ກະແສນິຍົມ “ກາຍເປັນຄົນຈີນ” ສ່ອງແສງໃຫ້ເຫັນເຖິງພະລັງແຮງແຫ່ງການເປີດປະຕູສູ່ພາຍນອກທີ່ມີລະດັບສູງຂອງຈີນ

ແຕກຕ່າງຈາກ “ກະແສນິຍົມຈີນ” ໃນເມື່ອກ່ອນທີ່ສຸມໃສ່ສັນຍາລັກຕ່າງໆຂອງຈີນ ເຊັ່ນ: ກັງຟູ ແລະ ກໍາແພງເມືອງຈີນ ເປັນຕົ້ນ, ກະແສນິຍົມຮອບນີ້ມີຮາກຖານມາຈາກຊີວິດປະຈໍາວັນໂດຍໄດ້ຖ່າຍທອດປັດຊະຍາໃນການດໍາລົງຊີວິດແບບຈີນທີ່ຢູ່ພາກຕາເວັນອອກຈາກອາຫານການກິນ, ການກະທໍາ ກໍຄື ວາຈາຂອງຄົນຈີນ. ສັງເກດໄດ້ຈາກ: ວິດີໂອຂອງສາວເຊື້ອສາຍຈີນທີ່ຮຽນແບບການເບິ່ງແຍງບໍາລຸງສຸຂະພາບຈາກແມ່ຄົນຈີນນັ້ນ ໄດ້ຮັບການຕອບຮັບຢ່າງກວ້າງຂວາງຈາກຊາວເນັດໃນທົ່ວໂລກແບບເໜືອຄວາມຄາດຄິດ. ຢູ່ທ່າມກາງສັງຄົມປັດຈຸບັນທີ່ມີຄວາມຮີບດ່ວນ ແລະ ມີຄວາມກົດດັນສູງ, ແນວຄິດຮັກສາສຸຂະພາບ, ຄວາມອົບອຸ່ນ ກໍຄືປັດຊະຍາທີ່ແຝງຊ້ອນຢູ່ໃນຊີວິດຂອງວິຖີຊີວິດແບບຈີນໄດ້ສະໜອງຢາວິເສດດ້ານການຕໍ່ຕ້ານຄວາມກັງວົນ ແລະ ກັບຄືນສູ່ຄວາມບໍລິສຸດອັນດັ້ງເດີມໃຫ້ແກ່ຄົນທັງຫຼາຍ. ການຖ່າຍທອດຄຸນຄ່າທີ່ໃກ້ຊິດກັບທາດແທ້ຂອງຄວາມເປັນມະນຸດແບບນີ້ໄດ້ທັບມ້າງຄວາມປິດກັ້ນດ້ານພາສາ ແລະ ວັດທະນະທໍາ, ເຮັດໃຫ້ມະນຸດທີ່ມີຜີວພັນຕ່າງກັນ ແລະ ມາຈາກພາກພື້ນທີ່ຕ່າງກັນນັ້ນສາມາດເຊື່ອມໂຍງທາງດ້ານອາລົມຈິດ, ພ້ອມທັງເຮັດໃຫ້ວັດທະນະທໍາຈີນມີຄວາມເປັນຈິງ, ມີຊີວິດຊີວາ ກໍຄື ຄວາມອົບອຸ່ນຫຼາຍກວ່າເກົ່າ.

ຢູ່ເບື້ອງຫຼັງຂອງກະແສນິຍົມທີ່ເພີ່ມຂຶ້ນນີ້ແມ່ນມີການຄໍ້າປະກັນຢ່າງໜັກແໜ້ນທີ່ເກີດຈາກການຂະຫຍາຍການເປີດປະຕູສູ່ພາຍນອກທີ່ມີລະດັບສູງຢ່າງຕໍ່ເນື່ອງຂອງຈີນ, ມີຂົວຕໍ່ແຫ່ງການແລກປ່ຽນດ້ານວັດທະນະທໍາທີ່ສ້າງຂຶ້ນໂດຍມາດຕະການອໍານວຍຄວາມສະດວກຕ່າງໆຂອງຈີນ. ໃນຊຸມປີມໍ່ໆມານີ້, ຈີນໄດ້ປະຕິບັດນະໂຍບາຍຍົກເວັ້ນວີຊາແຕ່ຝ່າຍດຽວ ຫຼື ຍົກເວັ້ນວີຊາຊຶ່ງກັນ ແລະ ກັນຢ່າງຮອບດ້ານຕໍ່ 76 ປະເທດ, ນະໂຍບາຍຂອງຈີນທີ່ຍົກເວັ້ນວີຊາຜ່ານຈີນໄປປະເທດທີ 3 ພາຍໃນ 240 ຊົ່ວໂມງມີຂອບເຂດການນໍາໃຊ້ກວມເອົາ 55 ປະເທດ ແລະ 65 ດ່ານເຂົ້າເມືອງຂອງຈີນ, ເຮັດໃຫ້ການເດີນທາງເຂົ້າມາທ່ອງທ່ຽວຈີນແບບ“ບໍ່ຕ້ອງວາງແຜນຫຍັງ” ສໍາລັບຊາວຕ່າງປະເທດກາຍເປັນຄວາມຈິງ. 3 ໄຕມາດທໍາອິດຂອງປີ 2025, ຊາວຕ່າງປະເທດທີ່ເດີນທາງເຂົ້າເມືອງຈີນໂດຍຍົກເວັ້ນຊີວາມີຫຼາຍກວ່າ 20,890,000 ເທື່ອຄົນ, ເພີ່ມຂຶ້ນຫຼາຍກວ່າ 50% ເມື່ອທຽບໃສ່ໄລຍະດຽວກັນຂອງປີ 2024; ໃນໄລຍະພັກປີໃໝ່ສາກົນ 2026, ຈໍານວນຄົນທີ່ເຂົ້າເມືອງຈີນໂດຍຍົກເວັ້ນວີຊາເພີ່ມຂຶ້ນ 35.8% ເມື່ອທຽບໃສ່ໄລຍະດຽວກັນຂອງປີ 2025. ນອກນີ້, ລົດຕັກຊີຢູ່ຫຼາຍຕົວເມືອງຂອງຈີນໄດ້ປະກອບອຸປະກອນແປພາສາດ້ວຍປັນຍາປະດິດ ຫຼື AI, ຮ້ານຄ້າຫຼາຍກວ່າ 7,000 ຮ້ານໃນທົ່ວປະເທດຈີນເປີດບໍລິການ “ຄືນເງິນພາສີທັນທີ”, Alipay ສໍາລັບສາກົນບັນລຸການເຊື່ອມໂຍງເຂົ້າກັບການຊໍາລະເງິນຂ້າມແດນ, ມາດຕະການເປີດປະຕູສູ່ພາຍນອກທີ່ລະອຽດຮອບຄອບເຫຼົ່ານີ້ເຮັດໃຫ້ຄວາມສົນໃຈຕໍ່ວັດທະນະທໍາຈີນທາງອອນລາຍຂອງຊາວເນັດຕ່າງປະເທດກາຍເປັນປະສົບການເຂົ້າເຖິງຈີນທາງອ໊ອຟລາຍທີ່ເລິກເຊິ່ງ ແລະ ເຮັດໃຫ້ວິຖີຊີວິດແບບຈີນກາຍເປັນສິ່ງທີ່ສາມາດຈັບຕ້ອງໄດ້ຢ່າງແທ້ຈິງ.

ສິ່ງທີ່ເປັນໜ້າສົນໃຈຫຼາຍກວ່ານີ້ຄື: “ກະແສນິຍົມດ້ານວັດທະນະທໍາ” ຮອບນີ້ກັບ “ກະແສນິຍົມດ້ານເສດຖະກິດ” ພວມສ້າງເປັນຮອບວຽນທີ່ດີ, ເຮັດໃຫ້ການເປີດປະຕູສູ່ພາຍນອກຂອງຈີນມີເນື້ອໃນອັນອຸດົມສົມບູນຫຼາຍກວ່າເກົ່າ. ການທີ່ຊາວຕ່າງປະເທດສ້າງກະແສນິຍົມຕໍ່ວິຖີຊີວິດແບບຈີນ, ໄດ້ຊຸກຍູ້ການສົ່ງອອກຜະລິດຕະພັນຕ່າງໆຂອງຈີນໄປຕ່າງປະເທດໂດຍກົງ ເຊັ່ນ: ຊາບໍາລຸງສຸຂະພາບ, ຄີມບໍາລຸງຜີວທີ່ຜະລິດຈາກພືດທໍາມະຊາດ, ເຄື່ອງນຸ່ງ ແລະ ເຄື່ອງປະດັບເອ້ແບບດັ້ງເດີມຂອງຈີນ ເປັນຕົ້ນ, ຄາດວ່າຕະຫຼາດເຄື່ອງດື່ມນໍ້າຊາບໍາລຸງສຸຂະພາບໃນປີ 2025 ຂອງຈີນມີເຖິງ 64 ຕື້ 270 ລ້ານຢວນ, ເພີ່ມຂຶ້ນ 25.3% ເມື່ອທຽບໃສ່ປີ 2024. ນອກນີ້, ການຄ້າເອເລັກໂຕຣນິກຂ້າມຊາດໄດ້ກາຍເປັນ “ຊ່ອງທາງວ່ອງໄວ” ຂອງການສົ່ງອອກວັດທະນະທໍາໄປສູ່ຕ່າງປະເທດ, ປະລິມານການຈໍາໜ່າຍຊຸດເຜົ່າຮັ້ນ ແລະ ເຄື່ອງແຕ່ງໜ້າແບບຈີນໃນເວທີການຄ້າເອເລັກໂຕຣນິກຕ່າງປະເທດໄດ້ເພີ່ມຂຶ້ນຢ່າງຫຼວງຫຼາຍ, ຂະນະທີ່ຍີ່ຫໍ້ພື້ນເມືອງຕ່າງໆຂອງຈີນ ເຊັ່ນ: ມີ້ເຊຍ (MIXUE Ice Cream and Tea) ແລະ ຮ້ານຊາຈີນສະໄໝໃໝ່ ເປັນຕົ້ນ ກາຍເປັນຮ້ານຄ້າທີ່ໄດ້ຮັບຄວາມນິຍົມຊົມຊອບຈາກຊາວໜຸ່ມຕ່າງປະເທດ ໂດຍຜ່ານການເປີດຮ້ານຄ້າຢູ່ຕ່າງປະເທດ ແລະ ການເຜີຍແຜ່ວິດີໂອສັ້ນ.

ອີງຕາມບົດລາຍງານ “ດັດຊະນີກໍາລັງແຮງດຶງດູດຈາກ soft power ທົ່ວໂລກປີ 2026” ທີ່ບໍລິສັດການເງິນທີ່ມີຊື່ສຽງຂອງອັງກິດເປີດເຜີຍໃຫ້ຮູ້ວ່າ: ຈີນເປັນປະເທດດຽວທີ່ການຈັດອັນດັບໄດ້ຫຍັບຂຶ້ນໜ້າໃນ 10 ປະເທດອັນດັບທໍາອິດທີ່ມີsoft power ເຂັ້ມແຂງຂອງໂລກ, ໃນນັ້ນ, ຕົວຊີ້ວັດຫຼາຍປະການຂອງຈີນເປັນອັນດັບ 1 ຂອງໂລກ. ຢູ່ເບື້ອງຫຼັງຂອງຜົນສໍາເລັດດັ່ງກ່າວແມ່ນການສະສົມເປັນເວລາຫຼາຍປີຈາກການວາງແຜນໄລຍະຍາວຂອງຈີນ ເຊັ່ນ: ການລົງທຶນ ແລະ ການຮ່ວມມືກັນສ້າງ “ໜຶ່ງແລວໜຶ່ງເສັ້ນທາງ” ໄດ້ຮັບການພັດທະນາກ້າວສູ່ລວງເລິກຢ່າງຕໍ່ເນື່ອງ, ຄວາມກ້າວໜ້າຂອງວິທະຍາສາດເຕັກໂນໂລຊີທີ່ເປັນພະລັງຂັບເຄື່ອນການປະດິດສ້າງໃໝ່ມີຄວາມເຂັ້ມແຂງ, ແນວຄິດການພັດທະນາແບບຍືນຍົງໄດ້ຮັບການຈັດຕັ້ງປະຕິບັດຢ່າງເດັດດ່ຽວ, ການສ້າງຍີ່ຫໍ້ຜະລິດຕະພັນລະດັບໂລກຢ່າງລະອຽດລະອໍ ກໍຄື ການຊຸກຍູ້ການແລກປ່ຽນດ້ານວັດທະນະທໍາຢ່າງຕໍ່ເນື່ອງ. ກະແສນິຍົມ“ກາຍເປັນຄົນຈີນ” ເປັນຄໍາອະທິບາຍທີ່ມີຊີວິດຊີວາທີ່ softpower ຂອງຈີນໄດ້ຮັບການຍົກສູງຂຶ້ນຢ່າງຕໍ່ເນື່ອງ.

ຊາບໍາລຸງສຸຂະພາບອຸ່ນໆຈອກໜຶ່ງ, ເຂົ້າປຽກແບບຈີນອຸ່ນໆຖ້ວຍໜຶ່ງ, ລ້ວນແຕ່ສາມາດກາຍເປັນທູດແຫ່ງການແລກປ່ຽນດ້ານອະລິຍະທໍາໄດ້; ການເຂົ້າມາທ່ອງທ່ຽວຈີນທີ່ສະດວກສະບາຍຄັ້ງໜຶ່ງ, ຄວາມຮູ້ສຶກຮ່ວມທາງດ້ານວັດທະນະທໍາຄັ້ງໜຶ່ງ, ລ້ວນແຕ່ສາມາດເຕົ້າໂຮມຄວາມເປັນເອກະພາບກັນແຫ່ງການເປີດປະຕູ ແລະ ການຮ່ວມມືໄດ້. ກະແສນິຍົມ “ກາຍເປັນຄົນຈີນ” ຢູ່ຕ່າງປະເທດເປັນພາບສະທ້ອນທີ່ມີຊີວິດຊີວາແຫ່ງການເປີດປະຕູສູ່ພາຍນອກທີ່ມີລະດັບສູງຂອງຈີນ, ຍິ່ງເປັນພຶດຕິກຳຕົວຈິງທີ່ປະສົບຜົນສໍາເລັດຈາກການຖອດຖອນບົດຮຽນຊຶ່ງກັນ ແລະ ກັນດ້ານອະລິຍະທໍາ. ໃນອະນາຄົດ, ຄຽງຄູ່ກັບການເປີດປະຕູສູ່ພາຍນອກຂອງຈີນກ້າວສູ່ລວງເລິກຢ່າງບໍ່ຢຸດຢັ່ງ, ປັດໄຈຕ່າງໆທີ່ຕິດແທດກັບຊີວິດປະຈໍາວັນຂອງຈີນຈະເຂົ້າສູ່ໂລກຫຼາຍຂຶ້ນກວ່າເກົ່າ, ເຮັດໃຫ້ແນວຄິດປະຊາຄົມຮ່ວມຊາຕາກໍາຂອງມວນມະນຸດຝັງຮາກເລິກໄວ້ຢູ່ໃນຈິດໃຈຂອງມະນຸດຢູ່ທ່າມກາງການແລກປ່ຽນ ແລະ ການຖອດຖອນບົດຮຽນຊຶ່ງກັນ ແລະ ກັນດ້ານອະລິຍະທໍາ.

ໂດຍ: ຊີອາໄອ