ສະຫາຍ ພົນເອກ ຈັນສະໝອນ ຈັນຍາລາດຮອງນາຍົກລັດຖະມົນຕີລັດຖະມົນຕີກະຊວງປ້ອງກັນປະເທດ ແຫ່ງ ສປປ ລາວ ໄດ້ຂຶ້ນຮັບການເປັນປະທານກອງປະຊຸມລັດຖະມົນຕີປ້ອງກັນປະເທດອາຊຽນ ແລະ ອາຊຽນ-ບວກ (ASEAN Defence Ministers’ Meeting (ADMM) and ADMM-Plus) ຢ່າງເປັນທາງການ ຕໍ່ຈາກທ່ານ ປຣະໂບໂວ ສຸບຽນໂຕລັດຖະມົນຕີກະຊວງປ້ອງກັນປະເທດ ແຫ່ງ ສ ອິນໂດເນເຊຍ ທີ່ ນະຄອນຫຼວງ ຈາກາຕາປະເທດອິນໂດເນເຊຍ ເມື່ອບໍ່ດົນມານີ້.
ໃນປີ 2024 ກະຊວງປ້ອງກັນປະເທດ ກໍຄື ກອງທັບປະຊາຊົນລາວ ຈະໄດ້ຮັບກຽດເປັນເຈົ້າພາບ ແລະ ປະທານ ຫຼາຍກ່ວາ 20 ກອງປະຊຸມ ໃນຂອບວຽກງານປ້ອງກັນຊາດ ແລະ ທະຫານອາຊຽນ ນັບແຕ່ຂັ້ນ ວິຊາການ, ເຈົ້າໜ້າທີ່ອາວຸໂສ ຈົນຮອດລັດຖະມົນຕີປ້ອງກັນປະເທດອາຊຽນ. ໃນນີ້ໃນຂອບທະຫານອາຊຽນ ລວມມີກອງປະຊຸມຜູ້ບັນຊາການທະຫານສູງສຸດອາຊຽນ (ASAN Chiefs of Defence Forces Meeting (ACDFM)), ກອງປະຊຸມຫົວໜ້າສືບຂ່າວທະຫານອາຊຽນ (ASEAN Military Intelligence Meeting (AMIM)) ແລະ ກອງປະຊຸມຫົວໜ້າສູ້ຮົບອາຊຽນ (ASEAN Military Operations Meeting (AMOM)) ແລະ ໃນຂອບເວທີພາກພື້ນອາຊຽນ (ASEAN Regional Forum). ພົ້ນເດັ່ນແມ່ນ ກະຊວງປ້ອງກັນປະເທດ ຈະເປັນເຈົ້າພາບຈັດກອງປະຊຸມລັດຖະມົນຕີປ້ອງກັນປະເທດອາຊຽນ-ບວກ ຊຶ່ງຖືວ່າເປັນຄັ້ງທໍາອິດ ສໍາລັບ ສປປ ລາວ. ກອງປະຊຸມດັ່ງກ່າວລວມມີ 10 ປະເທດສະມາຊິກອາຊຽນ ແລະ 8 ປະເທດບວກຄື: ອົສຕຣາລີ, ຈີນ, ອິນເດຍ, ຍີ່ປຸ່ນ, ນິວຊີແລນ, ສ ເກົາຫຼີ, ຣັດເຊຍ ແລະ ອາເມຣິກາ ເຂົ້າຮ່ວມ. ດ້ວຍເຫດນັ້ນ ມັນຈຶ່ງຮຽກຮ້ອງໃຫ້ທຸກພາກສ່ວນຕ້ອງເປັນເຈົ້າການ ແລະ ເອົາໃຈໃສ່ຢ່າງຈິງຈັງ ໃນການຫ້າງຫາກະກຽມ ໃຫ້ແກ່ການເປັນເຈົ້າພາບ ເພື່ອຮັບປະກັນເຮັດໃຫ້ການເປັນປະທານອາຊຽນໃນຄັ້ງນີ້ ດໍາເນີນໄປດ້ວຍຜົນສໍາເລັດ, ປາສະຈາກບັນຫາຕ່າງໆ, ທັງນີ້ນອກຈາກ ເພື່ອເປັນການສ້າງຄວາມເຊື່ອໝັ້ນໃຫ້ແກ່ບັນດາຜູ້ແທນມາເຂົ້າຮ່ວມກອງປະຊຸມ, ກໍຍັງເພື່ອເປັນການຍົກສູງບົດບາດຂອງກອງທັບປະຊາຊົນລາວ ໃຫ້ສູງເດັ່ນຂຶ້ນໃນເວທີພາກພື້ນ ແລະ ສາກົນອີກດ້ວຍ.
ທ່າມກາງສະພາບການທາງດ້ານຄວາມໝັ້ນຄົງ ຂອງພາກພື້ນ ແລະ ສາກົນ ທີ່ມີການປ່ຽນແປງ ຢ່າງສະຫຼັບສັບຊ້ອນ ດັັ່ງທີ່ບໍ່ເຄີຍມີມາກ່ອນ ເຊັ່ນ: ຂໍ້ຂັດແຍ່ງທາງທະຫານ, ຄວາມຫຍຸ້ງຍາກທາງດ້ານເສດຖະກິດ, ການປ່ຽນແປງທາງດິນຟ້າອາກາດ, ບັນຫາໃນມຽນມາ ລວມທັງສິ່ງທ້າທາຍທາງດ້ານການທະຫານ ແລະ ບໍ່ແມ່ນການທະຫານ ເປັນຕົ້ນ. ສິ່ງເຫຼົ່ານີ້ ໄດ້ກາຍເປັນສິ່ງທ້າທາຍໃຫ້ແກ່ການເປັນປະທານອາຊຽນ ຂອງພວກເຮົາຢ່າງຫຼີກລ່ຽງບໍ່ໄດ້, ເນື່ອງຈາກວ່າ ສິ່ງທ້າທາຍດັ່ງກ່າວແມ່ນບໍ່ສາມາດແກ້ໄຂໄດ້ໂດຍປະເທດໃດໜຶ່ງ ແລະ ພາຍໃນໄລຍະເວລາອັນສັ້ນ, ນອກຈາກນີ້, ບາງສິ່ງທ້າທາຍກໍເປັນບັນຫາລະອຽດອ່ອນ ຊຶ່ງມັນໄດ້ຮຽກຮ້ອງໃຫ້ກອງທັບປະຊາຊົນລາວພວກເຮົາ ຈະຕ້ອງໄດ້ເຮັດວຽກຢ່າງໜັກໜ່ວງຂຶ້ນກວ່າເກົ່າ, ພິຈາລະນາບັນຫາຢ່າງຖີ່ຖ້ວນ ແລະ ຮອບຄອບ ເພື່ອຮັບປະກັນຜົນປະໂຫຍດສູງສຸດຂອງ ກອງທັບປະຊາຊົນລາວ ເວົ້າສະເພາະ ກໍຄືອາຊຽນ ໂດຍການນໍາພາບັນດາປະເທດສະມາຊິກອາຊຽນ ແລະ ອາຊຽນ-ບວກ ຂັບເຄື່ອນບັນດາກົນໄກການຮ່ວມມື ເພື່ອເສີມຂະຫຍາຍຂີດຄວາມສາມາດ, ການເຮັດວຽກຮ່ວມກັນ ແລະ ການສົ່ງເສີມມາດຕະການ ການສ້າງຄວາມໄວ້ເນື້ອເຊື່ອໃຈ ຊຶ່ງກັນ ແລະ ກັນ ເພື່ອຮັດແໜ້ນໂຄງສ້າງຄວາມໝັ້ນຄົງຂອງພາກພື້ນ ກໍຄືການຮັບມື ແລະ ແກ້ໄຂບັນດາສິ່ງທ້າທາຍ ເພື່ອສົ່ງເສີມສັນຕິພາບ, ສະຖຽນລະພາບ ແລະ ຄວາມໝັ້ນຄົງ ຂອງພາກພື້ນ ແລະ ສາກົນ ເພື່ອໃຫ້ສອດຄ່ອງກັບຄໍາຂວັນອາຊຽນ 2024 ຂອງກະຊວງປ້ອງກັນປະເທດ: “ຮ່ວມມືກັນເພື່ອສັນຕິພາບ, ຄວາມໝັ້ນຄົງ ແລະ ຄວາມເຂັ້ມແຂງອາຊຽນ (ASEAN: Together for Peace, Security and Resilience)”.
ຂ່າວ-ພາບ: ໂທລະພາບກອງທັບ
ຄໍາເຫັນ