 |
ປັດຈຸບັນ, ການຄ້າການບໍລິການໄດ້ກາຍເປັນແຮງຂັບເຄື່ອນທີ່ສໍາຄັນຕໍ່ການເຕີບໂຕຂອງເສດຖະກິດໂລກ ຊຶ່ງມູນຄ່າເພີ່ມຂອງອຸດສາຫະກໍາການບໍລິການໂລກກວມເອົາຍອດປະລິມານເສດຖະກິດໂລກປະມານ 65% ແລະ ກວມເອົາຍອດມູນຄ່າການຄ້າຫຼາຍກວ່າ 25%. ຈີນເປັນປະເທດໃຫຍ່ອັນດັບ 2 ດ້ານການຄ້າການບໍລິການຂອງໂລກ. ໃນ 7 ເດືອນຕົ້ນປີນີ້, ຍອດມູນຄ່າການນໍາເຂົ້າ-ສົ່ງອອກດ້ານການບໍລິການຂອງຈີນເພີ່ມຂຶ້ນ 8.3% ເມື່ອທຽບໃສ່ໄລຍະດຽວກັນຂອງປີ 2025, ໃນນັ້ນ, ການບໍລິການແບບລວມສູນຄວາມຮູ້ກວມເອົາ 53.5%. ງານມະຫະກຳການຄ້າການບໍລິການຄັ້ງນີ້ຈັດໃຫ້ມີເຂດວາງສະແດງກໍລະນີສຶກສາ “ການບໍລິການຂອງຈີນ” ເປັນເທື່ອທໍາອິດ. ໃນນັ້ນ, ການບໍລິການສໍາຄັນຂອງຈີນເປັນຕົ້ນແມ່ນປັນຍາປະດິດ, ແບບຈໍາລອງຂະໜາດໃຫຍ່ ແລະ ຕົວຊ່ວຍອັດສະລິຍະກວມເອົາປະມານ 40% ຊຶ່ງສະແດງໃຫ້ເຫັນເຖິງຄວາມສາມາດດ້ານການປະດິດສ້າງໃໝ່ທີ່ເຂັ້ມແຂງຂອງຈີນ. ສິ່ງນີ້ຖືເປັນການສະໜອງແຮງຂັບເຄື່ອນໃໝ່ໃຫ້ແກ່ວິສາຫະກິດຕ່າງປະເທດເຂົ້າມາສ້າງຕັ້ງສູນຄົ້ນຄວ້າ ແລະ ພັດທະນາ ກໍຄືບັນລຸການພັດທະນາແບບປະດິດສ້າງໃໝ່ຢູ່ຈີນ.
ວິສາຫະກິດຂ້າມຊາດມີຄວາມຮັບຮູ້ດີຕໍ່ເລື່ອງນີ້. ຜູ້ບໍລິຫານລະດັບສູງຈາກວິສາຫະກິດຕ່າງປະເທດຫຼາຍແຫ່ງໃຫ້ຮູ້ວ່າ: ຄວາມຕ້ອງການຂອງຜູ້ບໍລິໂພກຈີນທີ່ມີຕໍ່ຜະລິດຕະພັນ ແລະ ການບໍລິການທີ່ມີຄຸນນະພາບດີກວ່າເກົ່າ, ບວກກັບຈໍານວນການສະສົມຜູ້ມີຄວາມຮູ້ຄວາມສາມາດດ້ານການປະດິດສ້າງໃໝ່ ແລະ ການສ້າງສະພາບແວດລ້ອມການປະດິດສ້າງໃໝ່ຂອງຈີນ ຈະນໍາເອົາໂອກາດການພັດທະນາທີ່ດີກວ່າເກົ່າມາໃຫ້ແກ່ວິສາຫະກິດຕົນ. ພ້ອມດຽວກັນນີ້, ການບໍລິການຂອງຈີນພວມເລັ່ງບາດກ້າວ “ອອກໄປຕ່າງປະເທດ” ຊຶ່ງໃນງານມະຫະກໍາຄັ້ງນີ້ໄດ້ຈັດໃຫ້ມີ “ເຂດໂຄສະນາສົ່ງເສີມການບໍລິການຂອງຈີນເພື່ອອອກໄປຕ່າງປະເທດ” ເປັນເທື່ອທໍາອິດ ເພື່ອຊ່ວຍໃຫ້ວິສາຫະກິດຈີນຂະຫຍາຍຕະຫຼາດໃນສາກົນ ແລະ ບັນລຸການຮ່ວມມືແບບຕ່າງຝ່າຍຕ່າງໄດ້ຮັບຜົນປະໂຫຍດ.
ໃນ 5 ປີຂ້າງໜ້າ, ຈີນຈະເປີດກວ້າງການອະນຸຍາດເຂົ້າເຖິງຕະຫຼາດ ແລະ ຂົງເຂດການເປີດປະຕູທີ່ຖືເອົາອຸດສາຫະກໍາການຄ້າການບໍລິການເປັນຈຸດສຸມ. ເມື່ອຮອດປີ 2030, ມູນຄ່າອຸດສາຫະກໍາການບໍລິການຂອງຈີນຈະຂຶ້ນສູ່ລະດັບ 1 ແສນຕື້ຢວນ ແລະ ຈະບໍາລຸງສ້າງຍີ່ຫໍ້ “ການບໍລິການຂອງຈີນ” ຫຼາຍກວ່າເກົ່າ. ສິ່ງນີ້ຈະປຸກລະດົມຄວາມມີຊີວິດຊີວາໃໝ່ດ້ານການຄ້າທົ່ວໂລກ ແລະ ເຮັດໃຫ້ທົ່ວໂລກຮ່ວມກັນຊົມໃຊ້ຜົນປະໂຫຍດນໍາກັນ. ຄືດັ່ງຄໍາເວົ້າຂອງເຈົ້າໜ້າທີ່ກອງປະຊຸມສະຫະປະຊາຊາດວ່າດ້ວຍການຄ້າ ແລະ ການພັດທະນາໄດ້ຍົກໃຫ້ເຫັນວ່າ: ຈີນພວມສ້າງໂອກາດທາງທຸລະກິດໃຫ້ແກ່ປະເທດ ແລະ ວິສາຫະກິດຕ່າງໆຂອງໂລກ.
ບົກໂດຍ: ວິທະຍຸ, ໂທລະພາບສູນກາງຈີນ (CMG)
ຄໍາເຫັນ