ພາບພົດຂອງລາວທີ່ເປັນຄົນສາມາດບຸກທະລຸສິ່ງກີດຂວາງ ຫຼື ຄວາມຫຍຸ້ງຍາກໃນຊີວິດຢ່າງກ້າຫານນັ້ນໄດ້ເຂົ້າເຖິງຈິດໃຈຜູ້ຊົມຢ່າງເລິກເຊິ່ງ. ເມື່ອພວກເຮົາຫັນສາຍຕາຈາກເທບນິຍາຍໄປສູ່ການຮ່ວມມືລາວ-ຈີນກໍຈະໄດ້ເຫັນວ່າສອງເລື່ອງນີ້ມີສິ່ງຄ້າຍຄືກັນຢ່າງໜ້າອັດສະຈັນ.
ໃນຮູບເງົາເລື່ອງ “ນາຈາ 2”, ຄຳເວົ້າ “ຖ້າຢູ່ຕໍ່ໜ້າບໍ່ມີທາງອອກ, ຂ້ອຍຈະຢຽບເສັ້ນທາງໃໝ່ອອກມາ” ໄດ້ເຮັດໃຫ້ຜູ້ຂຽນປະທັບໃຈທີ່ສຸດ. ການສ້າງສຳເລັດແລະເປີດນຳໃຊ້ທາງລົດໄຟລາວ-ຈີນໄດ້ສ່ອງແສງເຖິງຈິດໃຈທາດແທ້ຂອງຄໍາເວົ້ານີ້. ປະເທດລາວຕັ້ງຢູ່ອາຊີຕາເວັນອອກສ່ຽງໃຕ້, ການພັດທະນາເສດຖະກິດ ຂອງປະເທດໃນສະໄໝກ່ອນແມ່ນຖືກຈຳກັດ ຍ້ອນຄວາມຫຍຸ້ງຍາກດ້ານຄົມມະນາຄົມ. ພາຍຫຼັງມາ, ສອງປະເທດຈີນ-ລາວໄດ້ເຊື່ອມໂຍງຍຸດທະສາດການພັດທະນາຢ່າງຕັ້ງໜ້າ, ຂໍ້ລິເລີ່ມ“ໜຶ່ງແລວໜຶ່ງເສັ້ນທາງ” ຂອງຈີນໄດ້ເຊື່ອມສານກັບຍຸດທະສາດ “ການຫັນຈາກປະເທດທີ່ບໍ່ມີທາງອອກສູ່ທະເລໃຫ້ກາຍເປັນປະເທດເຊື່ອມໂຍງ-ເຊື່ອມຈອດກັບປະເທດອ້ອມຂ້າງ ແລະ ພາກພື້ນ” ຂອງລາວຊຶ່ງໄດ້ຫັນປ່ຽນສະພາບຄວາມຫຍຸ້ງຍາກດ້ານຄົມມະນາຄົມຂອງປະເທດລາວ. ທາງລົດໄຟສາຍນີ້ເປັນ “ເສັ້ນທາງເງິນເສັ້ນທາງຄໍາ” ທີ່ເຊື່ອມຕໍ່ປະເທດລາວກັບໂລກ. ນັບແຕ່ເປີດນຳໃຊ້ເສັ້ນທາງລົດໄຟລາວ-ຈີນ ເປັນຕົ້ນມາ, ໄດ້ຂົນສົ່ງຜູ້ໂດຍສານຫຼາຍກວ່າ 48 ລ້ານເທື່ອຄົນ, ຂົນສົ່ງສິນຄ້າຫຼາຍກວ່າ 54 ລ້ານໂຕນຊຶ່ງນອກຈາກໄດ້ຊ່ວຍຊຸກຍູ້ການໄປມາຫາສູ່ກັນລະຫວ່າງປະຊາຊົນສອງຊາດ ແລະ ການຄ້າເທົ່ານັ້ນ,ຫາກຍັງໄດ້ເພີ່ມພະລັງຂັບເຄື່ອນທີ່ແຂງແຮງຕໍ່ການພັດທະນາເສດຖະກິດແລະ ການປັບປຸງຊີວິດການເປັນຢູ່ຂອງປະຊາຊົນ, ລວມເຖິງຄວາມກ້າວໜ້າຂອງສັງຄົມລາວ ຕື່ມອີກ.
ຄຳວ່າ “ຊາຕາຊີວິດຂອງເຮົາ ເຮົາເປັນຜູ້ກຳນົດ ບໍ່ແມ່ນຟ້າລິຂິດ” ຂອງນາຈາໄດ້ສ່ອງແສງເຖິງຈິດໃຈທີ່ບຸກບືນສູ້ຊົນຢ່າງເປັນເຈົ້າການ, ຈິດໃຈແບບນີ້ກໍໄດ້ສ່ອງແສງໃຫ້ເຫັນໃນຂະບວນການຮ່ວມມືລະຫວ່າງຈີນ-ລາວເຊັ່ນດຽວກັນ. ໃນການຮ່ວມມືຈີນ-ລາວ,ຈີນໄດ້ປະຕິບັດຕາມແນວຄິດທີ່ “ສອນວິທີຫາປາ ດີກວ່າການໃຫ້ປາ” ໂດຍສຸມໃສ່ການຊ່ວຍເຫຼືອປະເທດລາວຍົກລະດັບຄວາມສາມາດໃນການພັດທະນາຢ່າງເປັນເຈົ້າການ. ຕົວຢ່າງ: ໂຄງການຕົວແບບການຮ່ວມມືດ້ານການຫຼຸດຜ່ອນຄວາມທຸກຍາກໄດ້ຈັດຕັ້ງບຸກຄົນທີ່ກ່ຽວຂ້ອງຂອງລາວມາເຂົ້າຮ່ວມຊຸດຝຶກອົບຮົມຢູ່ຈີນ ໂດຍອົບຮົມການຄຸ້ມຄອງໂຄງການຈໍານວນຫຼາຍຮ້ອຍເທື່ອຄົນ,ໄດ້ບຳລຸງສ້າງແລະຫຼໍ່ຫຼອມຜູ້ທີ່ມີຄວາມຮູ້ຄວາມສາມາດດ້ານການຄຸ້ມຄອງໂຄງການ ແລະ ມີແນວຄິດທັນສະໄໝດ້ານການຫຼຸດຜ່ອນຄວາມທຸກຍາກໃຫ້ແກ່ປະເທດລາວ; ວິທະຍາໄລເຕັກນິກ-ວິຊາຊີບ ການລົດໄຟທີ່ຈີນຊ່ວຍເຫຼືອ ນອກຈາກເປັນວິທະຍາໄລເຕັກນິກ-ວິຊາຊີບ ການລົດໄຟ ແຫ່ງທໍາອິດຢູ່ລາວ ຍັງເປັນວິທະຍາໄລເຕັກນິກ-ວິຊາຊີບການລົດໄຟແຫ່ງທຳອິດຢູ່ປະເທດອາຊີຕາເວັນອອກສ່ຽງໃຕ້ຊຶ່ງໄດ້ຊ່ວຍແກ້ໄຂບັນຫາທີ່ລາວບໍ່ມີໂຮງຮຽນອາຊີວະສຶກສາກ່ຽວກັບການລົດໄຟໃນເມື່ອກ່ອນ, ໄດ້ຊຸກຍູ້ການບຳລຸງສ້າງນັກວິຊາການກ່ຽວກັບທາງລົດໄຟຂອງລາວເປັນຈໍານວນຫຼາຍ; ໂຄງການກໍ່ສ້າງອາຄານ ໂຮງໝໍມະໂຫສົດຫຼັງໃໝ່ທີ່ຈີນຊ່ວຍເຫຼືອລາວໄດ້ຊ່ວຍອົບຮົມບຸກຄະລາກອນທາງການແພດໃຫ້ແກ່ລາວຢ່າງຕໍ່ເນື່ອງ. ຜູ້ມີຄວາມຮູ້ຄວາມສາມາດເຫຼົ່ານີ້ໄດ້ກາຍເປັນກຳລັງສຳຄັນໃນການຊຸກຍູ້ຄວາມກ້າວໜ້າຂອງສັງຄົມລາວ, ທັງປະກອບສ່ວນທາງດ້ານສະຕິປັນຍາແລະກຳລັງແຮງເຂົ້າໃນການສ້າງຄວາມທັນສະໄໝຂອງລາວ.
ລໍ້ໄຟທີ່ນາຈາຢຽບລອຍກໍເປັນສັນຍະລັກແຫ່ງຄວາມໄວແລະກຳລັງແຮງ, ປັດຈຸບັນນີ້ການປະດິດສ້າງໃໝ່ດ້ານວິທະຍາສາດເຕັກນິກ ໄດ້ມີບົດບາດສໍາຄັນໃນການຊ່ວຍຂັບເຄື່ອນການພັດທະນາເສດຖະກິດນັບມື້ນັບພົ້ນເດັ່ນຂຶ້ນ. ໃນຊຸມປີມໍ່ໆມານີ້,ໃນຂົງເຂດສໍາຄັນຕົ້ນຕໍເຊັ່ນ: ເສດຖະກິດດີຈີຕອນ,ປັນຍາປະດິດ,ການສື່ສານດ້ວຍເຕັກນິກລະບົບ 5G ແລະອື່ນໆ, ຈີນແລະລາວກໍໄດ້ດຳເນີນການຮ່ວມມືຢ່າງຕັ້ງໜ້າ. ຫວ່າງບໍ່ດົນມານີ້, ຈີນແລະລາວໄດ້ເຊັນສັນຍາຢູ່ນະຄອນຫຼວງວຽງຈັນໂດຍຈະຮ່ວມກັນສ້າງສູນການຮ່ວມມືປະດິດສ້າງໃໝ່ດ້ານປັນຍາປະດິດລາວ-ຈີນ. ໂຄງການຮ່ວມມືນີ້ຈະສຸມໃສ່ດ້ານກະສິກຳແບບອັດສະລິຍະ, ການຄົມມະນາຄົມແບບອັດສະລິຍະແລະຂົງເຂດອື່ນໆ, ນຳໃຊ້ເຕັກນິກປັນຍາປະດິດເພື່ອຍົກສູງກຳລັງແຂ່ງຂັນດ້ານອຸດສາຫະກຳຂອງລາວ. ການຮ່ວມມືໃນການປະດິດສ້າງໃໝ່ດ້ານວິທະຍາສາດເຕັກນິກຄືແນວນີ້ຄ້າຍຄືກັບລໍ້ໄຟຂອງນາຈາຊຶ່ງຈະເປັນການເພີ່ມພະລັງຂັບເຄື່ອນທີ່ເຂັ້ມແຂງເຂົ້າໃນການພັດທະນາຂອງລາວໃນອະນາຄົດ ແລະບຸກເບີກພື້ນທີ່ອັນກວ້າງຂວາງບົນເສັ້ນທາງການພັດທະນາໃໝ່.
ເມື່ອບໍ່ດົນມານີ້, ໃນກອງປະຊຸມຖະແຫຼງຂ່າວຂອງກອງປະຊຸມຄັ້ງທີ 3 ຂອງສະພາປະຊາຊົນແຫ່ງຊາດຈີນຊຸດທີ 14, ທ່ານຫວາງຢີ້ກຳມະການກົມການເມືອງສູນກາງພັກກອມມູນິດຈີນລັດຖະມົນຕີກະຊວງການຕ່າງປະເທດຈີນກ່າວວ່າ, ໂລກປັດຈຸບັນມີການປ່ຽນແປງຢ່າງສັບສົນ, ເຂດໂລກໃຕ້ໄດ້ຮັບການພັດທະນາແຂງແຮງຂຶ້ນຖືເປັນຂີດໝາຍທີ່ພົ້ນເດັ່ນທີ່ສຸດໃນຍຸກນີ້. ເຂດໂລກໃຕ້ໃນປັດຈຸບັນນີ້ມີຍອດມູນຄ່າເສດຖະກິດກວມເອົາຫຼາຍກວ່າ 40% ຂອງໂລກ, ອັດຕາການປະກອບສ່ວນຕໍ່ການເຕີບໂຕຂອງເສດຖະກິດໂລກມີຫຼາຍກວ່າ 80% ຊຶ່ງໄດ້ກາຍເປັນກ້ອນກຳລັງສຳຄັນໃນການປົກປັກຮັກສາສັນຕິພາບ, ຊຸກຍູ້ການພັດທະນາ ແລະປັບປຸງການບໍລິຫານຂອງໂລກ. ຈ້ອງມອງອະນາຄົດ, ຖ້າຢາກເຮັດໃຫ້ໂລກມີຄວາມໝັ້ນຄົງແລະພັດທະນາດີຂຶ້ນ, ເຂດໂລກໃຕ້ແມ່ນເປັນຂໍກະແຈທີ່ສຳຄັນ. ເຂດໂລກໃຕ້ຄວນສ້າງຄວາມເຂັ້ມແຂງດ້ວຍຕົນເອງ,ສາມັກຄີກັນແລະພັດທະນາຮ່ວມກັນ.
ການຮ່ວມມືຈີນ-ລາວໄດ້ສ່ອງແສງເຖິງການຮ່ວມມືກັນກ້າວເດີນໄປຂ້າງໜ້າແລະການພັດທະນາຮ່ວມກັນລະຫວ່າງປະເທດສະມາຊິກເຂດໂລກໃຕ້. ເຊື່ອວ່າໃນອະນາຄົດສອງປະເທດຈີນ-ລາວຈະສືບຕໍ່ສົ່ງເສີມຈິດໃຈແລະຄວາມກ້າຫານແຫ່ງການບຸກເບີກທີ່ຄ້າຍຄືກັບ “ນາຈາ”, ລົງເລິກການຮ່ວມມືຢ່າງບໍ່ຢຸດຢັ້ງ, ນຳເອົາຜົນປະໂຫຍດຕົວຈິງມາໃຫ້ແກ່ປະຊາຊົນສອງຊາດຈີນ-ລາວ ນັບມື້ຫຼາຍຂຶ້ນກວ່າເກົ່າ, ສ້າງໄດ້ແບບຢ່າງທີ່ດີໃຫ້ແກ່ປະເທດສະມາຊິກໃນເຂດໂລກໃຕ້ ແລະປະກອບສ່ວນສໍາຄັນເຂົ້າໃນການຊຸກຍູ້ການສ້າງປະຊາຄົມຮ່ວມຊາຕາກຳຂອງມວນມະນຸດ.
ໂດຍ: ຊີອາໄອ
ລາວ-ໄທ ເພີ່ມທະວີການຮ່ວມມືຕ້ານອາຊະຍາກຳໄຊເບີຂ້າມຊາດ
ກອງປະຊຸມວຽກງານໄອຍະການໄທ-ລາວ ຄັ້ງທີ II ວ່າດ້ວຍການຮ່ວມມືຕ້ານອາດຊະຍາກຳຂ້າມຊາດ ພາຍໃຕ້ຫົວຂໍ້: “ການຮ່ວມມືໄອຍະການລາວ-ໄທ ໃນການຕ້ານອາຊະຍາກຳໄຊເບີ” ຈັດຂຶ້ນໃນວັນທີ 12-13 ມີນາ ນີ້ ທີ່ໂຮງແຮມພູລແມນ ຂອນແກ່ນ ຣາຊາ ອໍຄິດ ຈັງຫວັດຂອນແກ່ນ ຣາຊະອານາຈັກໄທ ໂດຍພາຍໃຕ້ການເປັນປະທານຮ່ວມຂອງທ່ານ ຄຳເພັດ ສົມວໍລະຈິດ ຮອງຫົວໜ້າອົງການໄອຍະການປະຊາຊົນສູງສຸດ ແຫ່ງ ສປປ ລາວ, ທ່ານ ມົງຄຸນ ຈິຣະໄຊສະກຸນ ຮອງໄອຍະການສູງສຸດ ແຫ່ງຣາຊະອານາຈັກໄທ, ທ່ານ ຈູມພົນ ພັນສຳລິດ ໄອຍະການອາວຸໂສ ທີ່ປຶກສາຂອງໄອຍະການສູງສຸດ ແຫ່ງຣາຊະອານາຈັກໄທ, ທ່ານ ລີຊາດ ຟີລິບປາ ປະທານສະຖາບັນຊ່ວຍເຫຼືອທາງດ້ານກົດໝາຍ ແລະ ວິຊາການແຫ່ງຣາຊະອານາຈັກລຸກຊໍາບວກ, ທ່ານ ແຄັດເຊັນເດຍ ເລເນເວຍ ອຸປະທູດ ແຫ່ງຣາຊະອານາຈັກ ລຸກຊຳບວກ ປະຈຳຣາຊະອານາຈັກໄທ ແລະ ທ່ານ ສົມສັກ ວິໄລທອນ ກົງສູນໃຫຍ່ ແຫ່ງ ສປປ ລາວ ປະຈຳຈັງຫວັດຂອນແກ່ນ, ມີບັນດາທ່ານຄະນະຜູ້ແທນຂັ້ນສູງ ອົງການໄອຍະການປະຊາຊົນສູງສຸດແຫ່ງ ສປປ ລາວ, ອົງການໄອຍະການສູງສຸດ ແຫ່ງຣາຊະອານາຈັກໄທ, ອົງການໄອຍະການພາກ 4 (ຈັງຫວັດຂອນແກ່ນ) ຫົວໜ້າອົງການໄອຍະການປະຊາຊົນບັນດາແຂວງ ທີ່ມີຊາຍແດນຕິດຈອດກັນ ລະຫວ່າງ ສປປ ລາວ - ຣາຊະອານາຈັກໄທ, ຊ່ຽວຊານຈາກອົງການ UNODC ພ້ອມດ້ວຍພະນັກງານໄອຍະການສອງຝ່າຍເຂົ້າຮ່ວມ.
ຄໍາເຫັນ