 |
ທ່ານ ພັນໂທ ທອງຄູນ ໃສສະຫວັດ ຮອງຫົວໜ້າກອງບັນຊາການ ປກສ ເມືອງ, ຄະນະຮັບຜິດຊອບການລະດົມທ້ອນໂຮມອາວຸດ ໄດ້ຜ່ານບົດສະຫຼຸບກ່ຽວກັບການຈັດຕັ້ງປະຕິບັດວຽກງານ ໂດຍຍົກໃຫ້ເຫັນວ່າ: ກອງບັນຊາການ ປກສ ເມືອງ ໄດ້ປະສານສົມທົບກັບພາກສ່ວນກ່ຽວຂ້ອງ ເພື່ອເຄື່ອນໄຫວເກັບກູ້ ແລະ ທ້ອນໂຮມອາວຸດລ່າເນື້ອ ແລະ ວັດຖຸຕ້ອງຫ້າມທຸກຊະນິດ ທີ່ເປັນອັນຕະລາຍ ແລະ ກໍ່ໃຫ້ເກີດປະກົດການຫຍໍ້ທໍ້ໃນສັງຄົມ ເນື່ອງຈາກການນຳໃຊ້ອາວຸດປືນ ແລະ ອາວຸດລ່າເນື້ອຢ່າງຊະຊາຍ ໂດຍບໍ່ຄຳນຶງເຖິງກົດໝາຍ ເຊິ່ງໄດ້ສ້າງຄວາມເສຍຫາຍຕໍ່ຊີວິດ ແລະ ຊັບສິນຂອງພົນລະເມືອງ ເປັນຕົ້ນ: ແມ່ນການນຳໃຊ້ເຂົ້າໃນການນາບຂູ່, ປຸ້ນຈີ້ຊີງຊັບ ແລະ ຄາດຕະກຳ ເຊິ່ງສົ່ງຜົນກະທົບຢ່າງໃຫຍ່ຫຼວງຕໍ່ຄວາມເປັນລະບຽບຮຽບຮ້ອຍຂອງສັງຄົມ.
ຜ່ານການຈັດຕັ້ງປະຕິບັດໃນປີ 2025-2026 ຜ່ານມາ, ກອງບັນຊາການ ປກສ ເມືອງ ພ້ອມດ້ວຍ ພາກສ່ວນກ່ຽວຂ້ອງ ສາມາດກັກຢຶດ ແລະ ຮີບໂຮມວັດຖຸຕ້ອງຫ້າມນຳມາທຳລາຍໃນພິທີຄັ້ງນີ້ລວມມີ: ປະເພດອາວຸດລ່າເນື້ອ ແລະ ວັດຖຸລະເບີດ (ລວມ 258 ກະບອກ) ປືນແກັບ 157 ກະບອກ, ປືນອັດລົມດັດແປງ 28 ກະບອກ, ປືນດັດແປງຍິງລູກແວງ 04 ກະບອກ ເຊິ່ງໃນນີ້ໄດ້ຈາກປະຊາຊົນສະໝັກໃຈນຳມາມອບຕໍ່ເຈົ້າໜ້າທີ່ 155 ກະບອກ, ໄດ້ຈາກການມ້າງລາຍຄະດີ 29 ກະບອກ ແລະ ປະເພດອຸປະກອນໝໍ້ຊ໊ອດປາ 16 ເຄື່ອງ.
ພິທີທຳລາຍອາວຸດຄັ້ງນີ້ ສະທ້ອນໃຫ້ເຫັນເຖິງການພະຍາຍາມສືບຕໍ່ບັງຄັບໃຊ້ລະບຽບກົດໝາຍ, ການຄຸ້ມຄອງອາວຸດ ແລະ ການຫ້າມນຳໃຊ້ອຸປະກອນທີ່ຜິດກົດໝາຍ ເພື່ອຮັກສາຄວາມສະຫງົບ, ຄວາມປອດໄພ ແລະ ຄວາມເປັນລະບຽບຮຽບຮ້ອຍຢູ່ໃນທ້ອງຖິ່ນ.
ຂ່າວ-ພາບ: ເມືອງໂຂງ
ຄໍາເຫັນ