Barclays ລະບຸວ່າ: ການໃຊ້ຈ່າຍຜ່ານບັດຫຼຸດລົງ 0.2% ໃນປີ 2025 ຊຶ່ງເປັນການຊະລໍຕົວລົງຢ່າງຫຼວງຫຼາຍເມື່ອທຽບໃສ່ປີ 2024 ທີ່ມູນຄ່າການໃຊ້ຈ່າຍເພີ່ມຂຶ້ນ 1.6% ແລະ ເປັນການຫຼຸດລົງຄັ້ງທຳອິດນັບຕັ້ງແຕ່ປີ 2020 ຊຶ່ງໃນເວລານັ້ນມູນຄ່າການໃຊ້ຈ່າຍຜ່ານບັດຫຼຸດລົງ 7.1% ເນື່ອງຈາກມາດຕະການລັອກດາວ ເພື່ອຄວບຄຸມການລະບາດຂອງໂຄວິດ-19.
ຂໍ້ມູນຂອງ Barclays ຖືເປັນການຢືນຢັນວ່າການໃຊ້ຈ່າຍຂອງຄົວເຮືອນໃນອັງກິດອ່ອນແອລົງໃນໄລຍະທີ່ຄວາມໝັ້ນໃຈຂອງຜູ້ບໍລິໂພກຖືກກົດດັນຈາກອັດຕາເງິນເຟີ້ສູງ, ການວ່າງງານທີ່ເພີ່ມຂຶ້ນ ແລະ ຄວາມບໍ່ແນ່ນອນທາງດ້ານການເມືອງ.
ທັງນີ້, ການບໍລິໂພກທີ່ຊ້າລົງ ແລະ ການປະຢັດເງິນທີ່ຢູ່ໃນລະດັບສູງແມ່ນປັດໄຈຫຼັກທີ່ເຮັດໃຫ້ການເຕີບໂຕຂອງເສດຖະກິດອັງກິດຫຼຸດລົງ. ໃນທາງກົງກັນຂ້າມ, ການຟື້ນຕົວຂອງການໃຊ້ຈ່າຍແມ່ນມີຄວາມສຳຄັນຫຼາຍຕໍ່ການຂະຫຍາຍຕົວທາງເສດຖະກິດ, ເຖິງແມ່ນວ່າມັນຈະເປັນການເຕີບໂຕພຽງເລັກນ້ອຍຕາມທີ່ຜູ້ຄວບຄຸມງົບປະມານຄາດຄະເນໄວ້ໃນຊຸມປີຕໍ່ໜ້າກໍຕາມ.
ຢ່າງໃດກໍຕາມ, Barclays ສັງເກດເຫັນວ່າຊາວອັງກິດຍັງໃຊ້ຈ່າຍຈຳນວນໜ້ອຍໜຶ່ງໃນການຊື້ສິນຄ້າຟຸ່ມເຟືອຍ ລວມທັງການໃຊ້ຈ່າຍເພື່ອຊື້ປະສົບການຕ່າງໆ, ໂດຍສະເພາະຄອນເສີດຂອງນັກສິລະປິນທີ່ມີຊື່ສຽງເຊັ່ນ: Oasis, Coldplay ແລະ Sabrina Carpenter.
ເມື່ອແຍກຕາມໝວດໝູ່ ພົບວ່າ: ການໃຊ້ຈ່າຍໃນຢາ, ສຸຂະພາບ ແລະ ຄວາມງາມ ມີການເພີ່ມຂຶ້ນສູງທີ່ສຸດ 9.5%, ໃນຂະນະທີ່ການໃຊ້ຈ່າຍໃນສິນຄ້າທີ່ຈຳເປັນຫຼຸດລົງ 2.3% ເມື່ອທຽບກັບປີກ່ອນ ຊຶ່ງລວມທັງການຫຼຸດລົງ 1.7% ໃນການໃຊ້ຈ່າຍໃນຮ້ານສັບພະສິນຄ້າ.
ຄໍາເຫັນ