ສໍາລັບ ສປປ ລາວ, ການເຄື່ອນໄຫວການທູດວັດທະນະທໍາ ແມ່ນອົງປະກອບໜຶ່ງທີ່ສຳຄັນຂອງການເຄື່ອນໄຫວການທູດໂດຍລວມ ຂອງ ສປປ ລາວ. ນັບແຕ່ອະດີດຈົນເຖິງປັດຈຸບັນ, ການເຄື່ອນໄຫວທາງການທູດ ກໍຄືການພົວພັນການຕ່າງປະເທດຂອງລາວບໍ່ພຽງແຕ່ຕິດພັນກັບວຽກງານທາງດ້ານການ ເມືອງ ແລະ ຄວາມໝັ້ນຄົງເທົ່ານັ້ນ (ໂດຍເອີ້ນວ່າການທູດການເມືອງ), ແຕ່ຍັງໄດ້ຕິດພັນກັບວຽກງານເສດຖະກິດ (ການທູດເສດຖະກິດ) ແລະ ວັດທະນະທໍາ (ການທູດວັດທະນະທຳ ຫຼື ການທູດປະຊາຊົນ), ຊຶ່ງທັງສາມອົງປະກອບແມ່ນມີການເຊື່ອມໂຍງ ແລະ ເກາະກ່າຍກັນຢ່າງກົມກຽວສະໜິດແໜ້ນ ເພື່ອບັນລຸເປົ້າໝາຍລວມອັນສູງສຸດຂອງນະໂຍບາຍການຕ່າງປະເທດຂອງພັກ ແລະ ລັດຖະບານ ສປປ ລາວ.
ສປປ ລາວ ໄດ້ມີການເຄື່ອນໄຫວການທູດວັດທະນະທຳ ຢ່າງຕັ້ງໜ້າ, ກວ້າງຂວາງ ແລະ ເລິກເຊິ່ງ ໂດຍຢຶດໝັ້ນຕໍ່ແນວທາງປ່ຽນແປງໃໝ່ຂອງພັກ ກໍຄື ນະໂຍບາຍການຕ່າງປະເທດຂອງພັກໃນແຕ່ລະໄລຍະ,ຊຶ່ງໄດ້ຕິດພັນ ແລະ ເກາະກ່າຍຢ່າງກົມກຽວກັບການເຄື່ອນໄຫວການທູດທາງການເມືອງ-ຄວາມໝັ້ນຄົງ ແລະ ການທູດເສດຖະກິດ ເຊັ່ນ: ການເຄື່ອນໄຫວຢ້ຽມຢາມ ຫຼື ເຂົ້າຮ່ວມກອງປະຊຸມສາກົນ ຢູ່ຕ່າງປະເທດ ຂອງບັນດາການນໍາຂັ້ນສູງຂອງພັກ-ລັດ ກໍຄືການຕ້ອນຮັບການນໍາຂັ້ນສູງຕ່າງປະເທດທີ່ເດີນທາງມາຢ້ຽມຢາມ ຫຼື ເຂົ້າຮ່ວມກອງປະຊຸມພາກພື້ນ ແລະ ສາກົນ ຢູ່ ສປປ ລາວ. ໂດຍລວມແລ້ວ ພາຍໃຕ້ການເຄື່ອນໄຫວທາງການທູດຢ່າງມີພິກໄຫວ, ຫ້າວຫັນ, ສ້າງສັນ, ມີຫຼັກການ ແລະ ຕໍ່ເນື່ອງ, ການເຄື່ອນໄຫວທາງການທູດຂອງລາວແມ່ນໄດ້ຮັບຜົນສໍາເລັດຢ່າງຈົບງາມ ແລະ ເປັນຮູບປະທຳຫຼາຍດ້ານ ຊຶ່ງວຽກງານການທູດວັດທະນະທໍາກໍນອນຢູ່ໃນບັນດາຜົນສໍາເລັດເຫຼົ່ານັ້ນ ເປັນຕົ້ນແມ່ນ ສປປ ລາວ ໄດ້ມີການລົງນາມເອກະສານການຮ່ວມມືໃນຂົງເຂດວັດທະນະທຳ ກັບບັນດາປະເທດເພື່ອນມິດຍຸດທະສາດ, ປະເທດບ້ານໃກ້ເຮືອນຄຽງ ແລະ ເພື່ອນມິດອື່ນໆ ນັບມື້ນັບຫຼາຍຂຶ້ນ.
ສິ່ງສຳຄັນ, ຜົນສຳເລັດໃນການເຄື່ອນໄຫວທາງການທູດວັດທະນະທຳຂອງລາວ ບໍ່ພຽງແຕ່ໄດ້ເຫັນໃນບັນດາເອກະສານເທົ່ານັ້ນ, ແຕ່ຍັງໄດ້ສະແດງໃຫ້ເຫັນເປັນຮູບປະທຳ ໂດຍການຈັດຕັ້ງຜັນຂະຫຍາຍບັນດາສັນຍາ, ຂໍ້ຕົກລົງ ແລະ ບົດບັນທຶກຕ່າງໆທີ່ຕິດພັນກັບການຮ່ວມມືໃນຂົງເຂດວັດທະນະທຳ ທັງໃນຂອບສອງຝ່າຍ ແລະ ຫຼາຍຝ່າຍ ທັງໃນລະດັບອະນຸພາກພື້ນ, ພາກພື້ນ ໄປຈົນເຖິງລະດັບໂລກ ໃຫ້ເປັນໂຄງການ ແລະ ກິດຈະກຳຕ່າງໆ. ໃນນັ້ນ, ກໍແມ່ນການແລກປ່ຽນສິລະປະການສະແດງ, ການວາງສະແດງຮູບພາບວັດທະນະທໍາ, ງານສັບປະດາວັດທະນະທໍາ, ສັບປະດາຮູບເງົາ, ກອງປະຊຸມເວທີສໍາມະນາສົ່ງເສີມວຽກງານວິຊາການ ແລະ ງານບຸນລາວຢູ່ບັນດາປະເທດຕ່າງໆ ເປັນຕົ້ນ ສສ ຫວຽດນາມ, ສປ ຈີນ, ຍີ່ປຸ່ນ ແລະສ. ເກົາຫຼີ. ນອກນັ້ນ, ໃນພາກພື້ນເອີຣົບ ກໍໄດ້ມີການຈັດຕັ້ງສັບປະດາວັດທະນະທຳ ລະຫວ່າງ ສປປ ລາວ ກັບ ສ. ຣັດເຊຍ ແລະ ສ. ເບລາຣຸດຊີ, ຮ່ວມມືກັບ ສ. ຝຣັ່ງ ໃນການສະໜັບສະໜູນວຽກງານຄຸ້ມຄອງບູລະນະສະຖານທີ່ມໍຣະດົກໂລກຫຼວງພະບາງ ແລະ ວັດພູຈຳປາສັກ. ໃນຂະນະດຽວກັນ, ການເຄື່ອນໄຫວການທູດວັດທະນະທໍາຢູ່ພາຍໃນ ສປປ ລາວ ເຮົາ ໂດຍຜ່ານບັນດາເວທີ, ກອງປະຊຸມ ແລະ ການສໍາມະນາສາກົນຕ່າງໆ ຫຼື ບັນດາເທດສະການວັນບຸນສໍາຄັນຕ່າງໆ, ແນໃສ່ສ້າງຄວາມຮັບຮູ້ກ່ຽວກັບວັດທະນະທໍາອັນດີງາມຂອງລາວເຮົາໃຫ້ແກ່ບັນດານັກການທູດ, ຊ່ຽວຊານ, ອາສາສະໝັກ ແລະ ຊາວຕ່າງປະເທດ ທີ່ພວມປະຕິບັດໜ້າທີ່ວຽກງານ ແລະ ດໍາລົງຊີວິດຢູ່ລາວ, ເປັນຕົ້ນແມ່ນກິດຈະກໍາສະເຫຼີມສະຫຼອງວັນສ້າງຕັ້ງສາຍພົວພັນການທູດ ລະຫວ່າງ ສປປ ລາວ ແລະ ບັນດາປະເທດເພື່ອນມິດ, ງານບຸນປີໃໝ່ລາວ, ງານລ້ຽງນໍ້າຊາຂອງສະຫະພັນແມ່ຍິງກະຊວງການຕ່າງປະເທດລາວ ແລະ ບັນດານັກການທູດເພດຍິງຕ່າງປະເທດປະຈໍາລາວ, ເທດສະການອາຫານລາວ ແລະ ຕ່າງປະເທດ, ເທດສະການວັດທະນະທໍາ ແລະ ອື່ນໆ.
ອີກດ້ານໜຶ່ງ, ສປປ ລາວ ໄດ້ສືບຕໍ່ເຄື່ອນໄຫວຢ່າງຫ້າວຫັນຮ່ວມກັບ ອົງການສະຫະປະຊາຊາດ ເພື່ອການສຶກສາ, ວິທະຍາສາດ ແລະ ວັດທະນະທໍາ (UNESCO) ເພື່ອສ້າງເງື່ອນໄຂໃຫ້ບັນດາແຫຼ່ງມໍຣະດົກທາງວັດທະນະທໍາ, ປະຫວັດສາດ ແລະ ທໍາມະຊາດຂອງ ສປປ ລາວ ຖືກຮັບຮອງເຂົ້າເປັນມໍຣະດົກໂລກ. ມາຮອດປັດຈຸບັນ, ຜ່ານການເຄື່ອນໄຫວພາຍໃຕ້ສົນທິສັນຍາປົກປັກຮັກສາມໍຣະດົກໂລກທາງດ້ານວັດທະນະທຳ ແລະ ທຳມະຊາດ ຂອງອົງການອຸຍແນັສໂກ (ຫຼື ສົນທິສັນຍາມໍຣະດົກໂລກ 1972), ໄດ້ຮັບຮອງເອົາແຫຼ່ງມໍຣະດົກແຫ່ງຊາດທາງດ້ານວັດທະນະທໍາ ຈໍານວນ 3 ແຫ່ງ ຄື: ເມືອງຫຼວງພະບາງ (1995), ວັດພູ ແລະ ເຂດພູມີທັດວັດທະນະທຳເມືອງບູຮານເສດຖາປຸຣະ (2001), ແລະ ທົ່ງໄຫຫີນ ຊຽງຂວາງ (2019); ແລະ ການເຄື່ອນໄຫວພາຍໃຕ້ສົນທິສັນຍາປົກປັກຮັກສາມໍຣະດົກນາມມະທໍາ ຂອງອົງການອຸຍແນັສໂກ (ຫຼື ສົນທິສັນຍາ 2003) ໄດ້ຮັບຮອງເອົາມໍຣະດົກທາງດ້ານວັດທະນະທໍານາມມະທໍາແຫ່ງຊາດ ເຂົ້າໃນບັນຊີຕົວແທນມໍຣະດົກນາມມະທຳຂອງມວນມະນຸດໂລກ ຈໍານວນ 3 ລາຍການ ຄື: ສຽງແຄນເຊື້ອຊາດລາວ (2017), ຫັດຖະກຳພື້ນເມືອງ ພູມປັນຍາການຕໍ່າລາຍນາກ ຂອງຊຸມຊົນເຊື້ອຊາດລາວ (2023), ແລະ ຟ້ອນລໍາວົງລາວ (2024). ພ້ອມດຽວກັນນັ້ນ, ການທູດວັດທະນະທໍາ ກໍຍັງສືບຕໍ່ປະກອບສ່ວນຊຸກຍູ້ຢ່າງຕັ້ງໜ້າ ໃນການຍົກສູງລະດັບຄວາມເຂົ້າໃຈ ກ່ຽວກັບ ສປປ ລາວ ໃນວຽກງານການເມືອງ ແລະ ປະຊາຊົນບັນດາປະເທດໃນໂລກ. ນອກຈາກນັ້ນ, ສປປ ລາວ ຍັງສືບຕໍ່ຊຸກຍູ້ບັນດາແຫຼ່ງທໍາມະຊາດ ແລະ ວັດທະນະທໍາ ຢູ່ໃນ ສປປ ລາວ ໃຫ້ເຂົ້າເປັນມໍຣະດົກໂລກຕື່ມອີກໃນອະນາຄົດ ເຊັ່ນ: ອຸທິຍານແຫ່ງຊາດຫີນໜາມໜໍ່ ຢູ່ ເມືອງບົວລະພາ, ແຂວງຄໍາມ່ວນ (ກໍາລັງຢູ່ໃນຂະບວນການພິຈາລະນາ ຂອງສູນມໍຣະດົກໂລກ) ເຂົ້າເປັນມໍຣະດົກໂລກແລ້ວ ໃນກອງປະຊຸມຄະນະກຳມະການມໍຣະດົກໂລກ ຄັ້ງທີ 47 ເດືອນ ກໍລະກົດ ປີ 2025 ທີ່ນະຄອນຫຼວງປາຣີ ປະເທດຝຣັ່ງແລະ ແຫຼ່ງມໍຣະດົກທາງດ້ານວັດທະນະທຳແຫ່ງອື່ນ ຊຶ່ງປັດຈຸບັນແມ່ນໄດ້ຖືກບັນຈຸແລ້ວ ໃນບັນຊີສຳຮອງມໍຣະດົກໂລກ ຂອງອົງການອຸຍແນັສໂກ ເຊັ່ນ: ພະທາດຫຼວງວຽງຈັນ (ນະຄອນຫຼວງວຽງຈັນ 1992), ອຸທິຍານແຫ່ງຊາດ ນາກາຍ-ນໍ້າເທີນ (ຄໍາມ່ວນ 2025)ແລະ ມີແຜນການສືບຕໍ່ຄົ້ນຄວ້າສະເໜີເອົາພະທາດອີງຮັງ(ສະຫວັນນະເຂດ), ເສົາຫີນຕັ້ງ (ຫົວພັນ) ເຂົ້າໃນບັນຊີສຳຮອງມໍຣະດົກໂລກໃນອະນາຄົດ ແລະ ອື່ນໆ.
ນອກຈາກນັ້ນ, ສປປ ລາວ ໄດ້ເຄື່ອນໄຫວວຽກງານການທູດວັດທະນະທໍາ ໃນເວທີພາກພື້ນ ໂດຍການສົ່ງເສີມການຮ່ວມມືໃນຂົງເຂດວັດທະນະທຳ ພາຍໃຕ້ປະຊາຄົມສັງຄົມ-ວັດທະນະທຳອາຊຽນ (ASEAN Socio-Cultural Community - ASCC) ໂດຍໄດ້ເຂົ້າຮ່ວມກິດຈະກຳທາງດ້ານວັດທະນະທຳທີ່ຫຼາກຫຼາຍ ເປັນຕົ້ນແມ່ນ ກິດຈະກຳການແລກປ່ຽນວັດທະນະທຳ ລະຫວ່າງ ປະເທດສະມາຊິກອາຊຽນ ເຊັ່ນ: ງານບຸນວັດທະນະທຳ, ການສະແດງສິລະປະ ແລະ ໂຄງການແລກປ່ຽນຊາວໜຸ່ມ ເພື່ອປະກອບສ່ວນເຂົ້າໃນຂະບວນການສ້າງປະຊາຄົມອາຊຽນທີ່ຖືປະຊາຊົນເປັນກົກ ແລະ ມີຄວາມຮັບຜິດຊອບຕໍ່ສັງຄົມ ກໍຄື ເພື່ອຮັດແໜ້ນຄວາມສາມັກຄີ ແລະ ເປັນປຶກແຜ່ນ ລະຫວ່າງ ປະຊາຊົນກັບປະຊາຊົນໃນປະເທດສະມາຊິກອາຊຽນດ້ວຍກັນ, ໂດຍການສ້າງເອກະລັກຮ່ວມກັນ ແລະ ການປົກປ້ອງ ແລະ ສົ່ງເສີມຄຸນຄ່າມໍຣະດົກທາງວັດທະນະທຳຂອງພາກພື້ນໄວ້ໃຫ້ຍືນຍົງ.
ວຽກງານທີ່ພົ້ນເດັ່ນໃນເວທີພາກພື້ນ ກໍແມ່ນ ສປປ ລາວ ໄດ້ຮັບກຽດເປັນເຈົ້າພາບຈັດກອງປະຊຸມພາກພື້ນ ແລະ ສາກົນຕ່າງໆ ເວົ້າລວມ, ເວົ້າສະເພາະຂະແໜງການວັດທະນະທໍາ ເປັນຕົ້ນແມ່ນ ການເປັນປະທານກອງປະຊຸມສະພາປະຊາຄົມວັດທະນະທໍາ-ສັງຄົມ ອາຊຽນ ຄັ້ງທີ 15 ແລະ 16 ໃນປີ 2016, ແລະ ຄັ້ງທີ 31 ແລະ 32 ໃນປີ 2024; ກອງປະຊຸມເວທີທ່ອງທ່ຽວອາຊຽນ, ກອງປະຊຸມສໍາມະນາແຜ່ນແພພື້ນເມືອງອາຊຽນ ຄັ້ງທີ 9 ແລະ ກອງປະຊຸມອື່ນໆ ດ້ວຍຜົນສຳເລັດຢ່າງຈົບງາມ.
ບັນດາຜົນສໍາເລັດຂອງການເຄື່ອນໄຫວການທູດວັດທະນະທໍາ ໃນຕະຫຼອດໄລຍະຜ່ານມາ ໄດ້ປະກອບສ່ວນອັນສໍາຄັນເຂົ້າໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດຢ່າງຕໍ່ເນື່ອງ ເວົ້າລວມ, ເວົ້າສະເພາະແມ່ນໄດ້ປະກອບສ່ວນອັນສຳຄັນເຂົ້າໃນການຈັດຕັ້ງປະຕິບັດນະໂຍບາຍການຕ່າງປະເທດຂອງພັກ ແລະ ລັດຖະບານລາວ ຢ່າງໄດ້ຮັບໝາກຜົນ ແລະ ການສ້າງຄວາມຮັບຮູ້ຢ່າງເລິກເຊິ່ງ ໃຫ້ແກ່ວົງຄະນະຍາດສາກົນ ຕໍ່ກັບປະເທດລາວ ກໍຄື ການສ້າງພາບພົດທີ່ດີ ແລະ ການຍົກສູງຖານະບົດບາດຂອງ ສປປ ລາວ ໃຫ້ສູງເດັ່ນຂຶ້ນໃນເວທີພາກພື້ນ ແລະ ສາກົນ. ພ້ອມນີ້ ທັງຊ່ວຍໃຫ້ ສປປ ລາວ ມີສາຍພົວພັນມິດຕະພາບ ແລະ ການຮ່ວມມືທີ່ດີກັບບັນດາປະເທດເພື່ອນມິດສາກົນໃນທົ່ວທຸກມູມໂລກ ເພື່ອຍາດແຍ່ງທຶນຮອນ, ເຕັກນິກ-ເຕັກໂນໂລຊີ ແລະ ຄວາມຮູ້ດ້ານການຄຸ້ມຄອງ ເພື່ອປະກອບສ່ວນເຂົ້າໃນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ ໃນແຕ່ລະໄລຍະ ໃຫ້ປະກົດຜົນເປັນຈິງ ກໍຄື ເພື່ອປະກອບສ່ວນເຂົ້າໃນການປົກປັກຮັກສາ ແລະ ສົ່ງເສີມສັນຕິພາບ, ສະຖຽນລະພາບ ແລະ ຄວາມໝັ້ນຄົງຂອງພາກພື້ນ.
ຄໍາເຫັນ