ກະຊວງການເງິນປະຕິບັດແຜນງົບປະມານໄດ້ລື່ນແຜນການສະພາແຫ່ງຊາດຮັບຮອງ

ກອງປະຊຸມສະຫຼຸບວຽກງານການເງິນ ທົ່ວປະເທດ ປະຈຳປີ 2023 ແລະ ທິດທາງປີ 2024 ຄັ້ງວັນທີ 18 ທັນວາ 2023 ໂດຍການເປັນປະທານຂອງ ທ່ານ ສັນຕິພາບ ພົມວິຫານ ລັດຖະມົນຕີ ກະຊວງການເງິນ, ມີບັນດາຮອງລັດຖະມົນຕີ, ອົງການທຽບເທົ່າອ້ອມຂ້າງສູນກາງ, ເຈົ້າຄອງນະຄອນຫຼວງ, ເຈົ້າແຂວງ ແລະ ແຂກຖືກເຊີນເຂົ້າຮ່ວມ.
ທ່ານ ສັນຕິພາບ ພົມວິຫານ ກ່າວວ່າ: ອັນທີ່ພົ້ນເດັ່ນແມ່ນການແກ້ໄຂບັນຫາຄວາມຫຍຸ້ງຍາກດ້ານເສດຖະກິດ-ການເງິນ ໃນການຈັດຕັ້ງປະຕິບັດວາລະແຫ່ງຊາດ, ອັດຊ່ອງວ່າງການຮົ່ວໄຫຼງົບປະມານ, ຫັນການຄຸ້ມ ຄອງລາຍຮັບ-ລາຍຈ່າຍງົບປະມານດ້ວຍເຄື່ອງມືທັນສະໄໝ, ຕັ້ງໜ້າປະຕິບັດນະໂຍບາຍປະຢັດ ແລະ ຕ້ານການຟຸ່ມເຟືອຍເຂົ້າສູ່ລວງເລິກ, ປະຕິບັດແຜນງົບປະມານແຫ່ງລັດປີ 2023 ໄດ້ລື່ນແຜນການທີ່ສະພາແຫ່ງຊາດຮັບຮອງ, ຊຶ່ງແຕ່ ວັນທີ 1 ມັງກອນຫາ 15 ທັນວາ 2023 ສາມາດປະຕິບັດລາຍຮັບໄດ້ທັງໝົດ 38.530 ຕື້ກີບ ເທົ່າກັບ 100,21% ຂອງແຜນການປີ, ໃນນັ້ນ. ລາຍຮັບພາຍໃນປະຕິບັດໄດ້ 37.241 ຕື້ກີບ, ປະຕິບັດແຜນລາຍຈ່າຍງົບປະມານໄດ້ທັງໝົດ 33.120, ລາຍຈ່າຍປົກກະຕິ 24.763 ຕື້ກີບ, ປະກອບສ່ວນໃນການສູ້ຊົນປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ ແລະ ແຜນງົບປະມານປະຈຳປີ ຢ່າງຫ້າວຫັນ ແລະ ມີຜົນສຳເລັດໂດຍພື້ນຖານ, ຮັບປະກັນສະຖຽນລະພາບທາງດ້ານການເມືອງ ໄວ້ໄດ້ຢ່າງໜັກແໜ້ນ, ໄປພ້ອມໆກັບຜົນສຳເລັດພື້ນຖານດັ່ງກ່າວ, ກໍຍັງມີຫຼາຍບັນຫາຂໍ້ຄົງຄ້າງ ທີ່ຕ້ອງສຸມໃສ່ແກ້ໄຂຢ່າງຈິງຈັງ ແລະ ໃຫ້ເປັນລະບົບເປັນຕົ້ນແມ່ນການສືບຕໍ່ແກ້ໄຂຄວາມ ຫຍຸ້ງຍາກດ້ານເສດຖະກິດ-ການເງິນ ແລະ ບັນຫາໜີ້ສິນສາທາລະນະທີ່ສະສົມແກ່ຍາວມາດົນນານ, ການພັດທະນາການເງິນແຫ່ງລັດເປັນທັນສະໄໝ, ການປະຕິຮູບລັດວິສາຫະກິດ, ປະກອບສ່ວນຫຼຸດຜ່ອນຄວາມກົດດັນຕໍ່ອັດຕາແລກປ່ຽນ, ອັດຕາເງິນເຟີ້ ແລະ ຄ່າຄອງຊີບຂອງພໍ່ແມ່ປະຊາຊົນ. ບັນຫາສຳຄັນທີ່ສຸດ ແມ່ນຕ້ອງມີຄວາມໜັກແໜ້ນ, ເດັດຂາດ ແລະ ຕັດສິນໃຈສູງ ໃນການແກ້ໄຂບັນຫາ, ຈຸດອ່ອນຂໍ້ຄົງຄ້າງທີ່ຍັງມີ ແລະ ພ້ອມກັນຜ່ານຜ່າຄວາມຫຍຸ້ງຍາກດັ່ງກ່າວເພື່ອແກ້ໄຂບັນຫາໃຫ້ທັນສະພາບການ.
ທ່ານ ສັນຕິພາບ ພົມວິຫານ ກ່າວຕື່ມວ່າ: ກອງປະຊຸມຄັ້ງນີ້ ດຳເນີນພາຍໃຕ້ຄຳຂວັນ “ລາຍຮັບພາຍໃນ ກຸ້ມລາຍຈ່າຍພາຍໃນ, ມີສ່ວນສະສົມໄວ້ຊຳລະໜີ້ສິນ ແລະ ບຸກທະລຸການຄຸ້ມຄອງງົບປະມານແຫ່ງລັດ ເປັນທັນສະໄໝ”. ສະນັ້ນ, ໃນສະພາບການ ແລະ ເງື່ອນໄຂປັດຈຸບັນຍັງຈະປະເຊີນກັບຄວາມຫຍຸ້ງຍາກ ເປັນຕົ້ນແມ່ນ ການເພີ່ມຂຶ້ນຂອງລາຄາສິນຄ້າ ແລະ ອັດຕາເງິນເຟີ້, ຊຶ່ງໄດ້ສົ່ງຜົນກະທົບທາງລົບໂດຍກົງຕໍ່ກັບການຈັດຕັ້ງປະຕິບັດແຜນພັດທະນາ ເສດຖະກິດ-ສັງຄົມ ແຫ່ງຊາດ, ແຜນງົບປະມານແຫ່ງລັດ, ຜູ້ປະກອບການຕະຫຼອດຮອດ ການກໍາລົງຊີວິດ ຂອງພະນັກງານ-ລັດຖະກອນ, ກຳລັງປະກອບອາວຸດ ແລະ ປະຊາຊົນບັນດາເຜົ່າ, ພ້ອມກັນນັ້ນ, ປີ 2024 ເປັນປີໜຶ່ງທີ່ມີ ຄວາມສໍາຄັນທີ່ ສປປ ລາວ ເປັນປະທານອາຊຽນ ແລະ ເປີດປີທ່ອງທ່ຽວ ທັງໝົດນັ້ນເປັນແຮງຍູ້ຕັນເພີ່ມຄວາມຕ້ອງການລາຍຈ່າຍງົບປະມານສູງຂຶ້ນ, ສະນັ້ນ, ໜ້າທີ່ການເມືອງຫຼັກ ຂອງຂະແໜງການເງິນ ແມ່ນຕ້ອງສຸມໃສ່ຂຸດຄົ້ນເກັບລາຍຮັບ, ຄຸ້ມຄອງລາຍຈ່າຍ ງົບປະມານ ໃຫ້ມີປະສິດທິພາບ ແລະ ປະສິດທິຜົນ, ຮັບປະກັນຄວາມຕ້ອງການລາຍ ຈ່າຍລວມ ເພື່ອບັນລຸເປົ້າໝາຍການພັດທະນາ; ປະຕິບັດພັນທະ ແລະ ເຊີດຊູບົດບາດ ຂອງ ສປປ ລາວ ໃນເວທີສາກົນ.
ຂ່າວ:ບຸນອູ້ມ,ພາບ:ບຸນຕອມ