ໂດຍ:ຕະວິນຍານ
ໃນປີ 2023, ກະຊວງ ອຄ ໄດ້ຮັບງົບປະມານໂຄງການທັງໝົດ 203.379 ໂດລາ ຊຶ່ງມາຮອດປັດຈຸບັນ,ສາມາດຈັດຕັ້ງປະຕິບັດງົບປະມານໄດ້ 73%, ແຜນຈັດຕັ້ງປະຕິບັດໃນປີ 2023 ມີທັງໝົດ 20 ກິດຈະກໍາ ປະຕິບັດໄດ້ຕົວຈິງ 14 ກິດຈະກໍາ. ວຽກທີ່ສໍາເລັດ ແມ່ນວຽກພັດທະນາລະບົບຂໍ້ມູນຕະຫຼາດສິນຄ້າກະສິກໍາ (Agriculture Market Information System): ສໍາເລັດການສ້າງປຶ້ມຄູ່ມື ແລະ ວິດີໂອ ໃຫ້ກັບຄະນະຜູ້ຮັບຜິດຊອບ ຢູ່ຂັ້ນສູນກາງ ແລະ ທ້ອງຖິ່ນ ເພື່ອເປັນບ່ອນອີງໃນການຈັດຕັ້ງປະຕິບັດການປ້ອນຂໍ້ມູນ, ພ້ອມທັງຝຶກສອນວິທີການນໍາໃຊ້, ການເກັບກໍາຂໍ້ມູນ, ການປ້ອນຂໍ້ມູນ ແລະ ການອັບເດດຂໍ້ມູນເຂົ້າໃນລະບົບດັ່ງກ່າວ. ປັດຈຸບັນ Lao-AMIS ໄດ້ສໍາເລັດແລ້ວປະມານ 80%ຊຶ່ງຄາດວ່າຈະເປີດໂຕນໍາໃຊ້ລະບົບຢ່າງເປັນທາງການໃນໄວໆນີ້, ສໍາເລັດການຮັບຮອງແຜນງານສົ່ງເສີມການສົ່ງອອກເຂົ້າ ຈາກທະນາຄານໂລກ ແລະ ການຈັດກອງປະຊຸມເຜີຍແຜ່ແຜນວຽກຍຸດທະສາດການສົ່ງອອກເຂົ້າ ໃຫ້ກັບ 5 ແຂວງເປົ້າໝາຍ ເພື່ອນໍາເອົາແຜນວຽກດັ່ງກ່າວນີ້ ໄປຜັນຂະຫຍາຍ ແລະ ເຜີຍແຜ່ ຢູ່ພາຍໃນແຂວງ ແລະ ເພື່ອເຮັດໃຫ້ວຽກງານການຜະລິດເຂົ້າມີສັກກະຍະພາບ ແລະ ສາມາດສະໜອງຕະຫຼາດພາຍໃນ ແລະ ສົ່ງອອກໄດ້,ພ້ອມນັ້ນ, ຍັງໄດ້ສໍາເລັດການຈັດພິມຮ່າງຍຸດທະສາດສົ່ງອອກເຂົ້າ ແລະ ໄດ້ແຈກຢາຍຮ່າງດັ່ງກ່າວໃຫ້ກັບ 5 ແຂວງ ເພື່ອເປັນບ່ອນອີງໃນການຈັດຕັ້ງປະຕິບັດ ແລະ ເຜີຍແຜ່ວຽກງານດັ່ງກ່າວ ໃຫ້ກັບຂະແໜງການ, ຫົວໜ່ວຍທຸລະກິດ ຢູ່ພາຍໃນແຂວງໄດ້ຮັບຊາບສໍາເລັດແລ້ວ 100%; ຮັບຮອງບົດແນະນໍາກາໝາຍຄຸນນະພາບສິນຄ້າກະສິກໍາ ຈາກທະນາຄານໂລກ. ພ້ອມນັ້ນ ຍັງໄດ້ສໍາເລັດການຈັດພິມ, ການແຈກຢາຍ ແລະ ການຈັດກອງປະຊຸມເຜີຍແຜ່ ‘‘ບົດແນະນຳກາໝາຍຄຸນນະພາບສິນຄ້າກະສິກຳ (ເຂົ້າ) ເພື່ອສົ່ງອອກ’’ໃຫ້ກັບແຂວງ ແລະ ເມືອງ ທີ່ນອນໃນເປົ້າໝາຍໂຄງການ ເພື່ອເປັນບ່ອນອີງໃນການຈັດຕັ້ງປະຕິບັດ ແລະ ເຜີຍແຜ່ວຽກງານດັ່ງກ່າວ ໃຫ້ກັບຂະແໜງການ, ຫົວໜ່ວຍທຸລະກິດ ຢູ່ພາຍໃນແຂວງສໍາເລັດແລ້ວ 100%ສໍາເລັດຮ່າງຄູ່ມືຈັດຕັ້ງປະຕິບັດການປັບປຸງໂຮງງານສີເຂົ້າໃຫ້ໄດ້ມາດຕະຖານໃນຂັ້ນພື້ນຖານ ແລະ ເພື່ອໃຫ້ສາມາດຈັດຕັ້ງປະຕິບັດໄດ້ຕາມລະບຽບການທີ່ວາງໄວ້. ພ້ອມນັ້ນຍັງໄດ້ເຜີຍແຜ່ຂໍ້ຕົກລົງວ່າດ້ວຍມາດຕະຖານໂຮງງານສີເຂົ້າ ສະບັບເລກທີ 1319/ອຄ.ກອຫ ຢູ່ແຂວງວຽງຈັນ ແລະ ຄໍາມ່ວນ,ລົງການເກັບກໍາຂໍ້ມູນເພີ່ມ ຈາກຫົວໜ່ວຍທຸລະກິດທີ່ນອນໃນເມືອງເປົ້າໝາຍ ແລະ ບໍ່ນອນໃນເມືອງເປົ້າໝາຍໂຄງການ. ພ້ອມນັ້ນ, ຍັງໄດ້ຈັດກອງປະຊຸມປ້ອນຂໍ້ມູນ ເພື່ອສ້າງໃບດຸ່ນດ່ຽງເຂົ້າ ຢູ່ແຂວງໄຊຍະບູລີ, ວຽງຈັນ, ນະຄອນຫຼວງວຽງຈັນ ແລະ ຄຳມ່ວນ. ນອກນັ້ນ ຍັງໄດ້ສຳເລັດການກວດກາຄືນຄວາມຖືກຕ້ອງຂອງຂໍ້ມູນສຳຫຼວດ ລວມທັງການປ້ອນຂໍ້ມູນທັງໝົດເຂົ້າໃນຖານຂໍ້ມູນ ແລະ ດຳເນີນການວິເຄາະຂໍ້ມູນ ເພື່ອສ້າງໃບດຸ່ນດ່ຽງເຂົ້າ ສຳລັບ 5 ແຂວງເປົ້າໝາຍ,ສໍາເລັດການຈັດຝຶກອົບຮົມໃນຫົວຂໍ້: ສ້າງຄວາມເຂັ້ມແຂງການຮ່ວມກຸ່ມທຸລະກິດ ໃນການເຊື່ອມໂຍງລະຫວ່າງຜູ້ປະກອບກິດຈະການໂຮງສີເຂົ້າ ແລະ ກຸ່ມຜູ້ຜະລິດເຂົ້າເປັນສິນຄ້າ ເພື່ອສົ່ງເສີມການຮ່ວມມື ລະຫວ່າງຜູ້ປະກອບກິດຈະການໂຮງສີເຂົ້າ,ພືດຜັກ ແລະ ກຸ່ມຜູ້ຜະລິດເຂົ້າເປັນສິນຄ້າພືດຜັກໃຫ້ເຊື່ອມໂຍງກັນຕາມຕ່ອງໂສ້ການຜະລິດ ແລະ ການບໍລິການ ໃຫ້ມີຄວາມຍືນຍົງ, ຕໍ່ເນື່ອງ, ມີປະສິດທິຜົນ, ມີຄວາມເຂັ້ມແຂງ, ມີການແລກປ່ຽນຂໍ້ມູນຂ່າວສານຕ່າງໆ ແລະ ສາມາດແຂ່ງຂັນ ແລະ ເຂົ້າເຖິງຕະຫຼາດ ຢູ່ ແຂວງໄຊຍະບູລີ, ຄໍາມ່ວນ, ບໍລິຄໍາໄຊ ແລະ ວຽງຈັນ. ນອກນັ້ນ, ຍັງໄດ້ສ້າງປຶ້ມຄູ່ມືຈັດຕັ້ງມາດຕະຖານ GMP, HACCP ພາກປະຕິບັດສໍາລັບໂຮງສີເຂົ້າ ເພື່ອໃຫ້ໂຮງສີເຂົ້າ ໄດ້ຮັບຮູ້ ແລະ ເຂົ້າໃຈແນວຄວາມຄິດ ແລະ ຫຼັກການຂອງ GMP/HACCP ແລະ ຮູ້ເຖິງຄວາມສໍາຄັນຂອງຄວາມປອດໄພຂອງອາຫານ, ສຸຂະອະນາໄມໃນການຜະລິດ ແລະ ເພີ່ມຄວາມສາມາດໃນການແຂ່ງຂັນໃນຕະຫຼາດພາຍໃນ ແລະ ຕ່າງປະເທດ.
ຄໍາເຫັນ