ຜ່ານມາ ກະຊວງກະສິກຳ ແລະ ປ່າໄມ້ ໄດ້ຂຸ້ນຂ້ຽວ ສືບຕໍ່ສຸມໃສ່ຊຸກຍູ້ ແລະ ສົ່ງເສີມ ການຜະລິດສະບຽງອາຫານທີ່ຈຳເປັນ ແລະ ເປັນພື້ນຖານຂອງພວກເຮົາຄື: ການຜະລິດເຂົ້າ, ຊີ້ນ, ໄຂ່ໄກ່, ປາ ແລະ ພືດຜັກ (ຕາມທີ່ໄດ້ກໍານົດໄວ້ໃນ ມະຕິ 19/ກມສພ ທີ່ມອບ ໝາຍໃຫ້ ກະຊວງກະສິກຳ ແລະ ປ່າໄມ້). ຜ່ານການຈັດຕັ້ງປະຕິບັດຕົວຈິງ ເຫັນໄດ້ວ່າ ໂດຍລວມແມ່ນ ສາມາດຕອບສະໜອງໄດ້ຕາມຄວາມຕ້ອງການບໍລິໂພກພາຍໃນໄດ້ໂດຍພື້ນຖານ,ສໍາລັບບາງແຂວງທີ່ຍັງບໍ່ສາມາດຜະລິດບາງພືດສະບຽງອາຫານໄດ້ພຽງພໍ ກໍໄດ້ມີການດຸ່ນດ່ຽງຈາກແຂວງໃກ້ຄຽງ. ໂຕເລກການຜະລິດໃນປີຜ່ານມາ ສາມາດສະຫຼຸບໄດ້ ດັ່ງນີ້:ຜະລິດເຂົ້າເປືອກໄດ້ 3.7 ລ້ານໂຕນ ບັນລຸຕາມແຜນ ເຫຼືອກິນ ແລະແຮໄວ້,ຜະລິດສະບຽງອາຫານໄດ້ 2.6 ລ້ານໂຕນ, ລື່ນແຜນການ 6%,ຜະລິດເປັນສິນຄ້າໄດ້ 11ລ້ານໂຕນ, ລື່ນແຜນການ 12.9%,ຜະລິດຊີ້ນ, ໄຂ່ ແລະ ປາໄດ້ 554,600 ໂຕນ, ບັນລຸຕາມແຜນການ,ແຕ່ກໍຍອມຮັບວ່າ: ຍັງມີບາງເມືອງ ຂອງແຂວງຈຳນວນໜຶ່ງຕາມຊາຍແດນ, ບັນດາໂຮງແຮມ ແລະ ໂຄງການຂອງຕ່າງປະເທດ ຍັງນໍາເຂົ້າບາງລາຍການ ສິນຄ້າກະສິກຳໝວດອາຫານ ຈາກຕ່າງປະເທດ, ແຕ່ແນວໃດກໍຕາມ ເຫັນວ່າການນໍາເຂົ້າສິນຄ້າກະສິກຳໝວດອາຫານ ເປັນຕົ້ນແມ່ນໝາກໄມ້, ພືດຜັກ ໃນປີ 2024 ຜ່ານມາ ມີມູນຄ່າທັງໝົດ ປະມານ 6 ລ້ານກວ່າໂດລາ ທຽບໃສ່ປີ 2023 ແມ່ນຫຼຸດລົງ 3 ລ້ານກວ່າໂດລາ,ການຜະລິດທົດແທນການນໍາເຂົ້າ ດ້ານປັດໄຈການຜະລິດ ແມ່ນລື່ນແຜນການຄື:ຫົວອາຫານສັດ ສາມາດປະຕິບັດໄດ້ 475,000 ກວ່າໂຕນ ເທົ່າກັບ 91% ຂອງການສະໜອງຫົວອາຫານສັດ ຢູ່ຕະຫຼາດພາຍໃນ (ມະຕິສະພາແຫ່ງຊາດ ໃຫ້ໄດ້ຫຼາຍກວ່າ 70%); ຝຸ່ນຊີວະພາບ ສາມາດປະຕິບັດໄດ້ 1,300,000 ໂຕນ, ເທົ່າກັນ 65% ຂອງການສະໜອງ ຝຸ່ນຊີວະພາບ ຢູ່ຕະຫຼາດພາຍໃນ (ມະຕິສະພາແຫ່ງຊາດ 50%).ແຕ່ແນວໃດກໍຕາມ ສິນຄ້າກະສິກຳຫຼັກທີ່ພວກເຮົານໍາເຂົ້າແມ່ນ ໝວດວັດຖຸດິບເພື່ອການປຸງແຕ່ງ ເປັນຕົ້ນ: ກະຖິນນະລົງ, ກາກຖົ່ວເຫຼືອງ, ກາກທັນຍະພືດ, ກາກສາລີ.
ທ່ານກ່າວຕື່ມວ່າ:ໃນຕໍ່ໜ້າຂະແໜງການຈະໄດ້ສຸມໃສ່ ບັນດາໜ້າວຽກຕ່າງໆ ເປັນຕົ້ນ:ສືບຕໍ່ຜັນຂະຫຍາຍ ແຈ້ງການຂອງຫ້ອງວ່າການສໍານັກງານນາຍົກລັດຖະມົນຕີສະບັບເລກທີ 1115/ຫສນຍ, ກຳນົດລາຍການສິນຄ້າທີ່ສາມາດຜະລິດໄດ້ພາຍໃນ ດ້ວຍມາດຕະການອະນຸຍາດໃຫ້ນໍາເຂົ້າໄດ້ສະເພາະແຕ່ດ່ານສາກົນເທົ່ານັ້ນ, ບໍ່ອະນຸຍາດໃຫ້ນໍາເຂົ້າຜ່ານດ່ານທ້ອງຖິ່ນ ແລະ ດ່ານປະເພນີ, ເພື່ອໃຫ້ສາມາດຄຸ້ມຄອງໄດ້ ທັງປະລິມານ ແລະ ຄຸນນະພາບຂອງສິນຄ້ານໍາເຂົ້າ ພ້ອມທັງເປັນການປົກປ້ອງ ແລະ ສົ່ງເສີມການຜະລິດພາຍໃນ; ໃນນັ້ນ:ສຳລັບການຈັດຕັ້ງຜັນຂະຫຍາຍມະຕິ04/ກມສພ ວ່າດ້ວຍການສ້າງເສດຖະກິດ ເອກະລາດ ເປັນເຈົ້າຕົນເອງ ໃນໄລຍະໃໝ່ ຫຼື (ສອຈ),ໂດຍ ຂະແໜງການກະສິກຳ ແລະ ປ່າໄມ້ ໄດ້ຜັນຂະຫຍາຍ ເຂົ້າໃນແຜນພັດທະນາກະສິກຳ, ປ່າໄມ້ ແລະ ພັດທະນາຊົນນະບົດ ໃນແຕ່ລະໄລຍະ ໂດຍສະເພາະ ແມ່ນແຜນການປີ 2025, ແຜນການ 5 ປີ ຄັ້ງທີ IX (2026-2030) ແລະ ຍຸດທະສາດພັດທະນາກະສິກໍາ ຮອດປີ 2035, ວິໄສທັດ 2050, ໂດຍໄດ້ກໍານົດອອກເປັນແຜນງານ, ແຜນການ ແລະ ໂຄງການລະອຽດ ໃນບັນດາໜ້າວຽກຈຸດສຸມ ດັ່ງນີ້:ໄດ້ມີການກຳນົດແຜນງານຜະລິດເປັນສິນຄ້າຄືນໃໝ່ ໂດຍໃຫ້ມີການຕິດພັນກັບການປຸງແຕ່ງ ເພື່ອໃຫ້ກຸ້ມຕົນເອງໃນການສະໜອງຜົນຜະລິດກະສິກຳພາຍໃນໃຫ້ພຽງພໍ ແລະ ສ້າງເປັນສິນຄ້າສົ່ງອອກໄດ້,ກໍານົດນະໂຍບາຍສະເພາະ ເພື່ອເຮັດໃຫ້ການຜະລິດບັນດາປັດໄຈການຜະລິດໃຫ້ພຽງພໍ ໂດຍສຸມໃສ່ການຜະລິດແນວພັນພືດ ແລະ ສັດ, ຝຸ່ນ, ຫົວອາຫານສັດ ແລະ ອື່ນໆ ໃຫ້ເປັນ ເຈົ້າຕົນເອງ ແລະ ສາມາດສະໜອງໃຫ້ພາຍໃນພຽງພໍ ເພື່ອຫຼຸດຜ່ອນການນໍາເຂົ້າ ທັງຫຼຸດຕົ້ນທຶນການຜະລິດ, ສາມາດແຂ່ງຂັນໄດ້, ໂດຍໄດ້ມອບໃຫ້ບັນດາກົມວິຊາການ ສ້າງເປັນໂຄງການ ຜະລິດແນວພັນຂອງຕົນ ໃນແຕ່ລະປີ, ເພີ່ມທະວີຈັດສັນເຂດການຜະລິດ ໃຫ້ສອດຄ່ອງກັບຈຸດພິເສດຂອງແຕ່ລະທ້ອງຖິ່ນ, ສືບຕໍ່ຍູ້ແຮງການປັບປຸງກໍາລັງການຜະລິດ ດ້ວຍການຈັດຕັ້ງເປັນກຸ່ມການຜະລິດ, ເປັນສະຫະກອນແບບໃໝ່, ເອົາໃຈໃສ່ສະໜອງປັດໄຈການຜະລິດ ເພື່ອເຮັດໃຫ້ຜູ້ປະກອບການມີຄວາມເຂັ້ມແຂງ, ສືບຕໍ່ສຸມໃສ່ດຸ່ນດ່ຽງການຜະລິດ ການບໍລິໂພກ ໂດຍສົມທົບກັບພະແນກກະກໍາ ແລະ ປ່າໄມ້ແຂວງ, ນະຄອນຫຼວງວຽງຈັນ ໃນການສຶກສາ ແລະ ເກັບກຳຂໍ້ມູນກ່ຽວກັບ ເຂົ້າ, ຊີ້ນ, ໄຂ່, ປາ ແລະ ພືດຜັກ ອັນໃດສາມາດກຸ້ມຕົນເອງ, ອັນໃດຍັງບໍ່ສາມາດກຸ້ມຕົ້ນ ແລະ ອັນໃດເຫຼືອ ເພື່ອໃຫ້ສາມາດກຳນົດເປັນໂຄງການໃນການສົ່ງເສີມໃຫ້ຖືກເປົ້າໝາຍ ແລະ ພັດທະນາບັນດາສູນສົ່ງເສີມ, ສູນຄົ້ນຄວ້າໃຫ້ມີຄວາມເຂັ້ມແຂງ ສາມາດເປັນເຈົ້າການ ຮັບປະກັນທາງດ້ານເຕັກນິກ, ການຜະລິດແນວພັນ ເພື່ອສະໜອງ ແລະ ຊຸກຍູ້ສົ່ງເສີມການ ຜະລິດຂອງປະຊາຊົນ ໃຫ້ໄດ້ຫຼາຍຂຶ້ນ.
(ຂ່າວ-ພາບ:ສຳນານ)
ຄໍາເຫັນ