 |
ທ່ານ ນາງ ສຸກສາຄອນ ແສງສຸລິວົງ ຮອງຫົວໜ້າ ສລຍ ກ່າວວ່າ: ມູນນິທິຮອນດາ ສ້າງຕັ້ງໂຄງ ການລາງວັນນີ້ຂຶ້ນມາ ເພື່ອປູກຈິດສຳນຶກໃຫ້ຊາວໜຸ່ມໃນທົ່ວໂລກ ມີວິໄສທັດກວ້າງໄກ, ມີແນວຄິດສ້າງສັນ, ອົດທົນ, ຜ່ານຜ່າທຸກຂໍ້ຫຍຸ້ງຍາກ ແລະ ຮຽນຮູ້ເພື່ອປັບປຸງຢ່າງຕໍ່ເນື່ອງ ເພື່ອໃຫ້ສາມາດບັນລຸຄວາມຝັນຂອງຕົນ ໃນການປະກອບສ່ວນພັດທະນາຊຸມຊົນ ແລະ ສັງຄົມແບບຍືນຍົງ ໂດຍຜ່ານການປະຕິບັດພາລະກິດໃນການຈັດຕັ້ງ ຫຼື ອົງກອນທີ່ຕົນເອງສັງກັດຢູ່ ຜູ້ໄດ້ຮັບລາງວັນ Honda Y-E-S Award ຕ້ອງປະກອບສ່ວນໃນການສົ່ງເສີມ-ແລກປ່ຽນດ້ານວິຊາການ, ຂະຫຍາຍສາຍພົວພັນການຮ່ວມມື ແລະ ສົ່ງເສີມການແລກປ່ຽນວັດທະນະທຳຂອງສອງຊາດ ລາວ-ຍີ່ປຸ່ນ ໃຫ້ແໜ້ນແຟ້ນຍິ່ງຂຶ້ນ. ປີ 2026 ເປັນປີທີ 19 ທີ່ ສປປ ລາວ ໄດ້ຈັດຕັ້ງປະຕິບັດໂຄງການ ເພື່ອຄັດເລືອກຜູ້ຮັບລາງວັນຮອນດາ ພາຍໃຕ້ຈຸດປະສົງຂອງໂຄງການ ສລຍ ໂດຍໄດ້ຮັບການຊີ້ນຳຈາກຜູ້ອໍານວຍການໃຫຍ່ ມຊ ແລະ ຄະນະກຳມະການຄັດເລືອກນັກສຶກສາ ເພື່ອຮັບລາງວັນ ຮ່ວມກັບຄະນະວິສະວະກຳສາດ, ຄະນະຊັບພະຍາກອນນ້ຳ, ຄະນະວິທະຍາສາດທຳມະຊາດ, ຄະນະສະຖາປັດຕະຍະກຳສາດ ແລະ ກະຊວງ ສສກ ໄດ້ປຶກສາຫາລື ເພື່ອກະກຽມຂະບວນການຄັດເລືອກ ແລະ ດຳເນີນການຈັດຕັັ້ງປະຕິບັດໄປຕາມແຜນທີ່ກຳນົດໄວ້. ນັບແຕ່ການໂຄສະນາດ້ວຍຫຼາຍຮູບແບບແຈ້ງຂໍ້ມູນ ແລະ ຈັດປະຖົມນິເທດຢູ່ບັນດາຄະນະວິຊາດັ່ງກ່າວ ເພື່ອແຈ້ງຕາຕະລາງການຮັບສະໝັກ ແຕ່ເດືອນເມສາ 2026 ເປັນຕົ້ນມາ.
ຜົນການຈັດຕັ້ງປະຕິບັດໃນປີນີ້, ມີຄວາມໂດດເດັ່ນເປັນພິເສດ ໂດຍມີນັກສຶກສາເຂົ້າຮ່ວມ (ປີ 2, 3, 4, 5) 160 ຄົນ ເພີ່ມຂຶ້ນ 30% ທຽບໃສ່ປີ 2025 ຂະບວນການຄັດເລືອກ ໄດ້ດໍາເນີນຢ່າງເຄັ່ງຄັດ. ໃນນີ້, ເບື້ອງຕົ້ນໄດ້ຄັດເລືອກເອົາ 40 ຄົນ ຍິງ 15 ຄົນ ຈາກ 4 ຄະນະວິຊາ. ການສອບເສັງຄັ້ງທີ 1 ຈັດຂຶ້ນເດືອນກໍລະກົດ ແມ່ນການສອບເສັງຂຽນບົດຄວາມເປັນພາສາລາວ ມີຜູ້ເຂົ້າສອບເສັງ 40 ຄົນ ຍິງ 15 ຄົນ, ການສອບເສັງຄັ້ງທີ 2 ຈັດຂຶ້ນເດືອນສິງຫາ ແມ່ນການສອບເສັງຂຽນບົດຄວາມເປັນພາສາອັງກິດ, ຄັດເລືອກເອົາ 20 ຄົນ ຍິງ 11 ຄົນ, ການສອບເສັງຄັ້ງທີ 3 ຈັດຂຶ້ນເດືອນກັນຍາ ແມ່ນການສອບເສັງສຳພາດເປັນພາສາອັງກິດແບບເຊິ່ງໜ້າ ມີຜູ້ເຂົ້າຮ່ວມ 10 ຄົນ ຍິງ 8 ຄົນ ຊຶ່ງຮອບນີ້ມີຜູ້ຕາງໜ້າຈາກມູນນິທິຮອນດາ ເຂົ້າຮ່ວມສຳພາດນໍາ ຜ່ານການຄັດເລືອກຜູ້ຊະນະເລີດ 2 ຄົນ ປະກອບມີ: ທ້າວ ສີລິສັກ ສີປະສົງ ຈາກພາກວິຊາວິທະຍາສາດຄອມພິວເຕີ ຄະນະວິທະຍາສາດທຳມະຊາດ ແລະ ນາງ ກັນຈະນາ ແສນບຸດຕະລາດ ຈາກພາກວິຊາສະຖາປັດຕະຍະກຳສາດ ຄະນະສະຖາປັດຕະຍະກຳສາດ. ໃນນີ້, ທັງສອງຄົນໄດ້ຮັບຫຼຽນຊະນະເລີດ, ໃບຢັ້ງຢືນ ແລະ ເງິນລາງວັນ 3,000 ໂດລາ.
(ແຫຼ່ງຂ່າວ: ວຽງຈັນໃໝ່)
ຄໍາເຫັນ