ຊາວໜຸ່ມຫຼາຍແຂວງຮ່ວມແລກປ່ຽນບົດຮຽນ ພາຍໃຕ້ຫົວຂໍ້: “ມໍຣະດົກລາວ ເພື່ອມໍຣະດົກໂລກ”

ທ່ານ ວົງດາວອນ ວົງໄຊຍະລາດ ກ່າວວ່າ: ການຈັດງານແລກປ່ຽນກິດຈະກໍາຄັ້ງນີ້ ເປັນໜຶ່ງໃນກິດຈະກໍາ ເພື່ອສະເຫຼີມສະຫຼອງຫຼວງພະບາງ ເຂົ້າເປັນເມືອງມໍລະດົກໂລກ ຄົບຮອບ 30 ປີ ແລະເປັນກິດຈະກໍາ ສ້າງຄວາມເຂັ້ມແຂງໃຫ້ແກ່ວິຊາການໜຸ່ມ ຜູ້ທີ່ເຮັດວຽກປົກປັກຮັກສາມໍຣະດົກໂລກຢູ່ໃນປະເທດລາວ, ຊຶ່ງເປັນງານແລກປ່ຽນທີ່ມີຄວາມສໍາຄັນຫຼາຍ ເພາະຜູ້ເຂົ້າຮ່ວມຈະໄດ້ຮັບຟັງການນໍາສະເໜີບົດຮຽນ, ປະສົບການໃນການອານຸລັກ, ຄຸ້ມຄອງມໍຣະດົກ ທາງດ້ານວັດທະນະທຳ ແລະທຳມະຊາດ ທີ່ເປັນສະຖານທີ່ມໍຣະດົກໂລກ ຢູ່ໃນລາວ.ນອກຈາກນີ້, ຈະໄດ້ມີການສົນທະນາແລກປ່ຽນ ຈາກຜູ້ຊ່ຽວຊານທີ່ເຮັດວຽກໃນການຄຸ້ມຄອງຕົວຈີງ, ເພື່ອຍົກສູງຄວາມຮູ້, ຄວາມສາມາດ ໃຫ້ວິຊາການໜຸ່ມທີ່ໄດ້ເຂົ້າຮ່ວມ ໄດ້ມີບົດຮຽນ ເພື່ອນໍາໄປໝູນໃຊ້ຢູ່ໃນແຫຼ່ງມໍຣະດົກໂລກຂອງຕົນ. ນອກຈາກງານສໍາມະນາແລກປ່ຽນແລ້ວ ວິຊາການໜຸ່ມແລ້ວຍັງໄດ້ໄປຢ້ຽມຊົມບັນດາໂຄງການຕົວແບບ ໃນການອະນຸລັກທາງດ້ານວັດທະນະທຳ, ທຳມະຊາດ ແລະໂຄງການກໍ່ສ້າງໃນເຂດທໍາມະຊາດເຊັ່ນ: ວັດຊຽງທອງ, ວັດຄີລີ, ເຮືອນຈັນບ້ານຊຽງມ່ວນ, ໂຄງການກໍ່ສ້າງພັດທະນາແຄມນໍ້າຂອງ, ນໍ້າຄານ ແລະໂຄງການປັບປຸງໜອງນໍ້າອະນຸລັກເບີ 64-66.

(ພາບ-ຂ່າວ: ດາວອນ ມະນີວັນ)