ການນໍາແຂວງໄຊຍະບູລີ ວາງກະຕ່າດອກໄມ້ ແລະ ພວງມາລາ

ເນື່ອງໃນໂອກາດວັນສຳຄັນທາງປະຫວັດສາດຂອງພັກ-ຂອງຊາດ, ຂອງກອງທັບ ແລະ ຂອງປະຊາຊົນລາວບັນດາເຜົ່າຄື: ວັນຊາດທີ 2 ທັນວາ ຄົບຮອບ 48 ປີ ແລະ ວັນລະນຶກ ວັນຄ້າຍວັນເກີດ ປະທານ ໄກສອນ ພົມວິຫານ ຄົບຮອບ 103ປີ, ໃນຕອນເຊົ້າຂອງວັນທີ 1 ທັນວານີ້, ການນໍາແຂວງ ໄຊຍະບູລີ ນໍາໂດຍ ທ່ານ ພົງສະຫວັນ ສິດທະວົງ ກໍາມະການສູນກາງພັກເລຂາພັກແຂວງເຈົ້າແຂວງ ໄຊຍະບູລີ ພ້ອມການນໍາຫຼັກແຫຼ່ງຂອງແຂວງ ໄດ້ເຂົ້າວາງກະຕ່າດອກໄມ້ໜ້າຮູບປັ້ນຂອງ ປະທານໄກສອນພົມວິຫານ ແລະ ວາງພວງມາລາທີ່ ອະນຸສາວະລີ ນັກຮົບນິລະນາມ.
    ການເຂົ້າວາງກະຕ່າດອກໄມ້ໜ້າຮູບປັ້ນຂອງ ປະທານໄກສອນພົມວິຫານ ແລະ ວາງພວງມາລາທີ່ ອະນຸສາວະລີ ນັກຮົບນິລະນາມຄັ້ງນີ້ ກໍເພື່ອເປັນການສະແດງຄວາມກະຕັນຍູຮູ້ບຸນຄຸນຕໍ່ກັບບັນພະບູລຸດທີ່ໄດ້ສະລະເລືອດເນື້ອເຫື່ອແຮງຂອງຕົນໃນການປົກປັກຮັກສາເຂດນໍ້າແດນດິນຂອງ ສປປ ລາວ, ເວົ້າລວມ, ເວົ້າສະເພາະແມ່ນປົກປັກຮັກສາເຂດແດນຂອງແຂວງໄວ້ຢ່າງໝັ້ນຄົງ, ຈາກນັ້ນກໍໄດ້ຈັດພິທີເລົ່າຄືນມູນເຊື້ອ ໂດຍແມ່ນທ່ານ ພົງສະຫວັນ ສິດທະວົງ ໃຫ້ກຽດຂຶ້ນເລົ່າຄືນ 2 ວັນດັ່ງກ່າວ ຊຶ່ງໄດ້ເຮັດໃຫ້ຄະນະພັກ, ພະນັກງານຫຼັກແຫຼ່ງ ໄດ້ຮັບຮູ້ເຂົ້າໃຈຕໍ່ປະຫວັດສາດຄວາມເປັນມາຂອງຊາດ, ມູນເຊື້ອຕໍ່ສູ້ພິລະອາດຫານ ຂອງກອງທັບ ແລະ ປະຊາຊົນບັນດາເຜົ່າ ພາຍໃຕ້ການນໍາພາ ຂອງພັກ ໃນໄລຍະຕໍ່ສູ້ປົດປ່ອຍຊາດ ກໍຄື ໄລຍະປົກປັກຮັກສາ ແລະ ພັດທະນາປະເທດຊາດຕະຫຼອດໄລຍະ 48 ປີ ຜ່ານມາ ແລະ ຮັບຮູ້, ເຂົ້າໃຈແຈ້ງຕື່ມເຖິງຄຸນສົມບັດ, ສິນທໍາປະຕິວັດ ນໍ້າໃຈຮັກຊາດອັນດູດດື່ມ, ຄວາມເສຍສະຫຼະອັນສູງສົ່ງເພື່ອຊາດ, ເພື່ອປະຊາຊົນ ຂອງ ປະທານ ໄກສອນ ພົມວິຫານ ຜູ້ນໍາທີ່ແສນເຄົາລົບຮັກ ຂອງປວງຊົນລາວທັງຊາດ, ພ້ອມທັງຕັ້ງໜ້າຮໍ່າຮຽນເອົາຄຸນສົມບັດສິນທໍາປະຕິວັດ ຂອງປະທານ ໄກສອນ ພົມວິຫານ  ເພື່ອນໍາໄປປັບປຸງທັດສະນະທາດແທ້ຄຸນສົມບັນຂອງຕົນເອງໃຫ້ມີການຫັນປ່ຽນທີ່ຕັ້ງໜ້າ ແລະ ມີຄວາມໜັກແໜ້ນ, ເຂັ້ມແຂງຂຶ້ນເລື້ອຍໆ, ໂອກາດດັ່ງກ່າວທ່ານເຈົ້າແຂວງຍັງໄດ້ແຈ້ງສະພາບການພັດທະນາຮອບດ້ານຂອງແຂວງໄຊຍະບູລີ ໃນໄລຍະ 1 ປີຜ່ານມາຕື່ມອີກ, ເຂົ້າຮ່ວມຮັບຟັງມີ: ບັນດາສະຫາຍ ກໍາມະການປະຈຳພັກແຂວງ, ກຳມະການພັກແຂວງ, ສະມາຊິກສະພາປະຊາຊົນແຂວງ, ພະນັກງານປະຕິວັດອາວຸໂສບໍານານ, ຫົວໜ້າ, ຮອງຫົວໜ້າພະແນກການ, ອົງການ, ເລຂາພັກເມືອງ, ເຈົ້າເມືອງ ແລະ ການນໍາຂອງເມືອງໄຊຍະບູລີ, ທະຫານ-ຕໍາຫຼວດ, ສະມາຊິກພັກ, ພະນັກງານຫຼັກແຫຼ່ງ, ນັກຮຽນ-ນັກສຶກສາ, ປັນຍາຊົນ, ຊາວໜຸ່ມ-ເຍົາວະຊົນ, ລັດວິສາຫະກິດ, ນັກທຸລະກິດອ້ອມຂ້າງແຂວງເຂົ້າຮ່ວມຢ່າງຫຼວງຫຼາຍ.
(ຂ່າວ-ພາບ: ອຸ່ນເຮືອນ ໂພທິລັກ)