ການເງິນບໍລິຄໍາໄຊເກັບລາຍຮັບໄດ້ລື່ນແຜນການ

ໂດຍ:ວັນໄຊ ຕະວິນຍານ

ດ້ວຍຄວາມພະຍາຍາມເປັນເຈົ້າການຈັດຕັ້ງປະຕິບັດບັນດາ ມະຕິ,ຄໍາສັ່ງ,ລະບຽບກົດໝາຍ ແລະ ນິຕິກໍາຕ່າງໆ ຂອງຂະແໜງການເງິນ ຢ່າງຮັດກຸມເຂົ້າໃນການຄຸ້ມຄອງແຜນງົບປະມານ ຕິດພັນກັບ ການຈັດຕັ້ງປະຕິບັດມະຕິກອງປະຊຸມສະພາປະຊາຊົນແຂວງສະໄໝສາມັນເທື່ອທີ 4,ກອງປະຊຸມສະໄໝສາມັນເທື່ອທີ 5 ປະຈໍາປີ 2023 ເຂົ້າສູ່ວຽກງານຕົວຈິງຈຶ່ງເຮັດໃຫ້ການຈັດຕັ້ງປະຕິບັດແຜນງົບປະມານ ປີ 2023 ຜ່ານມາ ຂອງພະແນກການເງິນແຂວງບໍລິຄໍາໄຊມີຫຼາຍວຽກງານ ມີຜົນສໍາເລັດ ແລະ ລື່ນຄາດໝາຍຈໍານວນໜຶ່ງ.
ທ່ານ ດວງຕາ ເພຍແກ້ວ ຮອງຫົວໜ້າພະແນກການເງິນແຂວງບໍລິຄໍາໄຊກ່າວຕໍ່ກອງປະຊຸມສະໄໝສາມັນເທື່ອທີ 6 ຂອງສະພາປະຊາຊົນແຂວງ ຊຸດທີ II ໃນທ້າຍເດືອນທັນວາ ປີ 2023 ວ່າ:ໃນ ປີ 2023ຜ່ານມາ,ອັນພົ້ນເດັ່ນແມ່ນການຄຸ້ມຄອງຈັດເກັບລາຍຮັບງົບປະມານຍ້ອນພະແນກການເງິນແຂວງໄດ້ສຸມໃສ່ຜັນຂະຫຍາຍຈັດຕັ້ງປະຕິບັດມາດຕະການຕ່າງໆ ຕາມຄໍາສັ່ງເລກທີ 18/ນຍ ແລະ ຄໍາສັ່ງເລກທີ 25/ຂບຊ ວ່າດ້ວຍການຄຸ້ມຄອງ ແລະ ຕ້ານການຮົ່ວໄຫຼຂອງລາຍຮັບງົບປະມານແຫ່ງລັດ, ຕິດພັນກັບການປະຕິບັດມາດຕະການ ວ່າດ້ວຍການແກ້ໄຂ ຄວາມຫຍຸ້ງຍາກທາງດ້ານເສດຖະກິດ-ການເງິນ ຂອງຂະແໜງການເງິນ ທີ່ກໍານົດໄວ້,ເອົາໃຈໃສ່ຄຸ້ມຄອງການນໍາເຂົ້າ-ສົ່ງອອກສິນຄ້າຜ່ານດ່ານຢ່າງເຂັ້ມງວດ ຮັດກຸ່ມ, ດ້ວຍລະບົບຄຸ້ມຄອງພາສີ ເປັນທັນສະໄໝ ແຈ້ງພາສີຜ່ານລະບົບອາຊີກູດະ (ASYCUDA) ແລະ ການຊໍາລະຄ່າພາສີ-ອາກອນ ຜ່ານທະນາຄານດ້ວຍລະບົບ ສະມາດແທັກ (SmartTax) ເຊື່ອມໂຍງອິນເຕີເນັດ (Internet), ໂດຍສະເພາະໝວດສິນຄ້າທີ່ເປັນແຫຼ່ງລາຍຮັບຕົ້ນຕໍເຊັ່ນ: ນໍ້າມັນເຊື້ອໄຟ, ເຄື່ອງອຸປະໂພກ-ບໍລິໂພກ, ພາຫະນະ-ອາໄຫຼ່ເຄື່ອງກໍ່ສ້າງ ແລະ ອື່ນໆ; ຄຸ້ມຄອງສິນຄ້ານໍ້າເຂົ້າ-ສົ່ງອອກ ໂດຍນໍາໃຊ້ໂປຣແກຣມຄຸ້ມຄອງແຜນນໍາເຂົ້າມາສເຕີຣີດ (Master List) ຕາມບົດແນະນໍາຂອງກົມພາສີ ເລກທີ 3849/ກພສ ວ່າດ້ວຍການນໍາໃຊ້ລະບົບການ ຄຸ້ມຄອງແຜນນໍາເຂົ້າສິນຄ້າເຄື່ອງຂອງຍົກເວັ້ນ, ງົດເກັບ ຫຼື ເສຍພາສີຫຼຸດຜ່ອນ ດ້ວຍຄວາມຮັດກຸມ; ສຸມໃສ່ຕ້ານ ແລະ ສະກັດກັ້ນການລັກລອບສິນຄ້າໜີພາສີໃນດ່ານ-ນອກດ່ານ, ໂດຍໄດ້ເພີ່ມທະວີ ຕິດຕາມ, ກວດກາ  ພາຫະນະນໍາເຂົ້າແບບທ່ອງທ່ຽວຢ້ຽມຢາມ ແລະ ນໍາເຂົ້າບໍ່ຖືກຕ້ອງ, ການນໍາໃຊ້ ພາຫະນະໃນຂອບສົ່ງເສີມການລົງທຶນບໍ່ຖືກເປົ້າໝາຍ, ການນໍາເຂົ້າ, ການເຄື່ອນຍ້າຍສິນຄ້າ, ເຄື່ອງຂອງ ແລະ ອື່ນໆ; ພົ້ນເດັ່ນ ສາມາດແກ້ໄຂພາຫະນະນໍາເຂົ້າບໍ່ຖືກຕ້ອງ ຢູ່ 2 ເມືອງ (ວຽງທອງ ແລະ ໄຊຈໍາພອນ) ປະເພດລົດຈັກ ທີ່ໄດ້ຂຶ້ນບັນຊີໄວ້ຢູ່ພາສີປະຈໍາແຂວງ ຈໍານວນ 190 ຄັນ, ແກ້ໄຂໄດ້ 156 ຄັນ, ຍັງຄ້າງ 34 ຄັນ; ພະແນກການເງິນແຂວງໄດ້ສຸມໃສ່ໃນການຈັດເກັບລາຍຮັບອາກອນ ຈາກຖານທີ່ມີ ແລະ ຫົວໜ່ວຍທຸລະກິດທີ່ເກີດຂຶ້ນໃໝ່  ພາຍໃນແຂວງ ແລະ ຖານລາຍຮັບຈາກຫົວໜ່ວຍທີ່ສູນກາງມອບເພີ່ມ ເພື່ອມອບເຂົ້າງົບປະມານ ດ້ວຍຄວາມຮັດກຸມຕາມກໍານົດເວລາ; ໄດ້ສຸມໃສ່ຄຸ້ມຄອງຖານລາຍຮັບ, ໂດຍຫັນເປັນທັນສະໄໝ ຄຸ້ມຄອງຂໍ້ມູນຜ່ານລະບົບແທັກຣີດ (TaxRIS), ໃນປີ 2023 ສາມາດຂະຫຍາຍລະບົບໄດ້ອີກ 1 ເມືອງ (ໄຊຈໍາພອນ), ສະນັ້ນ,ມາຮອດປັດຈຸບັນໃນທົ່ວແຂວງແມ່ນໄດ້ນໍາໃຊ້ລະບົບແທັກຣີດ (TaxRIS) ແລ້ວທຸກເມືອງ; ພ້ອມກັນນັ້ນ ໄດ້ສໍາເລັດການເອົາຫົວໜ່ວຍເຂົ້າໃນລະບົບແທັກຣີດ (TaxRIS) ຈໍານວນ 5.446 ຫົວໜ່ວຍ, ໃນນີ້: ພາກລັດ 583 ຫົວໜ່ວຍ (ສໍາເລັດ 100%), ພາກທຸລະກິດ 4.863 ຫົວໜ່ວຍ, ກວມເອົາ 98,78% ຂອງຫົວໜ່ວຍທັງໝົດ, ກວມເອົາ 89,29% ຂອງຫົວໜ່ວຍເປັນຖານລາຍຮັບ, ຂັ້ນແຂວງສໍາເລັດ 836 ຫົວໜ່ວຍ, ກວມເອົາ 99,64% ຂອງຫົວໜ່ວຍທັງໝົດ, ຂັ້ນ ເມືອງສໍາເລັດ 4.027 ຫົວໜ່ວຍ, ກວມເອົາ 98,62% ຂອງຫົວໜ່ວຍທັງໝົດ; ຫັນເອົາຫົວໜ່ວຍຈຸນລະວິສາຫະກິດເຂົ້າລະບົບອາກອນມູນຄ່າເພີ່ມ, ໂດຍອີງໃສ່ແຜນຕາມວາລະແຫ່ງຊາດ 290 ຫົວໜ່ວຍ, ສາມາດຂະຫຍາຍໄດ້ແລ້ວ238 ຫົວໜ່ວຍ, ກວມເອົາ 82,06%; ເກັບລາຍຮັບຈາກຄ່າທໍານຽມນໍາໃຊ້ພາຫະນະ ແລະ ຄ່າທໍານຽມສິດນໍາໃຊ້ທີ່ດິນ ປະຈໍາປີ 2023, ຄ່າທໍານຽມທາງ ປະຕິບັດໄດ້ 1,58 ຕື້ກີບ ເທົ່າກັບ 81,02% ຂອງແຜນປີ, ທຽບໃສ່ໄລຍະດຽວກັນປີຜ່ານມາ ເພີ່ມຂຶ້ນ 15,32%, ເປັນເງິນ 0,21 ຕື້ກີບ ແລະ ມີພາຫະນະທັງໝົດແຈ້ງເສຍຄ່າທໍານຽມທາງ ຈໍານວນ 7.413 ຄັນ ເທົ່າກັບ 15,70% (ຂໍ້ມູນ 47.206 ຄັນ), ທຽບໃສ່ ໄລຍະດຽວກັນປີຜ່ານມາ ມີພາຫະນະແຈ້ງເສຍເພີ່ມຂຶ້ນ 1.166 ຄັນ; ການຈັດເກັບລາຍຮັບຄ່າທໍານຽມສິດນໍາໃຊ້ທີ່ດິນ ປະຕິບັດບັດໄດ້ 4,96 ຕື້ກີບ ເທົ່າກັບ 77,69% ຂອງແຜນປີ, ທຽບໃສ່ໄລຍະດຽວກັນຂອງປີຜ່ານມາເພີ່ມຂຶ້ນ 3,74%; ໄດ້ລົງກວດກາໄລ່ລຽງບັນຊີແບບຄົບຊຸດ ຈໍານວນ 79 ບໍລິສັດ, ກວດເຫັນຈໍານວນເງິນຕ້ອງມອບຕື່ມຕາມບົດບັນທຶກກວດກາ ຈໍານວນ 4,97 ຕື້ກີບ, ໃນນີ້ເປັນໂຕເລກກວດກາໄດ້ຈາກການເຊື່ອງອໍາ ຈໍານວນ 1,14 ຕື້ກີບ; ຈັດເກັບລາຍຮັບຈາກຊັບສິນແຫ່ງລັດ, ໂດຍໄດ້ຊຸກຍູ້, ຕິດຕາມ ແລະ ເກັບກໍາຂໍ້ມູນ ລາຍຮັບຈາກຫົວໜ່ວຍທີ່ສູນກາງມອບເພີ່ມ, ໂດຍສົມທົບກັບຂະແໜງການທີ່ກ່ຽວຂ້ອງ, ເກັບກໍາຂໍ້ມູນຕິດພັນ ກັບໂຄງການເຂື່ອນໄຟຟ້າ, ຂຸດຄົ້ນແຮ່ທາດ ພາຍໃນແຂວງ, ເພື່ອເປັນຂໍ້ມູນໃນການຕິດຕາມເອົາລາຍຮັບຈາກ ຮ່ວງດັ່ງກ່າວ ເຊັ່ນ: ຄ່າພາກຫຼວງ, ຄ່າສໍາປະທານ, ຄ່າຊັບພະຍາກອນ ແລະ ອື່ນໆ ທີ່ຕິດພັນກັບໂຄງການ; ໄດ້ສຸມໃສ່ຄຸ້ມຄອງກິດຈະການເຊົ່າ-ສໍາປະທານ, ໂດຍປະສານສົມທົບກັບຂະແຫນງການທີ່ກ່ຽວຂ້ອງ, ໃນທົ່ວແຂວງ ມີສະຖິຕິຂໍ້ມູນຫົວໜ່ວຍເຊົ່າ-ສໍາປະທານທີ່ມີສັນຍາ ລວມທັງໝົດ 161 ຫົວໜ່ວຍ, ໃນນີ້: ແຂວງຄຸ້ມ ຄອງ 12 ຫົວໜ່ວຍ ແລະ ຂັ້ນເມືອງຄຸ້ມຄອງ 149 ຫົວໜ່ວຍ;ອັນພົ້ນເດັ່ນ ໃນປີ 2023 ສາມາດອອກສັນຍາ ແລະ ຕໍ່ສັນຍາໃໝ່ໄດ້ 22 ຫົວໜ່ວຍ ສ້າງລາຍຮັບເຂົ້າງົບປະມານຕາມສັນຍາໄດ້ 45.638,04 ໂດລາ; ເກັບລາຍຮັບຈາກຄ່າຊັບພະຍາກອນທໍາມະຊາດ ເຄື່ອງປ່າຂອງດົງ ແລະ ອື່ນໆ, ໂດຍສົມທົບກັບຂະແໜງການທີ່ກ່ຽວຂ້ອງ ໃນການເກັບກໍາຂໍ້ມູນການອອກອະນຸຍາດການຂຸດຄົ້ນ - ການສົ່ງອອກ, ຜ່ານການຈັດຕັ້ງປະຕິບັດສາມາດສ້າງລາຍຮັບເຂົ້າງົບປະມານ ຈາກປະເພດເຄື່ອງປ່າຂອງດົງ ໄດ້ 3 ຕື້ກ່ວາກີບ ແລະ ປະເພດຫີນສົ່ງອອກ ໄດ້ 91 ລ້ານກວ່າກີບ; ການເກັບກໍາຂໍ້ມູນຂຶ້ນບັນຊີຊັບສິນຂອງລັດ ທີ່ສານຕັດສິນໄດ້ຢ່າງເດັດຂາດ ຕາມດໍາລັດ 280/ລບ ໂດຍປະສານສົມທົບກັບຂະແໜງການທີ່ກ່ຽວຂ້ອງ, ຜ່ານການຈັດຕັ້ງປະຕິບັດສາມາດສັງລວມພາຫະນະທີ່ສານ ຕັດສິນຮິບເປັນຂອງລັດ ໄດ້ຈໍານວນ 38 ຄັນ, ໃນນີ້: ລົດຈັກ 45 ຄັນ, ລົດໃຫຍ່ 6 ຄັນ; ພ້ອມນັ້ນ ກໍໄດ້ປະສານກັບຂະແໜງການທີ່ກ່ຽວຂ້ອງ ເລັ່ງໃນການແກ້ໄຂບັນຫາຕິດພັນກັບຜົນການກວດສອບປະຜ່ານ ໂດຍແກ້ໄຂສະສາງບັນຊີ ລົດໃຫຍ່ 3 ຄັນ, ລົດຈັກ 24 ຄັນ;ອັນພົ້ນເດັ່ນອີກອັນໜຶ່ງພະແນກການເງິນແຂວງສາມາດແກ້ໄຂຜົນແນະນໍາຜົນຂອງການກວດສອບ, ໂດຍສະເພາະບັນຫາໜີ້ສິນຄ້າງມອບພັນທະຕ່າງໆ, ໃນປີ 2023 ຜ່ານມາ,ໄດ້ເລັ່ງແກ້ໄຂບັນຫາໜີ້ສິນທີ່ຍັງຄ້າງໄດ້ 279 ລ້ານກວ່າກີບ ແລະ ຈໍານວນ 37.134,96 ໂດລາ; ໜີ້ສິນອາກອນ ໄດ້ 151 ລ້ານກີບ. 
ກ່ຽວກັບການຄຸ້ມຄອງລາຍຈ່າຍງົບປະມານ ພະແນກການເງິນແຂວງໄດ້ຄຸ້ມຄອງລາຍຈ່າຍງົບປະມານປະຈໍາປີ, ໂດຍການຈັດສັນ ແລະ ເບີກຈ່າຍຕາມກອບແຜນທີ່ສະພາໄດ້ຮັບຮອງ, ໂດຍຈັດຕັ້ງປະຕິບັດແຜນລາຍຈ່າຍງົບປະມານຕາມສາລະບານງົບປະມານບັນຊີດຽວ ຕາມກອບໂຕເລກແຜນງົບປະມານປະຈໍາປີ, ປະຈໍາງວດ ທີ່ກະຊວງການເງິນແຈ້ງໃຫ້ ເຂົ້າໃນລະບົບຄຸ້ມຄອງຫັນເປັນທັນສະໄໝ ດ້ວຍລະບົບຂໍ້ມູນຂ່າວ ສານການເງິນ (GFIS ຫຼື GFIS+) ແລະ ລະບົບ (RTIS); ເບີກຈ່າຍເງິນງົບປະມານ, ໂດຍຖືເອົາການເບີກຈ່າຍເງິນເດືອນ-ເງິນອຸດໜູນ ເປັນບຸລິມະສິດ, ພົ້ນເດັ່ນຜ່ານມາແມ່ນສາມາດເບີກຈ່າຍທັນຕາມກໍານົດເວລາໃນແຕ່ເດືອນ ແລະ ເບີກຈ່າຍເງິນຮ່ວງອື່ນໆ ເຊັ່ນ: ບໍລິຫານ,ດັດສົມ-ສົ່ງເສີມ, ເງິນຊື້ໃໝ່ ເງິນລົງທຶນຂອງລັດ ແລະ ອື່ນໆ ຕາມກອບແຜນທີ່ສະພາຮັບຮອງ.