ການນຳແຂວງວຽງຈັນ ວາງພວງມາລາ ແລະ ກະຕ່າດອກໄມ້ ເນື່ອງໃນວັນສ້າງຕັ້ງກອງທັບປະຊາຊົນລາວ

ໃນວັນທີ 18 ມັງກອນນີ້,ຄະນະພັກ, ອົງການປົກຄອງແຂວງວຽງຈັນ ນໍາໂດຍ ທ່ານ ຄຳພັນ ສິດທິດຳພາ ກໍາມະການສູນກາງພັກ ເລຂາພັກແຂວງ ເຈົ້າແຂວງວຽງຈັນ, ພ້ອມດ້ວຍ2 ກອງກໍາລັງປະກອບອາວຸດໄດ້ເຂົ້າວາງພວງມາລາທີ່ອະນຸສາວະລີນັກຮົບນິລະນາມ ແລະ ວາງຕ່າດອກໄມ້ຢູ່ຕໍ່ໜ້າຮູບຫຼໍ່ຂອງປະທານ ໄກສອນ ພົມວິຫານ ຢູ່ອະນຸສາວະລີປະທານ ໄກສອນ ພົມວິຫານແຂວງວຽງຈັນ, ເນື່ອງໃນໂອກາດສະເຫຼີມສະຫຼອງວັນສ້າງຕັ້ງກອງທັບປະຊາຊົນລາວ ຄົບຮອບ 75 ປີ ແລະ ວັນເກີດ ປະທານ ຄຳໄຕ ສີພັນດອນ ຄົບຮອບ 100 ປີ.
   ວັນທີ 20 ມັງກອນ ປີ 2024 ປີນີ້ ຄົບຮອບ 75 ປີ ຊຶ່ງພວມຢູ່ໃນບັນຍາກາດທີ່ທົ່ວພັກ,ທົ່ວລັດ, ທົ່ວກຳລັງປະກອບອາວຸດ ແລະ ທົ່ວປວງຊົນລາວທັງຊາດ ພວມຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຄັ້ງທີ XI ຂອງພັກເວົ້າລວມ, ເວົ້າສະເພາະຜັນຂະຫຍາຍມະຕິກອງປະຊຸມໃຫຍ່ຄັ້ງທີ 6 ອົງຄະນະພັກແຂວງວຽງຈັນໃຫ້ປະກົດຜົນເປັນຈິງ.
   ໃນວັນທີ 20 ມັງກອນປີ 1949 ປະທານ ໄກສອນ ພົມວິຫານ ໄດ້ປະກາດສ້າງຕັ້ງກອງລາດຊະວົງ ຊຶ່ງເປັນຕົວແທນຂອງກອງທັບລາວອິດສະຫຼະໃນເມື່ອກ່ອນ ແລະ ເປັນກອງທັບປະຊາຊົນລາວໃນປັດຈຸບັນ ຂຶ້ນຢູ່ຖໍ້າແມ ຕາແສງລາວຮຸ່ງ ເມືອງຊຽງຄໍ້ ແຂວງຫົວພັນ, ໃນມື້ປະກາດສ້າງຕັ້ງກອງທັບລາວອິດສະຫຼະມີພຽງ 25 ທ່ານ, ໂດຍແມ່ນ ທ່ານປະທານ ໄກສອນ ພົມວິຫານ ເປັນຜູ້ບັນຊາໂດຍກົງນັບແຕ່ມື້ປະກາດສ້າງຕັ້ງກອງທັບ ແມ່ນໄດ້ຮັບການສຶກສາອົບຮົມບົ່ມສອນຈາກພັກ, ພັກນຳພາກອງທັບເດັດຂາດ, ໂດຍກົງ, ຮອບດ້ານ, ກອງທັບຍາມໃດກໍຮັກສາ ແລະ ເສີມຂະຫຍາຍທາດແທ້ມູນເຊື້ອອັນດີງາມຂອງຕົນ, ເດັດດ່ຽວຕໍ່ສູ້ຢ່າງພິລະອາດຫານ, ຍາດໄດ້ຜົນງານອັນໃຫຍ່ຫຼວງ ແລະ ສະຫ່ງາງາມທີ່ສຸດ. ປົດປ່ອຍປະເທດຊາດໄດ້ຢ່າງສົມບູນ ແລະ ສະຖາປານາ ສາທາລະນະລັດ ປະຊາທິປະໄຕປະຊາຊົນລາວຂຶ້ນ. ໃນວັນທີ 2 ທັນວາ ປີ 1975 ຢ່າງສະຫງ່າຜ່າເຜີຍ.
ຂ່າວ-ພາບ: ແຂວງວຽງຈັນ