ການລົງທຶນຈາກຂະແໜງທຸລະກິດທີ່ບໍ່ແມ່ນສະຖາບັນການເງິນມີມູນຄ່າທັງໝົດ 15.39 ພັນຕື້ເຢນ (97.9 ຕື້ໂດລາ), ໂດຍຂະແໜງຂໍ້ມູນຂ່າວສານ ແລະ ການສື່ສານມີບົດບາດສຳຄັນໃນການຊຸກຍູ້ໂຕເລກດັ່ງກ່າວ, ທ່າມກາງຄວາມຕ້ອງການສູນຂໍ້ມູນທີ່ເພີ່ມຂຶ້ນ.
ສຳລັບໄຕມາດທີ 4 ຂອງປີ 2025, ກຳໄລກ່ອນຫັກພາສີເພີ່ມຂຶ້ນ 4.7% ເປັນ 30.03 ພັນຕື້ເຢນ ຊຶ່ງເປັນໄຕມາດທີ 5 ຕິດຕໍ່ກັນຂອງການເຕີບໂຕ, ໃນຂະນະທີ່ຍອດຂາຍເພີ່ມຂຶ້ນ 0.7% ເປັນ 400.65 ພັນຕື້ເຢນ ຊຶ່ງເປັນໄຕມາດທີ 19 ຕິດຕໍ່ກັນຂອງການເຕີບໂຕ.
ເຈົ້າໜ້າທີ່ກະຊວງການເງິນຍີ່ປຸ່ນກ່າວວ່າ: ການໃຊ້ຈ່າຍທຶນ, ກຳໄລກ່ອນຫັກພາສີ ແລະ ຍອດຂາຍທັງໝົດບັນລຸລະດັບສູງສຸດເປັນປະຫວັດການສຳລັບໄຕມາດເດືອນຕຸລາ-ທັນວາ. ຜົນໄດ້ຮັບນີ້ “ຊ່ວຍສະໜັບສະໜູນການປະເມີນຂອງລັດຖະບານວ່າເສດຖະກິດຍີ່ປຸ່ນກຳລັງຟື້ນຕົວເທື່ອລະກ້າວ, ເຖິງແມ່ນວ່າການເຄື່ອນໄຫວຂອງລາຄາສິນຄ້າ ແລະ ຜົນກະທົບຈາກພາສີຂອງສະຫະລັດ ອາເມຣິກາ ຍັງຕ້ອງໄດ້ຮັບການຕິດຕາມຢ່າງໃກ້ຊິດ.”
ໜັງສືພິມ Kyodo News ລາຍງານວ່າ: ຂໍ້ມູນລ້າສຸດນີ້ຈະຖືກນໍາໃຊ້ເພື່ອປັບປຸງໂຕເລກ GDP ປະຈຳໄຕມາດເດືອນຕຸລາ-ທັນວາ ຊຶ່ງຂໍ້ມູນໃນເບື້ອງຕົ້ນລະບຸວ່າເສດຖະກິດເຕີບໂຕ 0.2% ຕໍ່ປີ ຖືເປັນການກັບມາຂະຫຍາຍຕົວຄັ້ງທຳອິດໃນຮອບສອງໄຕມາດ. ໂດຍສຳນັກງານຄະນະລັດຖະມົນຕີມີກຳນົດປະກາດໂຕເລກ GDP ທີ່ໄດ້ຮັບການປັບປຸງໃນອາທິດໜ້າ.
ທ່ານ ທາຄາຟູມິ ຟູຈິຕະ ນັກເສດຖະສາດຈາກສະຖາບັນຄົ້ນຄວ້າເມຈິ ຢາສຸດະ ໄດ້ໃຫ້ຄວາມເຫັນວ່າ: ໂຕເລກ GDP ມີທ່າອ່ຽງທີ່ຈະໄດ້ຮັບການປັບປຸງເພີ່ມຂຶ້ນ “ຜົນໄດ້ຮັບນີ້ສະແດງໃຫ້ເຫັນວ່າທຸລະກິດທີ່ບໍ່ແມ່ນຂະແໜງການຜະລິດມີການລົງທຶນຢ່າງແຂງແຮງເພື່ອແກ້ໄຂບັນຫາການຂາດແຄນແຮງງານ” ຊຶ່ງລວມທັງການລົງທຶນໃນລະບົບອັດຕະໂນມັດຂອງໂຮງງານ ແລະ ເຕັກໂນໂລຊີດີຈີຕອນ. ທ່ານກ່າວຕື່ມວ່າ: ຜົນກະທົບຈາກພາສີຂອງ ສະຫະລັດ ອາເມຣິກາ ຕໍ່ການຜະລິດເບິ່ງຄືວ່າຈະຜ່ອນຄາຍລົງ.
ໃນຂະນະທີ່ກຳໄລກ່ອນຫັກພາສີໃນຂະແໜງອຸປະກອນການຂົນສົ່ງ ຫຼຸດລົງ 6.4% ເມື່ອທຽບກັບປີກ່ອນ, ເຖິງຢ່າງໃດກໍຕາມ ເຈົ້າໜ້າທີ່ກະຊວງການເງິນລະບຸວ່າ: ອັດຕາການຫຼຸດລົງດັ່ງກ່າວໄດ້ເລີ່ມຊ້າລົງເມື່ອທຽບກັບໄຕມາດກ່ອນໜ້ານີ້.
ຄໍາເຫັນ