ວັນທີ 29 ຕຸລາ ກົງກັບມື້ຂຶ້ນ 15 ຄໍ່າ ເດືອນ 11 ລາວ ຊຶ່ງເປັນວັນທີ່ມີຄວາມໝາຍຄວາມສໍາຄັນທາງພຸດທະສາສະໜາ ຂອງຊາວພຸດທຸກທົ່ວໜ້າ ເປັນເງື່ອນໄຂໃຫ້ມວນຊົນ ໄດ້ມີໂອກາດເຂົ້າວັດເພື່ອຮ່ວມເຮັດບຸນໃສ່ບາດຖວາຍສັງຄະທານແກ່ພະພິຂຸສົງສາມະເນນ. ສໍາລັບແຂວງຄໍາມ່ວນ ກໍເຫັນໄດ້ບັນຍາກາດຂອງມວນຊົນ ມາຮ່ວມເຮັດບຸນໃສ່ບາດຢ່າງເປັນຂະບວນ ໂດຍສະເພາະທີ່ວັດ ນັນທະຄາມ (ວັດກາງ) ໄດ້ມີການນໍາ ພັກ-ລັດ ໃຫ້ກຽດເຂົ້າຮ່ວມ ໂດຍມີ ທ່ານ ວັນໄຊ ພອງສະຫວັນ ເຈົ້າແຂວງຄໍາມ່ວນ, ທ່ານ ຄໍາໄຫຼ ສີປະເສີດ ຮອງປະທານສູນກາງແນວລາວສ້າງຊາດ, ພ້ອມດ້ວຍ ບັນດາທ່ານໃນຄະນະການນໍາຂອງແຂວງ, ຕະຫຼອດຮອດຊາວພຸດທະສາສະນິກະຊົນມວນຊົນ ພາຍໃນເທສະບານແຂວງ ເຂົ້າຮ່ວມຢ່າງຫຼວງຫຼາຍ; ໂດຍເລີ່ມຕົ້ນດ້ວຍການຈູດທຽນໄຊ ບູຊາພະຣັດຕະນະໄຕ ເພື່ອນ້ອມຈິດ ນຶກເຖິງຄຸນພະພຸດ, ພະທັມ, ພະສົງ. ພ້ອມທັງໄຫວ້ພະຮັບສິນ ຕາມພິທີກໍາທາງສາສະໜາ ຕະຫຼອດຮອດການຖວາຍເຄື່ອງປັດໃຈ ໄຊຍະທານ ແລະ ກອງບຸນ, ຈາກນັ້ນ ທ່ານ ວັນໄຊ ພອງສະຫວັນ ພ້ອມດ້ວຍ ຮອງປະທານສູນກາງແນວລາວສ້າງຊາດ ແລະ ອອກຕົນຍາດໂຍມ ທີ່ເຂົ້າຮ່ວມກໍໄດ້ພ້ອມກັນຮ່ວມໃສ່ບາດຢ່າງເປັນຂະບວນຮັກສາໄດ້ຮີດຄອງປະເພນີ ແລະ ຄວາມເປັນລະບຽບຮຽບຮ້ອຍ. ວັນອອກພັນສາແມ່ນວັນທີ່ສິ້ນໄລຍະການຈຳພັນສາຄົບສາມເດືອນ ຄືການຢູ່ປະຈໍາໃນທີ່ໃດທີ່ໜຶ່ງໃນໄລຍະລະດູຝົນ ຈະໄປພັກຄ້າງແຮມຄືນບ່ອນອື່ນບໍ່ໄດ້ ເວັ້ນເສຍແຕ່ຈຳເປັນທີ່ ພະວິໄນອະນຸຍາດໄວ້ ເມື່ອພົ້ນສາມເດືອນໄປແລ້ວ ເປັນອັນວ່າພົ້ນເຂດ ການອອກພັນສາ ຫຼື ອອກຈາກເຂດຈຳກັດດັ່ງກ່າວ. ແຕ່ກ່ອນຈະອອກພັນສາ ຈະຕ້ອງໄດ້ປະວໍລະນາກັນກ່ອນ ຈຶ່ງຈະທ່ຽວສັນຈອນໄປມາ ຕາມລຳພັງໄດ້, ການອອກພັນສາ ກໍເພື່ອເປີດໂອກາດໃຫ້ພະສົງ ອອກໄປເທດສະໜາ ສັ່ງສອນຍາດໂຍມ ພໍ່ແມ່ ແລະ ຄູບາອາຈານ, ນັບວ່າຈະເປັນປະໂຫຍດແກ່ສັງຄົມຂອງມະນຸດບໍ່ແມ່ນນ້ອຍ. ຄຽງຄູ່ກັບງານອອກພັນສານີ້ ຍັງມີປະເພນີການໄຫຼເຮືອໄຟ ແລະ ການຊ່ວງເຮືອຍາວ ຊຶ່ງເປັນກິດຈະກໍາທີ່ສະນຸກສະໜານມ່ວນຊື່ນລື່ນເລີງ ແລະ ໂດຍສະເພາະໃນເທສະບານເມືອງທ່າແຂກ ທາງການ ຈັດຕັ້ງລັດ ກໍໄດ້ໃຫ້ຄວາມສໍາຄັນ ຈັດການຊ່ວງເຮືອຍາວ ເປັນງານປະເພນີຢ່າງໜຶ່ງ ຄວບຄູ່ກັບງານອອກພັນສາ ເພື່ອເປັນການອະນຸລັກຮັກສາ ແລະ ສືບທອດມູນເຊື້ອວັດທະນະທຳອັນດີງາມຂອງຊາວລາວ ໃຫ້ສືບຕໍ່ໄປ.
(ຂ່າວ-ພາບ: ມະນີວັນ)
ຄໍາເຫັນ