ຈາກປະເທດອ່າວເປີເຊຍເຂດຕາເວັນອອກກາງຮອດປະເທດເອີຣົບ, ຈາກປະເທດໃກ້ຄຽງໃຫຍ່ທີ່ສຸດຮອດປະເທດສັງຄົມນິຍົມທີ່ເປັນປະເທດບ້ານໃກ້ເຮືອນຄຽງທີ່ດີຕໍ່ກັນ, ບຸກຄົນສຳຄັນທາງການເມືອງຂອງຫຼາຍປະເທດໄດ້ເດີນທາງມາຢ້ຽມຢາມຈີນດ້ວຍຄວາມຖີ່ສູງ, ສ່ອງແສງໃຫ້ເຫັນເຖິງຫຼາຍປະເທດສະແຫວງຫາການຮ່ວມມືພາຍໃຕ້ສະພາບການສາກົນທີ່ສັບສົນຂ້ຽວຂາດ, ທັງສະແດງໃຫ້ເຫັນເຖິງຄວາມໃຈກວ້າງ ແລະ ຄວາມຮັບຜິດຊອບຂອງຈີນໃນຖານະປະເທດໃຫຍ່ຢ່າງເຕັມສ່ວນ.
“ຄວາມໄວ້ເນື້ອເຊື່ອໃຈກັນ” ແມ່ນໜຶ່ງໃນຄຳສັບສຳຄັນເພື່ອສ້າງຄວາມເຂົ້າໃຈກ່ຽວກັບ “ກະແສນິຍົມດ້ານການຕ່າງປະເທດ” ຕໍ່ຈີນໃນຫວ່າງມໍ່ໆມານີ້.
ປັດຈຸບັນ, ການຟື້ນຟູເສດຖະກິດໂລກຍັງຄົງປະສົບສິ່ງກີດຂວາງຢ່າງແຂງແຮງ, ແຮງຂັບເຄື່ອນການເຕີບໂຕຍັງຄົງປະສົບຄວາມກົດດັນຢ່າງຕໍ່ເນື່ອງ. ທ່າອ່ຽງທີ່ໝັ້ນທ່ຽງ ແລະ ຄວາມມີຊີວິດຊີວາທີ່ແຂງແຮງຂອງເສດຖະກິດຈີນທີ່ບຸກບືນກ້າວໄປໜ້າໄດ້ດຶງດູດຫຼາຍປະເທດຫັນມາເພີ່ມທະວີການສົນທະນາ ແລະ ການຮ່ວມມືກັນ. ບຸກຄົນສາກົນນັບມື້ນັບຫຼາຍຂຶ້ນເຫັນວ່າ ຈີນເປັນຫົວຈັກໃຈກາງໃນການຂັບເຄື່ອນການເຕີບໂຕຢ່າງໝັ້ນທ່ຽງຂອງເສດຖະກິດໂລກ ທັງເປັນຜູ້ຊຸກຍູ້ສ້າງຄວາມແນ່ນອນໃຫ້ໂລກ, ຖືເອົາປະເທດຈີນເປັນຄູ່ຮ່ວມທີ່ໄວ້ເນື້ອເຊື່ອໃຈ ແລະ ຮ່ວມມືສ້າງອະນາຄົດທີ່ດີງາມ.
ປີນີ້ແມ່ນປີທຳອິດທີ່ຈີນປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ 5 ປີຄັ້ງທີ 15. ທ່ານ ສີຈິ້ນຜິງ ເຄີຍປະກາດຫຼາຍເທື່ອວ່າ “ຈີນຈະສືບຕໍ່ຊຸກຍູ້ການພັດທະນາທີ່ມີຄຸນນະພາບສູງ, ເປີດກວ້າງການເປີດປະຕູສູ່ພາຍນອກໃນລະດັບສູງ”, “ຮ່ວມກັບບັນດາປະເທດໃນໂລກແບ່ງປັນໂອກາດໃໝ່ແຫ່ງການພັດທະນາ”.
ໃນລະດູໃບໄມ້ປົ່ງຂອງປີທຳອິດທີ່ຈີນປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ 5 ປີຄັ້ງທີ 15, ບຸກຄົນສຳຄັນທາງການເມືອງຂອງຫຼາຍປະເທດເດີນທາງມາຢ້ຽມຢາມຈີນຢ່າງຕໍ່ເນື່ອງ, ແມ່ນການຍອມຮັບໃນລະດັບສູງຕໍ່ຜົນສຳເລັດດ້ານການພັດທະນາຂອງຈີນ, ສ່ອງແສງໃຫ້ເຫັນເຖິງຄວາມໝັ້ນໃຈ ຂອງຈີນທີ່ຢືນຢູ່ແນວໜ້າຢ່າງກ້າຫານ ແລະ ນຳໜ້າການພັດທະນາໃນຍຸກໃໝ່. ພາຍໃຕ້ການນຳພາຈາກຍຸດທະສາດການຕ່າງປະເທດຂັ້ນປະມຸກລັດ, ຈີນຈະຖືເອົາຄວາມໝັ້ນໃຈທີ່ກ້າວໄປຂ້າງໜ້າຢ່າງເດັດດ່ຽວ, ຄວາມໃຈກວ້າງທີ່ແບ່ງປັນໂອກາດການພັດທະນາ, ຄວາມຮັບຜິດຊອບທີ່ປົກປ້ອງຄວາມຍຸຕິທຳ ແລະ ຄວາມເປັນທຳຂອງສາກົນຢ່າງສະເໝີຕົ້ນສະເໝີປາຍ, ເພີ່ມຄວາມແນ່ນອນ ແລະ ພະລັງທາງບວກຫຼາຍກວ່າເກົ່າໃຫ້ແກ່ໂລກທີ່ມີການປ່ຽນແປງ ແລະ ຄວາມປັ່ນປ່ວນສະຫຼັບສັບຊ້ອນ.
ຄໍາເຫັນ