 |
ທ່ານ ຄໍາແດງ ລໍອາກຸຍ ຮອງຫົວໜ້າໜ່ວຍງານປູກຝັງ ຫ້ອງການກະສິກໍາ ແລະ ສິ່ງແວດລ້ອມເມືອງ ໄດ້ລາຍງານສະພາບລວມການສົ່ງເສີມປູກພືດລະດູແລ້ງ ສົກປີ 2025-2026 ໃຫ້ຮູ້ວ່າ: ໄລຍະຜ່ານມາ ທາງທີມງານວິຊາການໜ່ວຍງານປູກຝັງ, ຫ້ອງການກະສິກໍາ ແລະ ສິ່ງແວດລ້ອມເມືອງ, ຄະນະຮັບຜິດຊອບວຽກງານເສດຖະກິດຂັ້ນເມືອງ ໄດ້ສົມທົບກັບອົງການປົກຄອງບ້ານ ແລະ ເຈົ້າຂອງດິນນາໃນບ້ານເປົ້າໝາຍ ເພື່ອອຳນວຍຄວາມສະດວກໃຫ້ບໍລິສັດໄດ້ລົງເຮັດສັນຍາເຊົ່າທີ່ດິນນຳປະຊາຊົນ.
 |
ປັດຈຸບັນ, ມີຫຼາຍບໍລິສັດທີ່ເຂົ້າມາລົງທຶນປູກພືດເປັນສິນຄ້າພາຍໃນເມືອງ ເປັນຕົ້ນແມ່ນ: ບໍລິສັດ ພັນທະວົງ ສົ່ງເສີມກະສິກຳ ຈຳກັດ ໄດ້ສົ່ງເສີມປູກໝາກໂມ 58 ເຮັກຕາ ແລະ ໝາກຖົ່ວເບີ 20 ເຮັກຕາ ໃສ່ພື້ນທີ່ນາຢູ່ບ້ານໃໝ່, ບ້ານນໍ້າແດງ, ບ້ານທ່າແສ ແລະ ບ້ານນໍ້າລື. ໝາກຖົ່ວເບີແມ່ນກຳລັງເລີ່ມເກັບກູ້ຜົນຜະລິດສົ່ງອອກ ຄາດວ່າຈະສຳເລັດໃນທ້າຍເດືອນມີນານີ້, ສ່ວນໝາກອຶຍັງຢູ່ໄລຍະການບົວລະບັດຮັກສາ ຄາດວ່າຈະເກັບກູ້ສໍາເລັດໃນທ້າຍເດືອນເມສາ. ບໍລິສັດ ໂຍປັງ ເຕັກນິກກະສິກຳຂາເຂົ້າ-ຂາອອກຈຳກັດຜູ້ດຽວ ສົ່ງເສີມປູກໝາກແຕງໂມ ເນື້ອທີ່ 177,4 ເຮັກຕາ ໃນ 10 ບ້ານເປົ້າໝາຍ ຄື: ບ້ານປຸ່ງ, ປ່າສັກ, ຫຼວງ, ທົ່ງອົ້ມ, ຫົວຂົວ, ດອນສໍາພັນ, ທົ່ງດີ, ປ່າປົວະ, ນໍ້າທຸງ ແລະ ບ້ານທ່າແສ, ຄາດວ່າຈະເກັບກູ້ຜົນລະປູກໃນທ້າຍເດືອນເມສາ. ບໍລິສັດ ພັດທະນາກະສິກຳຮອບດ້ານນິເວດສິ່ງລ້ຽວ ປູກໝາກຖົ່ວເຫຼືອງ 200 ເຮັກຕາ ໃນ 5 ບ້ານ ຄື: ບ້ານນໍ້າແງ້ນ, ພຽງງາມ, ຫຼວງ, ຂອນ ແລະ ບ້ານດອນຄູນ, ປູກໝາກຖົ່ວເບີ 15 ເຮັກຕາ ປັດຈຸບັນຍັງຢູ່ໃນຂັ້ນຕອນບົວລະບັດຮັກສາ ຄາດວ່າຈະເກັບກູ້ຜົນຜະລິດໃນທ້າຍເດືອນພຶດສະພາ. ບໍລິສັດ ຫົວຊຽນ ພັດທະນາກະສິກຳ ຈຳກັດ ສົ່ງເສີມປູກໝາກອຶນ້ອຍ 10 ເຮັກຕາ ຢູ່ບ້ານນໍ້າຕະລານ ຄາດວ່າຈະເກັບກູ້ຜົນຜະລິດໃນທ້າຍເດືອນມີນານີ້. ບໍລິສັດ ສີມອນ ພັດທະນາກະສິກຳ ແລະ ບໍລິການຂາເຂົ້າ-ຂາອອກຈຳກັດ ປູກໝາກຖົ່ວເບີ 10 ເຮັກຕາ ຢູ່ບ້ານໃໝ່ ຄາດວ່າຈະເກັບກູ້ສຳເລັດໃນເດືອນມີນານີ້. ນອກຈາກນີ້, ຍັງມີ ບໍລິສັດ ເຊີນຈີເຕີ ພັດທະນາການກະເສດຂາອອກ-ຂາເຂົ້າຈຳກັດ ທີ່ພວມລົງເກັບກໍາຂໍ້ມູນນຳບ້ານເປົ້າໝາຍ ເພື່ອກຽມສົ່ງເສີມປູກອ້ອຍຕາມແຜນການໃນເນື້ອທີ່ 200 ຫາ 300 ເຮັກຕາ.
 |
ຄຽງຄູ່ກັບການລົງທຶນຂອງບໍລິສັດ, ຍັງມີບຸກຄົນ ແລະ ປະຊາຊົນທີ່ຕື່ນຕົວປູກພືດເປັນສິນຄ້າ ເຊັ່ນ: ປະຊາຊົນບ້ານສວນຢາ ປູກໝາກອຶນ້ອຍ 17 ເຮັກຕາ ຢູ່ບ້ານຫ້ວຍຄຳ, ບ້ານສວນຢາ ແລະ ບ້ານນໍ້າແກ ປັດຈຸບັນພວມບົວລະບັດຮັກສາຜົນລະປູກ. ພ້ອມກັນນັ້ນ, ປະຊາຊົນບ້ານນໍ້າແກ ແລະ ບ້ານຫ້ວຍຫ້ອມ ຈຳນວນ 52 ຄອບຄົວ ກໍໄດ້ປູກໝາກຖົ່ວເບີໃນເນື້ອທີ່ 10 ເຮັກຕາ ໄດ້ຜົນຜະລິດສະເລ່ຍເຖິງ 125 ໂຕນ, ປັດຈຸບັນໄດ້ເກັບກູ້ສຳເລັດແລ້ວ.
ຈຸດປະສົງການລົງຕິດຕາມຊຸກຍູ້ການປູກພືດລະດູແລ້ງໃນຄັ້ງນີ້: ແມ່ນເພື່ອລົງຊຸກຍູ້ສົ່ງເສີມ ແລະ ຕິດຕາມຄວາມຄືບໜ້າການດຳເນີນງານຂອງບັນດາບໍລິສັດ ແລະ ປະຊາຊົນທີ່ທຳການຜະລິດ, ຊ່ວຍອຳນວຍຄວາມສະດວກ ແລະ ແກ້ໄຂຂໍ້ຫຍຸ້ງຍາກຕ່າງໆທີ່ເກີດຂຶ້ນຕົວຈິງ; ພ້ອມທັງເປັນການຊຸກຍູ້ໃຫ້ປະຊາຊົນຫັນມາໝູນໃຊ້ດິນຫວ່າງເປົ່າໃນລະດູແລ້ງໃຫ້ເກີດປະໂຫຍດສູງສຸດ ເພື່ອສ້າງວຽກເຮັດງານທຳ, ສ້າງລາຍຮັບເພີ່ມເຂົ້າສູ່ຄອບຄົວ ແກ້ໄຂຄວາມທຸກຍາກເທື່ອລະກ້າວ ແລະ ປະກອບສ່ວນສຳຄັນເຂົ້າໃນການພັດທະນາເສດຖະກິດ-ສັງຄົມຂອງເມືອງໃຫ້ຂະຫຍາຍຕົວຢ່າງຕໍ່ເນື່ອງ.
(ແຫຼ່ງຂ່າວ: ເມືອງຫຼວງນໍ້າທາ)
ຄໍາເຫັນ