 |
ຈຸດປະສົງຂອງການລົງເຄື່ອນໄຫວວຽກງານດັ່ງກ່າວແມ່ນເພື່ອຕິດຕາມສະພາບການຊາຍແດນ ລະຫວ່າງ ສປປ ລາວ ແລະ ປະເທດໃກ້ຄຽງ ກ່ຽວຂ້ອງ ກໍຄືການພັດທະນາທີ່ພົວພັນກັບວຽກງານຊາຍແດນ ເຊັ່ນ: ວຽກງານດ່ານ, ການສ້າງເສັ້ນທາງເຊື່ອມຈອດລະຫວ່າງແຂວງ ອັດຕະປື ແລະ ແຂວງລັດຕະນະຄີລີ, ການສ້າງຂົວເຊລໍາເພົາ ລະຫວ່າງ ແຂວງຈໍາປາສັກ ແລະ ແຂວງເປຣຍວິເຮຍ, ການສ້າງເສັ້ນທາງລຽບຕາມຊາຍແດນ ເປັນຕົ້ນ. ພ້ອມດຽວກັນນີ້ ກໍເພື່ອລົງຕິດຕາມຄວາມຄືບໜ້າການຈັດຕັ້ງປະຕິບັດສົນທິສັນຍາວ່າດ້ວຍການກໍານົດຊາຍແດນປະເທດ ລະຫວ່າງ ສປປ ລາວ ແລະ ຣາຊະອານາຈັກກໍາປູເຈຍ ໂດຍສະເພາະວຽກງານສຳຫຼວດ ແລະ ປັກຫຼັກໝາຍຊາຍແດນແບບໃໝ່ປ່ຽນແທນຫຼັກໝາຍຊາຍແດນແບບເກົ່າ ແລະ ປັກຫຼັກໝາຍຊາຍແດນເພີ້ມເຕີມ, ລົງກວດກາບໍລິເວນຊາຍແດນ ລາວ-ກໍາປູເຈຍ ທີ່ສອງຝ່າຍຮ່ວມກັນແກ້ໄຂສຳເລັດແລະ ບໍລິເວນທີ່ສອງຝ່າຍພວມສືບຕໍ່ເຈລະຈາແກ້ໄຂ.
ທ່ານຮອງລັດຖະມົນຕີໄດ້ຖືໂອກາດນີ້ ລົງຢ້ຽມຢາມອ້າຍນ້ອງກອງຮ້ອຍທະຫານຊາຍແດນ543 ແລະ ໄດ້ຮັບຟັງການລາຍງານໂດຍຫຍໍ້ກ່ຽວກັບສະພາບການຕາມບໍລິເວນຊາຍແດນ, ການປະຕິບັດວຽກງານວິຊາສະເພາະ ແລະ ໄດ້ຮັບຊາບສະພາບການປະຕິບັດໜ້າທີ່ວຽກງານ ແລະ ຊີວິດການເປັນຢູ່ຂອງອ້າຍນ້ອງຮ້ອຍທະຫານຊາຍແດນ ໃນພາລະກິດປົກປັກຮັກສາອະທິປະໄຕຂອງຊາດ ແລະ ຄວາມສະຫງົບສຸກຂອງປະຊາຊົນທີ່ອາໄສຢູ່ລຽບຕາມບໍລິເວນຊາຍແດນ.
 |
ນອກຈາກລົງກວດກາບໍລິເວນຊາຍແດນແລ້ວ, ໃນໂອກາດລົງເຄື່ອນໄຫວວຽກງານໃນຄັ້ງນີ້ ທ່ານຮອງລັດຖະມົນຕີ ພ້ອມຄະນະໄດ້ພົບປະເຮັດວຽກກັບການນໍາຂອງສອງແຂວງເພື່ອແຈ້ງຈຸດປະສົງຂອງການລົງມາເຄື່ອນໄຫວ, ລາຍງານໂດຍຫຍໍ້ກ່ຽວກັບການປະຕິບັດວຽກງານໃນໄລຍະມາ ແລະ ແລກປ່ຽນທັດສະນະການຈັດຕັ້ງປະຕິບັດວຽກງານຕົວຈິງຢູ່ຕາມບໍລິເວນຊາຍແດນ,ພ້ອມທັງຮັບຟັງຂໍ້ສະດວກ, ຂໍ້ຫຍຸ້ງຍາກ ແລະຂໍ້ສະເໜີຕ່າງໆຂອງແຂວງ ນໍາອີກ.
ຂ່າວ:ກະຊວງການຕ່າງປະເທດ
ຄໍາເຫັນ