ຢ່າງໃດກໍຕາມ, ການສົ່ງອອກຂອງຍີ່ປຸ່ນໃນເດືອນກັນຍາ ໄດ້ເພີ່ມຂຶ້ນໜ້ອຍກວ່າທີ່ນັກວິເຄາະໄດ້ຄາດຄະເນໄວ້ວ່າຈະເພີ່ມຂຶ້ນ 4.6%.
ສ່ວນການນໍາເຂົ້າໃນເດືອນກັນຍາຂອງຍີ່ປຸ່ນເພີ່ມຂຶ້ນ 3.3%, ຟື້ນຕົວຈາກການຫຼຸດລົງ 5.2% ໃນເດືອນສິງຫາແລະ ສູງກວ່ານັກວິເຄາະຄາດຄະເນວ່າຈະເພີ່ມຂຶ້ນພຽງ 0.6%. ທັງນີ້, ຍີ່ປຸ່ນຂາດດຸນການຄ້າ 234.6 ຕື້ເຢນ (1.54 ຕື້ໂດລາ) ໃນເດືອນກັນຍາ ຜ່ານມາ.
ສຳລັບການສົ່ງອອກໄປອາຊີເພີ່ມຂຶ້ນ 9.2% ໃນເດືອນກັນຍາ ເມື່ອທຽບໃສ່ປີກາຍ, ໃນຂະນະທີ່ການສົ່ງອອກໄປສະຫະລັດ ອາເມຣິກາ, ຄູ່ຄ້າໃຫຍ່ອັນດັບສອງຂອງຍີ່ປຸ່ນຫຼຸດລົງ 13.3% ແລະ ການສົ່ງອອກໄປຈີນ ຊຶ່ງເປັນຄູ່ຄ້າທີ່ໃຫຍ່ທີ່ສຸດຂອງຍີ່ປຸ່ນເພີ່ມຂຶ້ນ 5.8%.
ໃນເຄິ່ງທໍາອິດຂອງປີງົບປະມານ 2025 ນັບເຖິງເດືອນກັນຍາ, ການສົ່ງອອກຂອງຍີ່ປຸ່ນໄປສະຫະລັດ ອາເມຣິກາ ໄດ້ຫຼຸດລົງ 10.2% ເມື່ອທຽບໃສ່ປີກາຍມາເປັນ 9.71 ພັນຕື້ເຢນ (64 ຕື້ໂດລາ), ເນື່ອງຈາກຜົນກະທົບຂອງອັດຕາພາສີຂອງລັດຖະບານທ່ານ ໂດໂນ ທຣໍາ ຕໍ່ສິນຄ້ານໍາເຂົ້າຂອງຍີ່ປຸ່ນ.
ໃນໄລຍະດັ່ງກ່າວ, ຍີ່ປຸ່ນມີຍອດເກີນດຸນການຄ້າກັບ ສະຫະລັດ ອາເມຣິກາ ຫຼຸດລົງ 22.6% ເປັນ 3,320 ຕື້ເຢນ, ໂດຍການສົ່ງອອກລົດຫຼຸດລົງ 22.7%. ໃນຂະນະດຽວກັນ, ການນໍາເຂົ້າຈາກສະຫະລັດ ອາເມຣິກາ ໄດ້ຫຼຸດລົງ 2% ເປັນ 6.39 ພັນຕື້ເຢນ.
ການເປີດເຜີຍຂໍ້ມູນການຄ້າລ້າສຸດມີຂຶ້ນພຽງໜຶ່ງວັນ ຫຼັງຈາກທ່ານນາງ ຊານາເອະ ທາຄາອິຈິ ໄດ້ຮັບເລືອກເປັນນາຍົກລັດຖະມົນຕີຍິງຄົນທຳອິດຂອງຍີ່ປຸ່ນ.
ທັງນີ້, ການທີ່ທ່ານນາງ ທາຄາອິຈິ ມີທ່າທີສະໜັບສະໜູນການຜ່ອນຄາຍນະໂຍບາຍການເງິນ ແລະ ການກະຕຸ້ນເສດຖະກິດໂດຍຜ່ານນະໂຍບາຍການເງິນຂະໜາດໃຫຍ່ມີທ່າອ່ຽງທີ່ຈະເຮັດໃຫ້ເງິນເຢນອ່ອນຄ່າ ຊຶ່ງເປັນຜົນປະໂຫຍດຕໍ່ບັນດາຜູ້ສົ່ງອອກຂອງຍີ່ປຸ່ນ.
ຄໍາເຫັນ