ໃນວັນທີ 29 ມິຖຸນານີ້, ທີ່ຫ້ອງວ່າການປົກຄອງແຂວງບໍລິຄຳໄຊ, ສະຫາຍ ທອງລີ ສີສຸລິດ ກຳມະ ການສູນກາງພັກ, ເລຂາຄະນະບໍລິຫານງານສູນກາງຊາວໜຸ່ມປະຊາຊົນປະຕິວັດລາວ (ສຊປລ) ພ້ອມດ້ວຍຄະນະ ໄດ້ເຂົ້າຢ້ຽມຢາມ ແລະ ພົບປະ ການນຳແຂວງບໍລິຄຳໄຊ. ໂດຍໄດ້ຮັບກຽດຕ້ອນຮັບຢ່າງອົບອຸ່ນຈາກ ສະຫາຍ ສອນທະນູ ທຳມະວົງ ກຳມະການສູນກາງພັກ, ເລຂາພັກແຂວງ ປະທານສະພາປະຊາຊົນແຂວງ.
ການພົບປະຄັ້ງນີ້, ມີຄວາມໝາຍສຳຄັນໃນການເພີ່ມທະວີການຊີ້ນຳ-ນຳພາ ວຽກງານຊາວໜຸ່ມ-ເຍົາວະຊົນ ໃຫ້ມີການຫັນປ່ຽນຢ່າງແຂງແຮງ, ເລິກເຊິ່ງ ແລະ ຮອບດ້ານ. ໃນໂອກາດດັ່ງກ່າວ, ຄະນະນຳ ສຊປລ ໄດ້ລາຍງານຜົນງານພົ້ນເດັ່ນ ແລະ ທິດທາງແຜນການຈັດຕັ້ງປະຕິບັດຢູ່ບັນດາແຂວງ ເປັນຕົ້ນແມ່ນ: 1) ການຈັດ ຕັ້ງປະຕິບັດໂຄງການ “ນຳແສງສະຫວ່າງສູ່ຊຸມຊົນ” ແລະ ໂຄງການ “ອາສາສະໝັກອ້າຍເອື້ອຍສອນນ້ອງ” ເພື່ອປະກອບສ່ວນເຂົ້າໃນການພັດທະນາຊັບພະຍາກອນມະນຸດ; 2) ການຈັດຕັ້ງຜັນຂະຫຍາຍບົດບັນທຶກການຮ່ວມມືກັບພາກສ່ວນຕ່າງໆ ໃນການເພີ່ມທະວີການຮ່ວມມືກັບພາກສ່ວນທຸລະກິດ ເພື່ອສ້າງກາລະໂອກາດໃຫ້ຊາວໜຸ່ມເຂົ້າເຖິງວຽກເຮັດງານທໍາ ໃນຕໍາແໜ່ງງານຕ່າງໆ; 3) ການສຶກສາອົບຮົມການເມືອງ-ແນວຄິດ, ສ້າງຈິດສຳນຶກດ້ານຄວາມປອດໄພໃນການສັນຈອນ ແລະ ການສ້າງເສັ້ນທາງຕົວແບບ ເພື່ອຫຼຸດຜ່ອນປະກົດການຫຍໍ້ທໍ້ໃນສັງຄົມ; 4) ການປັບປຸງໂຮງຮຽນປະຖົມທົ່ງນາມີ ໂດຍ ສຊປລ ຈະສືບຕໍ່ສົມທົບດ້ານງົບປະມານເພື່ອໃຫ້ສຳເລັດຕາມແຜນການ.
 |
| |
ສະຫາຍ ສອນທະນູ ທຳມະວົງ ເລຂາພັກແຂວງ ໄດ້ສະແດງຄວາມຊົມເຊີຍຕໍ່ຜົນສຳເລັດຂອງອົງການ ຈັດຕັ້ງຊາວໜຸ່ມແຂວງທີ່ຍາດມາໄດ້. ພ້ອມທັງຊີ້ນຳໃຫ້ ສຊປລ ແລະ ຄະນະຊາວໜຸ່ມແຂວງ ສືບຕໍ່ດຶງດູດເອົາຊາວໜຸ່ມທຸກຊັ້ນຄົນ, ໂດຍສະເພາະແມ່ນກຸ່ມສ່ຽງທີ່ອາດຕົກເປັນເຫຍື່ອຂອງປະກົດການຫຍໍ້ທໍ້ ເຂົ້າມາສູ່ຂະບວນການຝຶກຝົນຫຼໍ່ຫຼອມ, ສ້າງວຽກດີ-ຄົນເດັ່ນ, ສົ່ງເສີມຂະບວນການຮຽນເກັ່ງ ຕິດພັນກັບການຈັດຕັ້ງປະຕິບັດຂໍ້ແຂ່ງຂັນ “4 ບຸກ” ແລະ “3 ດີ 4 ຮູ້” ໃຫ້ປະກົດຜົນເປັນຈິງ ເພື່ອໃຫ້ຊາວໜຸ່ມເປັນກຳລັງແຮງສຳຮອງທີ່ເຂັ້ມ ແຂງຂອງພັກ ໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ. ຂ່າວ: ສຊປລ
ຄໍາເຫັນ