ການນຳແຂວງຫຼວງພະບາງ ຊຸກ​ຍູ້ວຽກງານ ຢູ່ໂຮງງານຊີມັງຄອນຈ໌ ຫຼວງພະບາງ

ໂອກາດນີ້ ໄດ້ຮັບຟັງການລາຍງານໂດຍຫຍໍ້ກ່ຽວກັບ ສະພາບຂອງບໍລິສັດ ເຊິ່ງບໍລິສັດຊີມັງຄອນຈ໌ ແມ່ນບໍລິສັດຜະລິດຊີມັງຍີ່ຫໍ້ດຽວທີ່ໃຫຍ່ ໂດຍມີຫຼາຍກ່ວາ 100 ບໍລິສັດຍ່ອຍຢູ່ 21 ແຂວງ, ເທດສະບານ ແລະ ເຂດປົກຄອງຕົນເອງໃນປະເທດຈີນ, ອີນໂດເນເຊຍ, ມຽນມາ, ລາວ, ກຳປູເຈຍ, ຣັດເຊຍ ແລະອື່ນໆ. ສຳລັບບໍລິສັດຊີມັງຄອນຈ໌ ຫຼວງພະບາງຈຳກັດ ເປັນບໍລິສັດຂະໜາດໃຫຍ່ແຫ່ງໜຶ່ງ ທີ່ຕອບສະໜອງຄວາມຕ້ອງການນະໂຍບາຍ ໜື່ງແລວທາງ ໜື່ງເສັ້ນທາງ ແລະ ປະຕິບັດຍຸດທະສາດການພັດທະນາສາກົນຂອງລັດຖະບານຈີນ, ໂຮງງານຊີມັງຄອນຈ໌ ຫຼວງພະບາງຈຳກັດ ຕັ້ງຢູ່ບ້ານຜາແດງ, ນະຄອນ ຫຼວງພະບາງ ປັດຈຸບັນໄດ້ດຳເນີນການຜະລິດຊີມັງທີ່ມີຄຸນນະພາບ ຕອບສະໜອງການຊົມໃຊ້ ແລະ ບັນດາໂຄງການກໍ່ສ້າງ ຢູ່ບັນດາແຂວງພາກເໜືອຂອງລາວ, ທັງສ້າງວຽກເຮັດງານທຳໃຫ້ປະຊາຊົນໃນທ້ອງຖີ່ນ ເປັນຈຳນວນຫຼາຍ, ການຜະລິດໄດ້ເນັ້ນເຖີງການຮັກສາສະພາບແວດລ້ອມ ເພື່ອບໍ່ໃຫ້ມີຜົນກະທົບຕໍ່ການດຳລົງຊີວິດຂອງປະຊາຊົນທ້ອງຖີ່ນ.

ຈາກນັ້ນ ທ່ານ ບຸນເລື່ອມ ມະນີວົງ ໄດ້ແລກປ່ຽນຄຳເຫັນຮ່ວມກັບຜູ້ບໍລິຫານໂຮງງານ ພ້ອມທັງສະເໜີ ໃຫ້ໂຮງງານ ຊ່ວຍສ້ອມແປງເສັ້ນທາງ ແຕ່ສາມແຍກ ບ້ານປາກເຊືອງ ນະຄອນ ຫຼວງພະບາງ ຫາ ເທດສະບານເມືອງໂພນໄຊ ແລະ ສືບຕໍ່ຊ່ວຍເຫຼືອ ພັດທະນາພື້ນຖານໂຄງລ່າງ ຂອງແຂວງຫຼວງພະບາງ ຕື່ມອີກ.

ພາບ-ຂ່າວ: ທະນູສິນ ອິດທິພົນ