ທີມນັກຄົ້ນຄວ້າໄດ້ກວດສອບການທົດລອງສຸ່ມແບບມີກຸ່ມຄວບຄຸມ ຈຳນວນ 59 ຄັ້ງ ຊຶ່ງມີຜູ້ເຂົ້າຮ່ວມຫຼາຍກວ່າ 9,000 ຄົນ ແລະ ພົບວ່າຜູ້ທີ່ເຂົ້າຮ່ວມໃນໂຄງການອອກກຳລັງກາຍມີໂອກາດເຊົາສູບຢາໄດ້ຢ່າງຕໍ່ເນື່ອງຫຼາຍກວ່າກຸ່ມຄວບຄຸມ 15% ແລະ ມີໂອກາດທີ່ຈະງົດສູບຢາເປັນເວລາເຈັດມື້ ສູງກວ່າກຸ່ມຄວບຄຸມ 21%. ນອກຈາກນັ້ນ, ຍັງພົບວ່າການອອກກຳລັງກາຍສາມາດຊ່ວຍຫຼຸດຜ່ອນການສູບຢາໄດ້ໂດຍສະເລ່ຍ 2 ກອກຕໍ່ມື້ ແລະ ການອອກກຳລັງກາຍພຽງຄັ້ງດຽວສາມາດຫຼຸດຜ່ອນຄວາມຢາກສູບຢາໄດ້ທັນທີເຖິງ 30 ນາທີ.
ທ່ານສາດສະດາຈານ ແຄໂຣລ ມາເຮີ ນັກຄົ້ນຄວ້າອາວຸໂສຂອງການສຶກສາຈາກມະຫາວິທະຍາໄລ Adelaideກ່າວວ່າ: ການອອກກຳລັງກາຍສາມາດຊ່ວຍຈັດການກັບຄວາມຢາກສູບຢາໃນໄລຍະສັ້ນໄດ້ ແຕ່ຄວນໃຊ້ເປັນວິທີເສີມ, ບໍ່ແມ່ນວິທີການທົດແທນການປິ່ນປົວທີ່ມີຫຼັກຖານທາງວິທະຍາສາດຮອງຮັບເຊັ່ນ: ການເຂົ້າຮັບຄຳປຶກສາ ແລະ ການໃຊ້ຢາເພື່ອຊ່ວຍເຊົາສູບຢາ.
ອົງການອະນາໄມໂລກ (WHO) ລະບຸວ່າ: ການສູບຢາຍັງຄົງເປັນສາເຫດຫຼັກຂອງການເສຍຊີວິດກ່ອນໄວອັນຄວນທີ່ສາມາດປ້ອງກັນໄດ້, ໂດຍມີຜູ້ເສຍຊີວິດຈາກການສູບຢາປະມານ 7 ລ້ານຄົນຕໍ່ປີທົ່ວໂລກ. ຢ່າງໃດກໍຕາມ, ນັກຄົ້ນຄວ້າກ່າວວ່າ ຕ້ອງມີການຄົ້ນຄວ້າຕື່ມອີກເພື່ອປະສົມປະສານການອອກກຳລັງກາຍເຂົ້າໃນໂຄງການຊ່ວຍເຊົາສູບຢາໃນຊີວິດຕົວຈິງ ແລະ ເພື່ອປະເມີນບົດບາດຂອງການອອກກຳລັງກາຍໃນການຊ່ວຍໃຫ້ຄົນເຊົາສູບຢາໄຟຟ້າ.
ທັງນີ້, ການສຶກສາດັ່ງກ່າວໄດ້ຖືກຕີພິມໃນວາລະສານວິທະຍາສາດກິລາ ແລະ ສຸຂະພາບ.
ຄໍາເຫັນ