ລະຫວ່າງ ສູນກາງ ແລະ ທ້ອງຖິ່ນ ຍັງບໍ່ທັນໂລ່ງລ່ຽນ, ລະບຽບການ ແລະ ນິຕິກໍາ ໃນການຄຸ້ມຄອງການເຂົ້າ-ອອກ ຂອງປະຊາຊົນ, ພາຫະນະ ແລະ ສິນຄ້າຜ່ານແດນຍັງບໍ່ສອດຄ່ອງແລະ ກົມກຽວກັນ;2) ແຫຼ່ງທຶນ ໃນການລົງທຶນ ແລະ ການພັດທະນາໃນເຂດສາມຫຼ່ຽມພັດທະນາ ຍັງມີຈຳກັດ;3) ພື້ນຖານໂຄງລ່າງຍັງບໍ່ທັນເອື້ອອຳນວຍຄວາມສະດວກດີເທົ່າທີ່ຄວນ.ສິ່ງທີ່ກ່າວມານັ້ນ, ຍັງເປັນອຸປະສັກເຮັດໃຫ້ການຈັດຕັ້ງຜັນຂະຫຍາຍແຜນການຮ່ວມມືໃນເຂດສາມຫຼ່ຽມພັດທະນາ ຍັງບໍ່ທັນໄດ້ຮັບໝາກຜົນດີເທົ່າທີ່ຄວນ ແລະ ການຄ້າຊາຍແດນຂອງບັນດາແຂວງ ໃນເຂດສາມຫຼ່ຽມພັດທະນາ ຍັງບໍ່ທັນໄດ້ຮັບການສົ່ງເສີມເທົ່າທີ່ຄວນ.
    ເພື່ອເປັນການສ້າງພື້ນຖານ ແລະ ເງື່ອນໄຂເອື້ອອຳນວຍ ໃຫ້ແກ່ການຈັດຕັ້ງປະຕິບັດວຽກງານ
ໃນຂົງເຂດເສດຖະກິດ ແລະ ວັດທະນະທຳ-ສັງຄົມ ຢູ່ເຂດສາມຫຼ່ຽມພັດທະນາ ກຳປູເຈຍ-ລາວ-ຫວຽດນາມ ໃຫ້ເປັນຮູບປະທຳ ແລະ ມີປະສິດທິຜົນດີຂຶ້ນນັ້ນ, ຝ່າຍລາວ ກໍໄດ້ສະເໜີແລກປ່ຽນບາງບັນຫາ ດັ່ງນີ້:
ສະພາແຫ່ງຊາດ ຂອງສາມປະເທດ ພວກເຮົາ ຈະຕ້ອງໄດ້ເອົາໃຈໃສ່ສືບຕໍ່ຕິດຕາມກວດກາ ແລະ ຊຸກຍູ້ການຈັດຕັ້ງປະຕິບັດບັນດາສັນຍາ, ສົນທິສັນຍາ ແລະບັນດາຂໍ້ລິເລີ່ມດ້ານການພັດທະນາ ທີ່ລັດຖະບານທັງສາມປະເທດ ໄດ້ລົງນາມຮ່ວມກັນຢ່າງແຂງແຮງ;ຮ່ວມກັນເກັບກຳບັນຫາ, ຂໍ້ຫຍຸ້ງຍາກ ແລະ ຄຳສະເໜີ ຂອງປະຊາຊົນ ເພື່ອນຳສະເໜີຕໍ່ລັດຖະບານຂອງສາມປະເທດ ນຳໄປຄົ້ນຄວ້າ ພິຈາລະນາແກ້ໄຂ ແລະ ຈັດຕັ້ງປະຕິບັດ;ສົ່ງເສີມ, ສ້າງກິດຈະກໍາຮ່ວມກັນ ເປັນຕົ້ນການແລກປ່ຽນຂໍ້ມູນ-ຂ່າວສານ, ການຈັດຕະຫຼາດວາງສະແດງສິນຄ້າ, ແລກປ່ຽນກິດຈະກໍາທາງດ້ານສີລະປະ, ກິລາ ແລະ ອື່ນໆ ເພື່ອຮັດແໜ້ນສາຍພົວພັນຮ່ວມມື, ຄວາມສາມັກຄີ ຮັກແພງ ທີ່ມີມູນເຊື້ອ ລະຫວ່າງ ປະຊາຊົນດ້ວຍກັນ ໂດຍສະເພາະ ຄົນຮຸ່ນໜຸ່ມ ຢູ່ໃນເຂດສາມຫຼ່ຽມພັດທະນາ;ຊຸກຍູ້ ໃຫ້ມີການສົ່ງເສີມ ແລະ ການແລກປ່ຽນ ຄວາມຮູ້, ປະສົບການ, ເຕັກນິກວິຊາການ,ຊ່ຽວຊານສະເພາະດ້ານ, ການສຶກສາ ແລະ ການຝຶກອົບຮົມເຕັກນິກວິຊາຊີບ, ວິທະຍາສາດ-ເຕັກໂນໂລຊີ ແລະ ນະວັດຕະກຳໃໝ່ ໃນຂົງເຂດທີ່ກ່ຽວຂ້ອງ ລະຫວ່າງ ແຂວງ ໃນເຂດສາມຫຼ່ຽມພັດທະນາ.
ພ້ອມນີ້, ກໍໄດ້ສະເໜີໃຫ້ຂະແໜງການກ່ຽວຂ້ອງ ຂອງລັດຖະບານສາມປະເທດສືບຕໍ່ເພີ່ມທະວີການຊຸກຍູ້, ສົ່ງເສີມ ແລະ ດຶງດູດນັກລົງທຶນທັງພາຍໃນ ແລະ ຕ່າງປະເທດ ໃຫ້ເຂົ້າມາລົງທຶນ ໃນເຂດສາມຫຼ່ຽມພັດທະນາ ເພື່ອເປັນການຂະຫຍາຍ ການຜະລິດ ແລະການບໍລິການ, ສົ່ງເສີມເສດຖະກິດ, ການຄ້າ-ການລົງທຶນ, ການສຶກສາ, ສາທາລະນະສຸກ,ການທ່ອງທ່ຽວ ແລະ ຂະແໜງການອື່ນໆ ທີ່ມີທ່າແຮງຮ່ວມກັນ, ພ້ອມດຽວກັນນັ້ນ ກໍໃຫ້ເຊື່ອມສານເປົ້າໝາຍຂອງແຜນແມ່ບົດ ແລະ ແຜນປະຕິບັດງານ ເຂດສາມຫຼ່ຽມພັດທະນາເຂົ້າໃນແຜນພັດທະນາເສດຖະກິດ-ສັງຄົມ ແລະ ຈັດສັນງົບປະມານຂອງລັດເຂົ້າໃນການພັດທະນາເຂດດັ່ງກ່າວ;ພັດທະນາໂຄງລ່າງພື້ນຖານ, ການຄົມມະນາຄົມ, ຕະຫຼາດຊຸມຊົມ ແລະ ການສະໜັບສະໜູນ ສິ່ງອຳນວຍຄວາມສະດວກອື່ນໆ ຕາມບໍລິເວນຊາຍແດນ ຂອງສາມປະເທດ ເປັນຕົ້ນການປັບປຸງ ແລະ ຍົກລະດັບດ່ານສາກົນ ເພື່ອອຳນວຍຄວາມສະດວກໃນການຂົນສົ່ງສິນຄ້າຜ່ານແດນ ແລະ ການໄປມາຫາສູ່ຂອງປະຊາຊົນ;ຊຸກຍູ້ການປົກປັກຮັກສາ ຊັບພະຍາກອນທໍາມະຊາດ, ລະບົບນິເວດທຳມະຊາດ ແລະ ຊີວະນາໆພັນທາງທຳມະຊາດ ພ້ອມທັງຊຸກຍູ້ການພັດທະນາ, ນໍາໃຊ້ແບບຍືນຍົງ ແລະ ຮັບປະກັນປະສິດທິຜົນສູງສຸດ ພາຍໃນແຂວງ ຂອງເຂດສາມຫຼ່ຽມພັດທະນາ.
(ຂ່າວ: ສຸກສະຫວັນ, ພາບ: ເກດສະໜາ)