ການຄ້າຕ່າງປະເທດຂອງຈີນເລັ່ງຄວາມໄວໃນການຫັນເປັນສີຂຽວ

ຕາມຂ່າວແຈ້ງວ່າ:ຈີນໄດ້ສ້າງລະບົບນະໂຍບາຍການຫຼຸດຜ່ອນການປ່ອຍກາກບອນທີ່ຄົບຖ້ວນທີ່ສຸດໃນໂລກແລະສຳເລັດການສ້າງລະບົບພະລັງງານໝູນວຽນທີ່ໃຫຍ່ກວ່າໝູ່ແລະພັດທະນາໄວກວ່າໝູ່ໃນໂລກ.

ໃນດ້ານການສົ່ງອອກ, ຈີນໄດ້ສະໜອງຜະລິດຕະພັນສີຂຽວທີ່ມີຄຸນນະພາບດີແລະມີປະສິດທິພາບສູງໃຫ້ແກ່ທົ່ວໂລກ. ມູນຄ່າການສົ່ງອອກຜະລິດຕະພັນສີຂຽວຂອງຈີນໃນປີ2025 ມີເຖິງ442 ຕື້ 627 ລ້ານໂດລາ, ກວມເອົາ16.53% ຂອງຍອດການສົ່ງອອກຜະລິດຕະພັນສີຂຽວທົ່ວໂລກ. ໃນໄລຍະ10 ປີຜ່ານມາ, ຈີນໄດ້ສະໜອງຫຼາຍກວ່າ80% ຂອງຜະລິດຕະພັນໂຊລາເຊວແລະ70% ຂອງອຸປະກອນຜະລິດໄຟຟ້າດ້ວຍພະລັງງານລົມໃຫ້ແກ່ໂລກຊຶ່ງຊ່ວຍຊຸກຍູ້ໃຫ້ຕົ້ນທຶນຂອງການຜະລິດໄຟຟ້າດ້ວຍພະລັງງານແສງຕາເວັນແລະພະລັງງານລົມໃນທົ່ວໂລກຫຼຸດລົງຢ່າງມີປະສິດທິຜົນ.

ຈີນບໍ່ພຽງແຕ່ແມ່ນຜູ້ສະໜອງທີ່ສຳຄັນດ້ານຜະລິດຕະພັນສີຂຽວທີ່ສຳຄັນຂອງໂລກເທົ່ານັ້ນ, ຍັງເປັນຕະຫຼາດທີ່ສຳຄັນສຳລັບຜະລິດຕະພັນສີຂຽວທົ່ວໂລກອີກດ້ວຍ. ໃນປີ2025, ມູນຄ່າການນຳເຂົ້າຜະລິດຕະພັນສີຂຽວຂອງຈີນມີເຖິງ359 ຕື້ 624 ລ້ານໂດລາ, ກວມເອົາ12.91% ຂອງຍອດການນຳເຂົ້າຜະລິດຕະພັນສີຂຽວໃນທົ່ວໂລກຊຶ່ງຢູ່ອັນດັບໜຶ່ງຂອງໂລກເຊັ່ນກັນ.

ສິ່ງທີ່ສຳຄັນກວ່ານີ້ແມ່ນ: ຈີນສືບຕໍ່ຍົກລະດັບການເປີດປະຕູສູ່ພາຍນອກໃນລະດັບສູງແລະເຂົ້າຮ່ວມການບໍລິຫານສີຂຽວທົ່ວໂລກຢ່າງເລິກເຊິ່ງ. ໃນຊຸມປີມໍ່ໆມານີ້, ຈີນໄດ້ເຂົ້າຮ່ວມການວາງລະບຽບກາກບອນຕ່ຳແລະລະບົບມາດຕະຖານສີຂຽວທົ່ວໂລກຢ່າງຕັ້ງໜ້າ, ລິເລີ່ມຂໍ້ລິເລີ່ມຂອບການຮ່ວມມືເສດຖະກິດການຄ້າສາກົນກ່ຽວກັບເສດຖະກິດດີຈີຕອນແລະການພັດທະນາແບບສີຂຽວ, ຂໍ້ລິເລີ່ມການຮ່ວມມືເສດຖະກິດການຄ້າສາກົນແຮ່ທາດສີຂຽວແລະຂໍ້ລິເລີ່ມຕ່າງໆທີ່ສຳຄັນໂດຍໄດ້ຮັບການຕອບຮັບຢ່າງຕັ້ງໜ້າຈາກຫຼາຍປະເທດແລະກຸ່ມເສດຖະກິດ. ແຜນພັດທະນາເສດຖະກິດ-ສັງຄົມແຫ່ງຊາດ5 ປີຄັ້ງທີ15 ຂອງຈີນໄດ້ສະເໜີຢ່າງຈະແຈ້ງກ່ຽວກັບການພັດທະນາການຄ້າສີຂຽວດ້ວຍການປະດິດສ້າງໃໝ່. ໃນອະນາຄົດ, ຄຽງຄູ່ກັບອຸດສາຫະກຳການຜະລິດທີ່ທັນສະໄໝຂອງຈີນພັດທະນາໃຫ້ຫັນເປັນອັດສະລິຍະ, ຫັນເປັນສີຂຽວແລະຫັນເປັນການເຊື່ອມໂຍງເຂົ້າກັນ, ການຄ້າຕ່າງປະເທດຂອງຈີນຈະເລັ່ງຄວາມໄວໃນການພັດທະນາໄປຕາມທິດສີຂຽວ, ສ້າງພະລັງຂັບເຄື່ອນສີຂຽວທີ່ຫຼາຍກວ່າເກົ່າໃຫ້ແກ່ການພັດທະນາຂອງທຸກປະເທດແລະປະກອບສ່ວນເຂົ້າໃນການຄຸ້ມຄອງດິນຟ້າອາກາດທົ່ວໂລກໃຫ້ຫຼາຍກວ່າເກົ່າ.