ໂດຍ: ວັນເພັງ
ຫ້ອງການປະສານງານຂົນສົ່ງສິນຄ້າລະຫວ່າງພາສີ ກະສິກໍາ ເປັນຈຸດໜຶ່ງຕັ້ງຢູ່ສະຖານີລົດໄຟລາວ-ຈີນ ດ່ານບໍ່ເຕ່ນ ແຂວງຫຼວງນໍ້າທາ ຊຶ່ງເຮັດໜ້າທີ່ກວດກາເອກະສານຂອງສິນຄ້າຕ່າງໆທີ່ສົ່ງອອກ-ນໍາເຂົ້າ, ກວດກາຄວາມເປັນລະບຽບຮຽບຮ້ອຍສິນຄ້າຂອງຕູ້ຄອນເທນເນີ ເພື່ອປ້ອງກັນໃຫ້ສິນຄ້າຈາກຕົ້ນທາງໄປຫາປາຍທາງມີຄວາມປອດໄພຈາກການຂົນສົ່ງ, ທັງຮັບປະກັນການຂົນສົ່ງສິນຄ້າ 100%. ເລີ່ມແຕ່ມີເສັ້ນທາງລົດໄຟລາວ-ຈີນ ເຮັດໃຫ້ການຂົນສົ່ງສິນຄ້າຜ່ານດ່ານດັ່ງກ່າວນັບມື້ເພີ່ມຂຶ້ນ.
ທ່ານ ຕູ້ ຈື່ກ່າງ ຜູ້ຮັບຜິດຊອບວຽກງານຂົນສົ່ງຂອງບໍລິສັດທາງລົດໄຟລາວ-ຈີນ ໃຫ້ສຳພາດຕໍ່ນັກຂ່າວລາວ-ຈີນ ໃນວັນທີ 21 ກັນຍາ ຜ່ານມາວ່າ: ສະຖານນີລົດໄຟລາວ-ຈີນ ດ່ານບໍ່ເຕ່ນ ເປັນດ່ານໜຶ່ງທີ່ມີຄວາມສຳຄັນຫຼາຍ ເພາະເປັນດ່ານສຸດທ້າຍຂອງເສັ້ນທາງລົດໄຟລາວ-ຈີນ ໃນ ສປປ ລາວ ທີ່ນໍາເຂົ້າ-ສົ່ງອອກສິນຄ້າຕ່າງໆໄປ ສປ ຈີນ ທີ່ຮັບປະກັນຄວາມປອດໄພ ແລະ ໄດ້ມາດຕະ ຖານ. ພ້ອມນີ້, ດ່ານດັ່ງກ່າວຍັງມີບຸລິມະສິດ ໃຫ້ແກ່ການຂົນສົ່ງສິນຄ້າປະເພດຕ່າງໆຂອງ ສປປ ລາວ ສູ່ປະເທດຈີນ ແລະ ສິນຄ້າຂອງຈີນ ສູ່ ສປປ ລາວ, ສະນັ້ນ, ແຕ່ລະປະເພດຂອງສິນຄ້າເມື່ອມາຜ່ານມາຮອດດ່ານແລ້ວ ຕ້ອງໄດ້ມີການກວດກາຄວາມເປັນລະບຽບຮຽບຮ້ອຍດ້ານເອກະສານຕ່າງໆຢ່າງລະອຽດ, ກວດດ້ານຄວາມປອດໄພຂອງຕູ້ຄອນເທນ ແລະ ອື່ນໆ ໃຫ້ດີແລ້ວຈຶ່ງສາມາດນຳເຂົ້າ ຫຼື ສົ່ງອອກໄປ ສປ ຈີນ ໄດ້.
ສຳລັບການຂົນສົ່ງສິນຄ້າສົ່ງອອກ-ນຳເຂົ້າ ໃນດ່ານບໍ່ເຕ່ນ ເລີ່ມແຕ່ປີ 2021 ຫາ ປີ 2023 ເຫັນວ່າການຂົນສົ່ງສິນຄ້າມີການເພີ່ມຂຶ້ນຫຼາຍ ໂດຍສະເພາະໃນເດືອນມັງກອນ ຫາ ເດືອນມິຖຸນາ ປີ 2023 ເຫັນວ່າຈຳນວນການຂົນສົ່ງສິນຄ້ານຳເຂົ້າ ແລະ ສົ່ງອອກເພີ່ມຂຶ້ນເປັນສອງເທົ່າຂອງປີ 2022, ໂດຍສະເລ່ຍແລ້ວໂຕເລກການຂົນສົ່ງສິນຄ້າ ເລີ່ມແຕ່ ປີ 2022 ຫາ ປີ 2023 ມີທັງໝົດ 5 ລ້ານກວ່າໂຕນ.
ປັດຈຸບັນ ສປປ ລາວ ນຳສິນຄ້າສົ່ງອອກມີປະມານ 7-8 ຂະບວນຕໍ່/ມື້ ແລະ ຂາເຂົ້າປະມານ 5-6 ຂະບວນ/ມື້ ຊຶ່ງສິນຄ້າທີ່ສົ່ງອອກໄປ ສປ ຈີນ ເປັນຕົ້ນ ແຮ່ເຫຼັກ, ແປ້ງມັນຕົ້ນ, ໝາກເດືອຍ, ໝາກກ້ວຍ, ຢາງພາລາ, ໝາກຖົ່ວວລຽນ, ໝາກມັງຄຸດ, ລິນຈີ (ທີ່ນຳມາຈາກປະເທດໄທ), ສ່ວນສິນຄ້ານຳເຂົ້າມີ: ປຸ໋ຍເຄມີ, ລົດໄຟຟ້າ ແລະ ສິນຄ້າປະເພດອື່ນໆ.
ທ່ານ ຕູ້ ຈື່ກ່າງ ກ່າວຕື່ມວ່າ: ເພື່ອຮັບປະກັນການຂົນສົ່ງສິນຄ້າໃຫ້ໄດ້ມາດຕະຖານ, ມີຄຸນນະ ພາບ ແລະ ຄວາມປອດໄພ ດີຂຶ້ນເລື້ອຍໆນັັ້ນ, ທາງບໍລິສັດທາງລົດໄຟລາວ-ຈີນ ຍັງໄດ້ມີການຍົກລະ ດັບໃຫ້ພະນັກງານວິຊາການທີ່ປະຈຳການສິນຄ້າໃນດ່ານບໍ່ເຕ່ນ ໃຫ້ມີການແລກປ່ຽນບົດຮຽນກັບພາກ ສ່ວນກ່ຽວຂ້ອງກັບລັດຖະບານລາວ-ຈີນ ເພື່ອຮັບປະກັນການກວດກາສິນຄ້າທີ່ໄດ້ຄຸນນະພາບດີທີ່ສຸດ.
ປັດຈຸບັນການຂົນສົ່ງສິນຄ້າຂອງ ສປປ ລາວ ຜ່ານດ່ານທາງລົດໄຟລາວ-ຈີນ ແມ່ນມີຄວາມສະດວກສະບາຍຫຼາຍຂຶ້ນ ຊຶ່ງເປັນແຮງບັນດານໃຈອີກຢ່າງໜຶ່ງໃຫ້ປະຊາຊົນລາວ ກໍຄືປະຊາຊົນລາວທີ່ອາໄສຢູ່ລຽບແຄມເສັ້ນທາງລົດໄຟລາວ-ຈີນ ມີຄວາມຫ້າວຫັນທຳການຜະລິດຫຼາຍຂຶ້ນ, ທັງຈະເປັນການກະຕຸ້ນໃຫ້ເສດຖະກິດຂອງ ສປປ ລາວ ໃຫ້ມີການຂະຫຍາຍຕົວຂຶ້ນເທື່ອລະກ້າວ.
ຄໍາເຫັນ