ການນຳເມືອງໄຊພູທອງ ແລະ ເມືອງສອງຄອນ ຮ່ວມເປີດງານຊ່ວງເຮືອປະເພນີ ທີ່ອໍາເພີຊານຸມານ ຣາຊະອານາຈັກໄທ

ເມື່ອບໍ່ດົນມານີ້, ການນຳເມືອງໄຊພູທອງນຳໂດຍ ທ່ານ ພົມມາ ສົງວິໄລ ຮອງເຈົ້າເມືອງໄຊພູທອງ ແລະ ທ່ານ ຄໍາຜັ້ນ ອິນທະວົງ ຮອງເຈົ້າເມືອງສອງຄອນ ແຂວງສະຫວັນເຂດ ພ້ອມດ້ວຍຄະ ນະໄດ້ເຂົ້າຮ່ວມເປີດງານຊ່ວງເຮືອປະເພນີປະຈໍາປີ 2566 ທີ່ອໍາເພີຊານຸມານ ແຂວງອໍານາດຈະເລີນ ຣາຊະອານາຈັກໄທ ເປັນກຽດຕ້ອນຮັບຂອງ ທ່ານ ເສນີ ສົ້ມຂຽວຫວານ ຮອງຜູ້ວ່າຣາຊະການແຂວງອໍານາດຈະເລີນ ຣາຊະອານາຈັກໄທ, ມີທ່ານ ພົນກິດ ເຮືອງສຸກໃສ ນາຍອໍາເພີຊານຸມານ, ທ່ານ ທົດສະພົນ ກະແສເສນ ນາຍົກເທດສະມົນຕີຕໍາບົນຊານຸມານ ແຂວງອໍານາດຈະເລີນຣາຊະອານາຈັກໄທ ເຂົ້າຮ່ວມ.
ການຈັດງານຄັ້ງນີ້, ເພື່ອເປັນການອະນຸລັກ ສົ່ງເສີມຮີດຄອງປະເພນີທີ່ເຄີຍປະຕິບັດກັນມາແຕ່ບູຮານນະການ ຍັງເປັນການເສີມຂະຫຍາຍທາງດ້ານທຸລະກິດການຄ້າ, ການລົງທຶນ, ການທ່ອງທ່ຽວ ລວມໄປເຖິງສາຍພົວພັນມິດຕະພາບລະຫວ່າງເມືອງໄຊພູທອງ ແລະ ເມືອງສອງຄອນ ແຂວງສະຫວັນ ເຂດ ສປປ ລາວ ກັບແຂວງອໍານາດຈະເລີນ ຣາຊະອານາຈັກໄທໃຫ້ໝັ້ນຄົງຂະໜົງແກ່ນຕະຫຼອດໄປ.
ໂອກາດນີ້, ທ່ານ ພົມມາ ສົງວິໄລ ແລະ ທ່ານ ຄໍາຜັ້ນ ອິນທະວົງ ກ່າວວ່າ: ການຮ່ວມງານບຸນຊ່ວງເຮືອຄັ້ງນີ້ ຍັງເປັນການແລກປ່ຽນວັດທະນະທຳອັນດີງາມຂອງທ້ອງຖິ່ນສອງຝັ່ງແມ່ນ້ຳຂອງ ຍັງເປັນການເສີມຂະຫຍາຍສາຍພົວພັນອັນດີງາມໃນຖານະເປັນບ້ານໃກ້ເຮືອນຄຽງ ໃຫ້ມີຄວາມແໜ້ນແຟ້ນຍິ່ງຂຶ້ນ ທັງເປັນການສົ່ງເສີມການຮ່ວມມືເພື່ອພັດທະນາທາງດ້ານເສດຖະກິດ, ການຄ້າ, ການສຶກສາ, ການທ່ອງທ່ຽວລະຫວ່າງສອງຝັ່ງແມ່ນໍ້າຂອງລາວ-ໄທ, ໄທ-ລາວ ແລະ ດ້ານອື່ນໆ, ຈາກນັ້ນ, ຄະນະຜູ້ແທນຮ່ວມກັນລັ່ນຄ້ອງເພື່ອເປີດງານຊ່ວງເຮືອປະຈຳປີ ພ.ສ 2566 ຢ່າງເປັນທາງການ.
 ຂ່າວ-ພາບ: ສະຫວັນນະເຂດ