ການນຳຂັ້ນສູນກາງ ແລະ ຂັ້ນແຂວງ ລົງຕິດຕາມແກ້ໄຂໄພພິບັດນ້ຳຖ້ວມ ຢູ່ເມືອງເຟືອງ

ໃນໂອກາດນີ້, ທ່ານ ຫົວໜ້າຫ້ອງວ່າການສຳນັກງານນາຍົກລັດຖະມົນຕີໄດ້ຮັບຟັງການລາຍງານ ກ່ຽວກັບສະພາບໄພພິບັດນໍ້າຖ້ວມ ຈາກຄະນະກຳມະການຄຸ້ຄອງໄພພິບັດຂັ້ນແຂວງ ແລະ ການບໍລິຫານຈັດການນໍ້າ ຂອງເຂື່ອນໄຟຟ້ານໍ້າລີກ 1-2 ຈາກຜູ້ຕາງໜ້າບໍລິສັດ ເຂື່ອນໄຟຟ້ານໍ້າລີກ ເຫັນວ່າ: ໃນລະຫວ່າງ ວັນທີ 29 ກັນຍາ ຫາ ວັນທີ 1 ຕຸລາ 2025 ຜ່ານມາ, ເມືອງເຟືອງໄດ້ຮັບອິດຕິພົນຈາກ ພາຍຸບົວລອຍ ທີ່ພັດເຂົ້າມາ ແລະ ເຮັດໃຫ້ມີຝົນຕົກໜັກໃນ 2-3 ມື້ ຕິດຕໍ່ກັນ, ອັນໄດ້ເຮັດໃຫ້ປະລິມານນ້ຳຢູ່ຕາມສາຍນໍ້າຕ່າງເພີ່ມສູງຂຶ້ນຢ່າງວອງໄວ, ດ້ວຍເຫດນີ້ຈຶ່ງເຮັດໃຫ້ນໍ້າຝົນໄຫຼເຂົ້າໃນອ່າງເກັບນໍ້າໆລີກເພີ່ມສູງຂຶ້ນຢູ່ໃນລະດັບບັນຈຸສູງສຸດຂອງເຂື່ອນ.ເພື່ອເປັນການຮັກສາລະດັບນໍ້າ ແລະ ປ້ອງກັນເຂື່ອນ ໃນວັນທີ 30 ກັນຍາ 2025 ທາງຝ່າຍທີ່ຮັບຜິດຊອບການບໍລິຫານຈັດການນ້ຳ ຢູ່ເຂື່ອນຜະລີດໄຟຟ້ານໍ້າລີກ 1-2 ຈຶ່ງໄດ້ປ່ອຍອອກຈາກເຂື່ອນ ເພີ່ມຂຶ້ນຕາມລະດັບ ຊຶ່ງມວນນໍ້າດັ່ງກ່າວ ຈະບວກກັບປະລິມານນໍ້າ ຕາມສາຍຫ້ວຍຕ່າງໆຢູ່ລຸ່ມເຂື່ອນ ເຮັດໃຫ້ສາຍນໍ້າລີກຢູ່ລຸ່ມເຂື່ອນເພີ່ມສູງຂຶ້ນຫຼາຍ ແລະ ຢູ່ 7 ບ້ານຕາມແຄມນໍ້າລີກລຸ່ມເຂື່ອນໄຟຟ້າ ເຮັດໃຫ້ສິ່ງປຸກສ້າງຂອງຜູ້ປະກອບການດ້ານການທ່ອງທ່ຽວ ເປັນຕົ້ນ ແມ່ນເຮືອນແພໄຫຼໄປກັບສາຍນໍ້າ ປະມານ 55 ກວ່າຫຼັງ ແລະ ເຮືອນແພມີການເປເຟຈໍານວນໜຶ່ງ, ເຮືອນພັກແຄມນໍ້າ, ຮ້ານອາຫານ, ຕູບ, ສິ່ງກໍ່ສ້າງ ແລະ ວັດຖຸຮັບໃຊ້ຕ່າງໆຈໍານວນໜື່ງ ຈົມຢູ່ໃຕ້ນໍ້າຍັງບໍ່ສາມາດປະເມີນໄດ້, ຂົວຍ່າງຂ້າມໄປສະຖານທີ່ທ່ອງທ່ຽວເປເພ ແລະ ເສຍຫາຍ 2 ຈຸດ,ພື້ນທີ່ຜະລິດເຂົ້ານາປີ, ຮົ້ວສວນຂອງປະຊາຊົນຢູ່ລຽບຕາມແຄມນ້ຳລີກ ຈໍານວນ 7 ບ້ານແມ່ນໄດ້ຮັບຜົນເສຍຫາຍຫຼາຍສົມຄວນ. ເສັ້ນທາງຖືກນໍ້າຖ້ວມ 2 ຈຸດ ເຮັດໃຫ້ການສັນຈອນໄປມາຂອງປະຊາຊົນແມ່ນພົບຄວາມຫຍຸ້ງຍາກພໍສົມຄວນໃນເວລານັ້ນ.ຕໍ່ເຫດການດັ່ງກ່າວນີ້, ທາງອົງການປົກຄອງຂັ້ນເມືອງ, ຄະນະກຳມະການຕ້ານໄພພິຂັ້ນເມືອງ ສົມທົບກັບກຳລັງເຈົ້າໜ້າທີ່ ປກຊ ແລະ ປກສ ເມືອງ ໄດ້ພ້ອມກັນສຸມໃສ່ ເພື່ອລົງຕິດຕາມຊ່ວຍເຫຼືອບັນດາຫົວໜ່ວຍຜູ້ປະກອບການທີ່ໄດ້ຮັບຜົນກະທົບ ແລະ ປະຊາຊົນຢູ່ໃນພື້ນທີ່ດັ່ງກ່າວຢ່າງເຕັມທີ ແລະ ມີຄວາມປອດໄພໃນລະດັບດີ. ມາຮອດປັດຈຸບັນນີ້ ລະດັບນ້ຳໃນໜ້າອ່າງນໍ້າລີກ ແລະ ຢູ່ລຸ່ມນ້ຳທ້າຍເຂື່ອນແມ່ນກຳລັງຫຼຸດລົງຢູ່ໃນສະພາບປົກກະຕິ ເນື່ອງຈາກຝົນໄດ້ຢຸດຕົກ, ສໍາລັບຜົນເສຍຫາຍຂອງອຸທົກກະໄພໃນຄັ້ງນີ້, ຄະນະຮັບຜິດຊອບຍັງບໍ່ສາມດປະເມີນມູນຄ່າເສຍຫາຍໄດ້ ເນື່ອງຈາກເປັນເຫດການທີ່ດ່ວນ ແລະ ຍັງບໍ່ສາມາດເຂົ້າເຖິງ ຫຼື ຮູ້ຂໍ້ມູນເສຍຫາຍຕົວຈີງເທື່ອ, ຊຶ່ງຈະໄດ້ລົງເກັບກຳຂໍ້ມູນລະອຽດ ແລ້ວຈະລາຍງານໃຫ້ຮັບຮູ້ຕາມພາຍຫຼັງ.

ໃນໂອກາດນີ້, ທາງຄະນະກຳມະການຄຸ້ມຄອງໄພພິບັດຂັ້ນສູນກາງ ໄດ້ມອບເງິນ ແລະ ເຄື່ອງຊ່ວຍເຫຼືອການແກ້ໄຂໄພພິບັດນໍ້າຖ້ວມໃນເບື້ອງຕົ້ນ ໃຫ້ແກ່ຄະນະກຳມະການຄຸ້ມຄອງໄພພິບັດແຂວງວຽງຈັນ ລວມມູນຄ່າທັງໝົດຈຳນວນ 354,000,000 ກີບ.

(ຂ່າວ, ພາບ: ບຸນມາ ແກ້ວບຸດດາ)