ການພັດທະນາໂຄ່ງລ່າງຊົນນະບົດ ພາກເໜືອ ຈັດຕັ້ງປະຕິບັດສໍາເລັດ 100%

ເມື່ອບໍ່ດົນມານີ້, ທີ່ຫ້ອງປະຊຸມຂອງພະແນກກະສິກໍາ ແລະ ປ່າໄມ້ ແຂວງອຸດົມໄຊ ໄດ້ຈັດກອງປະຊຸມຄະນະຊີ້ນໍາໂຄງການພັດທະນາໂຄງລ່າງຊົນນະບົດ ພາກເໜືອ-ທຶນເພີ່ມ, ສະຫຼູບການຈັດຕັ້ງປະຕິບັດວຽກງານຂອງໂຄງການ ແລະ ປິດໂຄງການ ໂດຍການເປັນປະທານຂອງທ່ານ ບຸນເກີດ ສະໜອງໄຊ ຮັກສາການຫົວໜ້າພະແນກກະສະກໍາ ແລະ ປ່າໄມ້ ແຂວງອຸດົມໄຊ, ທ່ານ ນາງ ບຸນທຽນ ວົງໄກສອນ ຮອງຫົວໜ້າກົມຊົນລະປະທານ, ມີພາກສ່ວນກ່ຽວຂ້ອງອ້ອມຂ້າງແຂວງ ແລະ ຜູ້ປະສານງານໂຄງການຂັ້ນແຂວງ, ເມືອງເຂົ້າຮ່ວມ.
 ທ່ານ ບຸນມີ ສຸທິວົງ ຫົວໜ້າໜ່ວຍງານຄຸ້ມຄອງໂຄງການປະຈໍາແຂວງອຸດົມໄຊ ໄດ້ຜ່ານບົດສະຫຼູບລາຍງານການຈັດຕັ້ງປະຕິບັດວຽກງານຂອງໂຄງການພັດທະນາໂຄງລ່າງຊົນນະບົດພາກເໜືອ-ທຶນເພີ່ມ: ໂຄງການໄດ້ຮັບການອະນຸມັດງົບປະມານຊ່ວຍເຫຼືອລ້າຈາກທະນາຄານພັດທະນາອາຊີໃນວັນທີ 31 ພຶດສະພາ 2017 ຈໍານວນ 35,6 ລ້ານໂດລາ, ທຶນສົມທົບຂອງລັດຖະບານ 2 ລ້ານ ໂດລາ ມີໄລຍະການຈັດຕັ້ງປະຕິບັດໂຄງການ: ປີ 2017-2024, ໂຄງການນີ້ໄດ້ຈັດຕັ້ງປະຕິບັດຢູ່ 4 ແຂວງພາກເໜືອຄື: ແຂວງອຸດົມໄຊ, ຜົ້ງສາລີ, ຫຼວງນໍ້າທາ ແລະ ແຂວງບໍ່ແກ້ວ. ສໍາລັບຢູແຂວງອຸດົມໄຊ ໄດ້ຈັດຕັ້ງປະຕິບັດຢູ່ 2 ເມືອງຄື: ເມືອງແບງ ແລະ ເມືອງຮຸນ, ໄດ້ຮັບການລົງທຶນໃສ່ໃນການກໍ່ສ້າງຟື້ນຟູ ພື້ນຖານໂຄງລ່າງດ້ານຊົນລະປະທານຈໍານວນ 4 ໂຄງການ (ເມືອງລະ 2 ໂຄງການ), ສ້າງຕັ້ງກຸ່ມຜູ້ຊົມໃຊ້ນໍ້າ ຈໍານວນ 14 ກຸ່ມ ແລະ ໄດ້ຝຶກອົບຮົມສ້າງຄວາມເຂັ້ມແຂງໃຫ້ກຸ່ມ ດ້ານການບໍລິຫານກຸ່ມ, ການຄຸ້ມຄອງການເງິນ, ການຄຸ້ມຄອງນໍາໃຊ້ລະບົບຊົນລະປະທານ, ການສົ່ງເສີມກະສິກໍາ, ການຕະຫຼາດຜະລິດຕະພັນກະສິກໍາ, ການປູກຝັງຕາມສັນຍາຜູກພັນການຜະລິດ. ແຕ່ລະໜ້າວຽກຂອງໂຄງການໄດ້ຈັດຕັ້ງປະຕິບັດສໍາເລັດ 100% ແລະ ໄດ້ມອບ-ໂອນໃຫ້ກຸ່ມເປັນຜູ້ຄຸ້ມຄອງນໍາໃຊ້, ບົວລະບັດຮັກສາ. ຈຸດປະສົງຫຼັກຂອງໂຄງການແມ່ນຟື້ນຟູພື້ນຖານໂຄງລ່າງດ້ານຊົນລະປະທານເພື່ອຜະລິດສະບຽງອາຫານ ແລະ ຜະລິດເປັນສິນຄ້າ ສ້າງລາຍຮັບໃຫ້ປະຊາຊົນ ເຮັດໃຫ້ຊີວິດການເປັນຢູ່ຂອງເຂົາເຈົ້າດີຂຶ້ນ. 
(ຂ່າວ: ແສງອາທິດ)