ການປຸກສ້າງ,ປ່ອຍນໍ້າເປື້ອນ ຍັງເປັນອຸປະສັກກະທົບທາງດ້ານສິ່ງແວດລ້ອມ

ທ່ານ ປັນຍາ ມະນີວົງ ຫົວໜ້າຫ້ອງການ ຄຸ້ມຄອງ ແລະ ບໍລິການຕົວເມືອງວຽງຈັນ (ຄບຕ) ໄດ້ຊີ້ແຈ້ງ ຕໍ່ຄໍາຊັກຖາມ ຂອງສະມາຊິກສະພາແຫ່ງຊາດ ປະຈຳເຂດເລືອກຕັ້ງທີ 1 ນວ ແລະ ສະມາຊິກ ສະພາປະຊາຊົນ ນວ ຕໍ່ກອງປະຊຸມສະໄໝສາມັນ ເທື່ອທີ 10 ຂອງສະພາປະຊາຊົນ ນະຄອນຫຼວງວຽງຈັນ ຊຸດທີ IV ທີ່ຫ້ອງປະຊຸມອົງການປົກຄອງນະຄອນຫຼວງວຽງຈັນ (ນວ), ກ່ຽວກັບການຄຸ້ມຄອງຮ່ອງລະບາຍນໍ້າໃນ ນວ ຊຶ່ງໄດ້ລາຍງານ ວ່າ: ໄລຍະຜ່ານມາ, ອົງການປົກຄອງ ນວ ກໍຄື ຫ້ອງການຄຸ້ມຄອງ ແລະ ບໍລິການຕົວເມືອງວຽງຈັນ ສົມທົບພາກສ່ວນກ່ຽວຂ້ອງ ເປັນເຈົ້າການໃນການຄຸ້ມຄອງ, ຕິດຕາມ, ກວດກາ, ປົກປັກຮັກສາ, ສ້ອມແປງ ແລະ ໄດ້ເຮັດອະນາໄມ, ລວງຮ່ອງລະບາຍນໍ້າ ໃນ ນວ ເປັນຕົ້ນ: ຮ່ອງນໍ້າສັກ, ຮ່ອງແຊງ ແລະ ຮ່ອງທອງ, ເພື່ອຮອງຮັບປະລິມານນໍ້າຈາກຄົວເຮືອນ, ຊຸມຊົນ, ຮອງຮັບປະລິມານນໍ້າຝົນໃນລະດູຝົນ, ຫຼີກລ່ຽງບັນຫານໍ້າອັ່ງໃນຕົວເມືອງ ກໍຄື ການຕ້ານຖ້ວມ. ເຖິງແນວໃດກໍຕາມ ການຄຸ້ມຄອງ-ປົກປັກຮັກສາ ລະບົບຮ່ອງລະບາຍນໍ້າໃນຕົວເມືອງ ຍັງພົບບັນຫາຄວາມຫຍຸ້ງຍາກໃນຫຼາຍດ້ານ ຕິດພັນກັບການມີສ່ວນຮ່ວມ ຂອງທຸກພາກສ່ວນໃນສັງຄົມ ໂດຍສະເພາະ ຍັງມີສະພາບການບຸກລຸກ ເຊັ່ນ: ການປຸກສ້າງກວມເຂດສະຫງວນ ຂອງຮ່ອງລະບາຍນໍ້າ, ຖົມດິນຕັນແລວການໄຫຼຂອງນໍ້າ, ການຖິ້ມຂີ້ເຫຍື້ອ ຫຼື ສິ່ງເສດເຫຼືອລົງໃສ່ຮ່ອງນໍ້າ, ເຮັດໃຫ້ມີຄວາມຫຍຸ້ງຍາກໃນການອະນາໄມ. ນອກນັ້ນ, ການປ່ອຍນໍ້າເປື້ອນຈາກຄົວເຮືອນ, ຊຸມຊົນ ທີ່ບໍ່ໄດ້ຜ່ານການບຳບັດ, ປ່ອຍໂດຍກົງລົງສູ່ຮ່ອງລະບາຍນໍ້າ ເກີດຜົນກະທົບທາງດ້ານສິ່ງແວດລ້ອມ ລວມທັງການພັດທະນາ ນໍາໃຊ້ພື້ນທີ່ຮ່ອງດໍາເນີນກິດຈະການຕ່າງໆ ກໍຍັງສ້າງຄວາມຫຍຸ້ງຍາກ ໃນການອະນາໄມ-ລວງຮ່ອງ ແລະ ບັນຫາອື່ນໆ.

ການແກ້ໄຂບັນຫາທີ່ເກີດຂຶ້ນ, ອົງການປົກຄອງ ນວ ຖືເປັນບັນຫາທີ່ສໍາຄັນ ໄດ້ມອບໃຫ້ ບັນດາພາກສ່ວນກ່ຽວຂ້ອງ ເປັນຕົ້ນພະແນກໂຍທາທິການ ແລະ ຂົນສົ່ງ ນວ ອອກໜັງສືແຈ້ງການ ເຖິງພາກສ່ວນຜູ້ພັດທະນາໄດ້ຮັບຊາບ ແລະ ເຂົ້າໃຈ ໃນການຈັດຕັ້ງປະຕິບັດການຄຸ້ມຄອງ, ປົກປັກຮັກສາ, ການອະນາໄມ, ລວງຮ່ອງ ໂດຍສະເພາະ ໄລຍະຜ່ານມາ ໄດ້ລົງແນະນໍາທາງດ້ານເຕັກນິກ, ກຳນົດເປີດຈຸດລົງອະນາໄມ ແລະ ຕ້ອງເຮັດອະນາໄມຢ່າງໜ້ອຍ 1 ຄັ້ງ/ປີ, ໄດ້ສົມທົບກັບອົງການປົກຄອງເມືອງ, ບ້ານ, ໂຄສະນາເຜີຍແຜ່ ບັນດານິຕິກຳ ຕິດພັນກັບການປົກປັກຮັກສາ, ການມີສ່ວນຮ່ວມ ລວມທັງຂໍ້ຫ້າມ ກໍຄື ມາດຕະການຕໍ່ຜູ້ສ້າງຜົນເສຍຫາຍຕໍ່ຮ່ອງລະບາຍນໍ້າ, ຄົ້ນຄວ້າ, ສຶກສາກົນໄກການແກ້ໄຂສະພາບນໍ້າເປື້ອນ ທີ່ສົ່ງຜົນກະທົບດ້ານສິ່ງແວດລ້ອມ ເຊັ່ນ: ແຜນການດູດນໍ້າຂອງ ເຂົ້າຄອງລະບາຍນໍ້າ, ເພື່ອເປັນການລ້າງຮ່ອງລະບາຍນໍ້າ ໃນລະດູແລ້ງ ຊຶ່ງປະກອບມີ 3 ຈຸດ ຄື: ຈຸດບ້ານອາກາດ, ຈຸດປາກປ່າສັກ ແລະ ຈຸດໂຮງແຮມແລນມາກ.

ໃນຕໍ່ໜ້າ ຖ້າຫາກວ່າ ປວງຊົນເພີ່ມຄວາມເອົາໃຈໃສ່ ບໍ່ປຸກສ້າງກວມຮ່ອງລະບາຍນໍ້າ, ບໍ່ຖິ້ມສິ່ງເປື້ອນ-ເສດເຫຼືອລົງຮ່ອງນໍ້າ ການລະບາຍນໍ້າໃນຕົວເມືອງ-ນະຄອນຫຼວງວຽງຈັນ ກໍຈະລະບາຍໄດ້ດີຂຶ້ນ ແລະ ຈະບໍ່ມີກິ່ນເນົ່າເໝັນ.