ການປະກາດດັ່ງກ່າວມີຂຶ້ນທີ່ງານ Singapore Airshow 2026 ຊຶ່ງລວມມີຂໍ້ຕົກລົງດ້ານເຄື່ອງຈັກເຮືອບິນ ແລະ ການເງິນທີ່ມີມູນຄ່າລວມກວ່າ 6.1 ຕື້ໂດລາ. ນີ້ແມ່ນການຢືນຢັນເຖິງຄວາມມຸ່ງໝັ້ນຂອງ Vietjet ໃນການສ້າງການດໍາເນີນງານດ້ານການບິນທີ່ທັນສະໄໝ, ມີປະສິດທິພາບ ແລະ ສາມາດຂະຫຍາຍຕົວໄດ້ ເພື່ອຮອງຮັບຄວາມຕ້ອງການໃນການເດີນທາງທີ່ເພີ່ມຂຶ້ນລະຫວ່າງ ຫວຽດນາມ, ລາວ ແລະ ພາກພື້ນອາຊີ-ປາຊີຟິກ. ປັດຈຸບັນ, ສາຍການບິນໄດ້ມອບຄວາມສະດວກສະບາຍໃຫ້ແກ່ນັກເດີນທາງຊາວລາວ ໃນການເຊື່ອມຕໍ່ໄປຫາ ຫວຽດນາມ ແລະ ປະເທດອື່ນໆ ຜ່ານເສັ້ນທາງບິນ ນະຄອນຫຼວງວຽງຈັນ ຫາ ນະຄອນໂຮ່ຈິມິນ ແລະ ນະຄອນຫຼວງຮ່າໂນ້ຍ.
ສູນກາງການເງິນສາກົນຫວຽດນາມ ໃນນະຄອນໂຮ່ຈິມິນ (VIFC-HCM) ໄດ້ເປີດຕົວ ສູນກາງການເງິນການບິນອາຊີ-ປາຊີຟິກ (AAFH) ເພື່ອສະໜັບສະໜູນດ້ານການເງິນການບິນ, ການເຊົ່າຊື້ ແລະ ການລົງທຶນໃນໂຄງລ່າງພື້ນຖານທົ່ວພາກພື້ນ. ໂດຍມີ Vietjetເປັນຄູ່ຮ່ວມງານທີ່ສຳຄັນ. ຂໍ້ລິເລີ່ມນີ້ໄດ້ຮັບການສະໜັບສະໜູນຈາກທຸລະກິດການບິນ ແລະ ກິດຈະກຳທາງການເງິນໃນໄລຍະເລີ່ມຕົ້ນ ມູນຄ່າກວ່າ 6.1 ຕື້ໂດລາ ນຳໂດຍ Vietjet ແລະ ຄູ່ຮ່ວມງານ. ລວມມີຂໍ້ຕົກລົງດ້ານເຄື່ອງຈັກ ແລະ ການບໍລິການບຳລຸງຮັກສາກັບ Pratt & Whitney ແລະ ຂໍ້ຕົກລົງດ້ານການເງິນເຮືອບິນກັບ PIMCO ຊຶ່ງເປັນບໍລິສັດຈັດການຊັບສິນລະດັບໂລກຈາກສະຫະລັດ ອາເມຣິກາ. ສູນກາງນີ້ຄາດວ່າຈະຊ່ວຍອຳນວຍຄວາມສະດວກໃຫ້ແກ່ມູນຄ່າການຊື້-ຂາຍດ້ານການບິນໄດ້ປະມານ 50 ຕື້ໂດລາ ພາຍໃນປີ 2035.
ການປະກາດດັ່ງກ່າວ ມີບັນດາຜູ້ຜະລິດເຮືອບິນ ແລະ ເຄື່ອງຈັກຊັ້ນນຳຂອງໂລກ ພ້ອມດ້ວຍສະຖາບັນການເງິນເຂົ້າຮ່ວມ ຊຶ່ງລວມມີ Airbus, Boeing, CFM International, Pratt & Whitney, Rolls-Royce ແລະ ສະມາຄົມຂົນສົ່ງທາງອາກາດລະຫວ່າງປະເທດ (IATA).
AAFH ມີເປົ້າໝາຍເພື່ອສະໜັບສະໜູນການບິນໃນພາກພື້ນ ໂດຍຜ່ານນະໂຍບາຍສິດທິພິເສດສະເພາະດ້ານ, ຂອບກົດໝາຍມາດຕະຖານສາກົນ ແລະ ກົນໄກການລະດົມທຶນຂ້າມແດນແບບຫຼາຍສະກຸນເງິນ.
ທ່ານ ເຈືອງ ມິງ ຮຸຍ ວູ (Mr. Truong Minh Huy Vu) ປະທານສະພາບໍລິຫານ VIFC-HCM ກ່າວວ່າ: “ການນຳສະເໜີ ສູນກາງການເງິນການບິນ ອາຊີ-ປາຊີຟິກ ຖືເປັນບາດກ້າວທີ່ສຳຄັນໃນການເຮັດໃຫ້ວິໄສທັດຂອງພວກເຮົາ ໃນການສ້າງ VIFC ໃຫ້ກາຍເປັນເວທີການເງິນສາກົນທີ່ທັນສະໄໝ, ເປີດກວ້າງ ແລະ ເປັນທີ່ໜ້າເຊື່ອຖືໃຫ້ປະກົດຜົນເປັນຈິງ. ພວກເຮົາບໍ່ພຽງແຕ່ດຶງດູດນັກລົງທຶນໂດຍຜ່ານນະໂຍບາຍສິດທິພິເສດຕ່າງໆເທົ່ານັ້ນ, ແຕ່ຍັງຜ່ານຄຸນນະພາບຂອງສະຖາບັນ, ຂີດຄວາມສາມາດດ້ານນະວັດຕະກຳ ແລະ ຄວາມສາມາດຂອງພວກເຮົາໃນການເຊື່ອມຕໍ່ກະແສທຶນໂດຍກົງເຂົ້າສູ່ເສດຖະກິດຕົວຈິງ.”
ທ່ານ ໂປລ ເມີເຈີສ (Paul Meijers) ຮອງປະທານບໍລິຫານຂອງ Airbus ກ່າວວ່າ: “Airbus ຕີລາຄາສູງຕໍ່ບົດບາດຂອງ ສູນກາງການເງິນການບິນ ອາຊີ–ປາຊີຟິກ ໃນການສ້າງເວທີທີ່ມີປະສິດທິພາບ ເພື່ອເຊື່ອມຕໍ່ຄວາມຕ້ອງການໃນການພັດທະນາຝູງບິນຍຸກໃໝ່ ເຂົ້າກັບລະບົບນິເວດການເງິນທົ່ວໂລກ. ການເຂົ້າຮ່ວມໃນຖານະສະມາຊິກຍຸດທະສາດກິດຕິມະສັກ ສະທ້ອນໃຫ້ເຫັນເຖິງຄວາມມຸ່ງໝັ້ນໄລຍະຍາວຂອງ Airbus ໃນການຊຸກຍູ້ວິທີການແກ້ໄຂບັນຫາດ້ານການເງິນທີ່ສ້າງສັນ ແລະ ສະໜັບສະໜູນການເຕີບໂຕແບບຍືນຍົງຂອງອຸດສາຫະກຳການບິນ.” ດ້ວຍຈຳນວນເຮືອບິນທີ່ສັ່ງຈອງເກືອບ 600 ລຳ, Vietjet ຄາດວ່າຈະມີບົດບາດສຳຄັນໃນການຊຸກຍູ້ທຸລະກຳທາງດ້ານການເງິນການບິນໃນໄລຍະເລີ່ມຕົ້ນຜ່ານສູນກາງແຫ່ງນີ້ ຊຶ່ງຈະຊ່ວຍສ້າງພື້ນຖານການໄຫຼວຽນຂອງການຕົກລົງທຸລະກິດ ສຳລັບການລົງທຶນດ້ານການບິນໃນພາກພື້ນ.
ທ່ານ ນາງ ດຣ. ຫງວຽນ ທິ ເຟືອງ ທາວ (Dr. Nguyen Thi Phuong Thao) ປະທານສະພາລິຫານ Vietjet ກ່າວວ່າ: “ສູນກາງການເງິນການບິນ ອາຊີ-ປາຊີຟິກ ຖືເປັນຂີດໝາຍຍຸດທະສາດໃນການປັບປ່ຽນຮູບແບບການສະໜັບສະໜູນຂອງທຶນທົ່ວໂລກ ເພື່ອຄວາມກ້າວໜ້າຂອງຂະແໜງການບິນ ກໍຄືພາບລວມທາງດ້ານເສດຖະກິດຂອງ ຫວຽດນາມ ແລະ ໃນພາກພື້ນ. Vietjet ມີຄວາມມຸ່ງໝັ້ນທີ່ຈະເປັນຜູ້ນຳໃນການເຮັດທຸລະກຳທີ່ມີຜົນກະທົບສູງ ເພື່ອຊ່ວຍເສີມສ້າງລະບົບນິເວດການເງິນການບິນທີ່ທັນສະໄໝ ແລະ ຍືນຍົງ ເພື່ອສະໜັບສະໜູນການເຕີບໂຕຂອງພາກພື້ນໃນອະນາຄົດ.”
ນອກຈາກນັ້ນ, ໃນງານ Singapore Airshow 2026, Vietjet ແລະ Pratt & Whitney ໄດ້ປະກາດການສັ່ງຈອງເຮືອບິນ Airbus A320neo ທີ່ນຳໃຊ້ເຄື່ອງຈັກ GTF ເພີ່ມຕື່ມອີກ 44 ລໍາຊຶ່ງລວມມີ A321neo ຈຳນວນ 24 ລໍາ ແລະ A321XLR ຈຳນວນ 20 ລໍາ, ເຮັດໃຫ້ຍອດການສັ່ງຈອງເຮືອບິນທີ່ນຳໃຊ້ເຄື່ອງຈັກ GTF ຂອງສາຍການບິນເພີ່ມຂຶ້ນເປັນ 137 ລໍາ. ການສົ່ງມອບຈະເລີ່ມຂຶ້ນໃນເດືອນກໍລະກົດ 2026, ໂດຍທີ່ Pratt & Whitney ຈະເປັນຜູ້ສະ ໜອງການບໍາລຸງຮັກສາເຄື່ອງຈັກພາຍໃຕ້ສັນຍາການບໍລິການແບບຄົບວົງຈອນ EngineWise® ເປັນເວລາ 12 ປີ.
(ຂ່າວ: ຕຸໄລເພັດ)
ຄໍາເຫັນ