ຂໍ້ມູນຈາກ Kpler, ບໍລິສັດຕິດຕາມຂໍ້ມູນການຂົນສົ່ງ ລະບຸວ່າ: ການສົ່ງອອກ LNG ສະເລ່ຍ 10 ມື້ໄດ້ຫຼຸດລົງປະມານ 20% ນັບຕັ້ງແຕ່ຕົ້ນເດືອນມີນາ ມາຢູ່ທີ່ 1.1 ລ້ານໂຕນ ຊຶ່ງເປັນລະດັບຕໍ່າສຸດນັບຕັ້ງແຕ່ເດືອນກັນຍາ 2025. ໂດຍກາຕາມີການສົ່ງອອກຫຼຸດລົງຫຼາຍທີ່ສຸດ, ຮອງລົງມາແມ່ນ ສະຫະລັດ ອາຣັບ ເອມິເຣດ, ຍ້ອນວ່າທັງສອງປະເທດອາໄສຊ່ອງແຄບຮໍມຸສ ໃນການສົ່ງອອກໄປຍັງຕະຫຼາດອາຊີ ແລະ ເອີຣົບ.
ອີຣານ ໄດ້ໂຈມຕີເຂດອຸດສາຫະກຳ Ras Laffan ຂອງກາຕາ ຊຶ່ງເປັນພື້ນຖານໂຄງລ່າງສົ່ງອອກອາຍແກ໊ສທຳມະຊາດແຫຼວ (LNG) ທີ່ໃຫຍ່ທີ່ສຸດໃນໂລກ, ເຮັດໃຫ້ເກີດຄວາມເສຍຫາຍ ແລະ ຄາດວ່າຈະສົ່ງຜົນກະທົບຕໍ່ການສະໜອງພະລັງງານໃນອີກຫຼາຍປີຂ້າງໜ້າ. ໂດຍອີຣານໄດ້ໂຈມຕີພື້ນທີ່ດັ່ງກ່າວເພື່ອຕອບໂຕ້ການໂຈມຕີຂອງອິສຣາແອນຕໍ່ບໍ່ອາຍແກ໊ສ South Pars ຂອງອີຣານ.
ໃນປີ 2025, ປະລິມານການສົ່ງອອກ LNG ຂອງໂລກເພີ່ມຂຶ້ນຢ່າງຕໍ່ເນື່ອງ, ໂດຍສະເພາະຈາກໂຄງການໃໝ່ໃນສະຫະລັດ ອາເມຣິກາ ແລະ ການາດາ. ແຕ່ປັດຈຸບັນ, ການສົ່ງອອກທີ່ຫຼຸດລົງຈາກກາຕາ ແລະ ການປິດຊ່ອງແຄບຮໍມຸສ ໄດ້ສົ່ງຜົນກະທົບຕໍ່ການສະໜອງໃນຕະຫຼາດ, ໂດຍຊ່ອງແຄບຮໍມຸສຖືເປັນເສັ້ນທາງທີ່ສຳຄັນສຳລັບການສົ່ງອອກ LNG ປະມານໜຶ່ງສ່ວນຫ້າຂອງໂລກ.
ກອງບັນຊາການສູນກາງຄາຕາມ ອັລ-ອັນບີຢາ ຂອງອີຣານ ໄດ້ເຕືອນວ່າ: ຈະແນໃສ່ພື້ນຖານໂຄງລ່າງພະລັງງານ, ເຕັກໂນໂລຊີຂໍ້ມູນຂ່າວສານ ແລະ ລະບົບນໍ້າຈືດທັງໝົດຂອງສະຫະລັດ ອາເມຣິກາ ແລະ ພັນທະມິດໃນພາກພື້ນ ຖ້າຫາກພື້ນຖານໂຄງລ່າງພະລັງງານຂອງອີຣານຖືກໂຈມຕີ.
ຄຳເຕືອນນີ້ເກີດຂຶ້ນພຽງແຕ່ໜຶ່ງມື້ຫຼັງຈາກ ທ່ານ ໂດໂນ ທຣໍາ ປະທານາທິບໍດີສະຫະລັດ ອາເມຣິກາ ໄດ້ຂົ່ມຂູ່ໃນສື່ສັງຄົມອອນລາຍໃນວັນທີ 21 ມີນາ ຜ່ານມາວ່າ: ສະຫະລັດ ອາເມຣິກາ ຈະທຳລາຍໂຮງໄຟຟ້າຂອງອີຣານ. ຖ້າອີຣານບໍ່ເປີດຊ່ອງແຄບຮໍມຸສຄືນໃໝ່ຢ່າງເຕັມຮູບແບບພາຍໃນ 48 ຊົ່ວໂມງ.
ຄໍາເຫັນ