ພິທີຖະແຫຼງຂ່າວການກະກຽມ ແລະ ຈັດຕັ້ງສະເຫຼີມສະຫຼອງວັນສ້າງຕັ້ງກອງທັບປະຊາຊົນລາວ ຄົບຮອບ 75 ປີໄດ້ຈັດຂຶ້ນໃນວັນທີ 5 ມັງກອນນີ້, ທີ່ກະຊວງປ້ອງກັນປະເທດ ໂດຍໃຫ້ກຽດຖະແຫຼງຂ່າວຂອງທ່ານ ພົນໂທ ທອງລອຍ ສິລິວົງ ຮອງລັດຖະມົນຕີກະຊວງປ້ອງກັນປະເທດ ຫົວໜ້າກົມໃຫຍ່ການເມືອງກອງທັບ ທ່ານກ່າວວ່າ: ວັນສ້າງຕັ້ງກອງ ທັບປະຊາຊົນລາວໄດ້ໝູນວຽນມາບັນຈົບຄົບຮອບ 75 ປີ, ຊຶ່ງໃນປີ 2024 ນີ້, ກົມການເມືອງສູນກາງພັກໄດ້ຕົກລົງໃຫ້ຈັດຕັ້ງພິທີສະເຫຼີມສະຫຼອງວັນດັ່ງກ່າວຢ່າງເປັນຂະບວນກວ້າງຂວາງໃນທົ່ວສັງຄົມ ຊຶ່ງມີມະຕິຕົກລົງແຕ່ງຕັ້ງຄະນະຮັບຜິດ ຊອບຊີ້ນຳລະດັບຊາດ, ອະນຸກໍາມະການຮັບຜິດຊອບແຕ່ລະເນື້ອໃນໂດຍແມ່ນທ່ານ ບຸນທອງ ຈິດມະນີ ກຳມະການກົມການເມືອງສູນກາງພັກ ຜູ້ປະຈຳການ ຄະນະເລຂາທິການສູນກາງພັກ ຮອງປະທານປະເທດ ເປັນຫົວໜ້າພາຍໃຕ້ການຊີ້ນຳຂອງຄະນະຊີ້ນຳລະດັບຊາດ, ມີບັນດາຄະນະຮັບຜິດຊອບ, ອະນຸກຳມະການຕ່າງໆຂັ້ນກະຊວງປ້ອງກັນປະເທດ, ໄດ້ຍົກສູງຄວາມຮັບຜິດຊອບເຂົ້າໃນການຫ້າງຫາກະກຽມວຽກງານດ້ານຕ່າງໆໃຫ້ທັນກັບການຈັດຕັ້ງສະເຫຼີມສະຫຼອງວັນສ້າງຕັ້ງກອງທັບປະຊາຊົນລາວ ຄົບຮອບ 75 ປີໃນວັນທີ 20 ມັງກອນ 2024, ຄະນະຮັບຜິດຊອບກະຊວງປ້ອງກັນປະເທດໄດ້ກະກຽມ ແລະ ດຳເນີນການເຄື່ອນໄຫວກິດຈະກຳຕ່າງໆ ຊຶ່ງມີຜົນສຳເລັດຄື: ສ້າງບັນດາເອກະສານທີ່ເປັນບ່ອນອີງກ່ຽວກັບການສະເຫຼີມສະຫຼອງວັນສ້າງຕັ້ງກອງທັບປະຊາຊົນລາວ ຄົບຮອບ 75 ປີ, ຈັດຕັ້ງຝຶກອົບຮົມວຽກງານໂຄສະນາ-ປາຖະກະຖາໃຫ້ພະນັກງານຜູ້ທີ່ເຮັດວຽກງານການເມືອງ, ພະນັກງານໂຄສະນາອົບຮົມຢູ່ບັນດາກົມກອງກຳລັງຫຼວງ-ກຳລັງທ້ອງຖິ່ນໃນທົ່ວກອງທັບ, ປັບປຸງ-ຮຽບຮຽງບົດປາຖະກະຖາມູນເຊື້ອກອງທັບປະຊາຊົນລາວ ຄົບຮອບ 75 ປີ ເພື່ອເຄື່ອນໄຫວປາຖະກະຖາຢູ່ແຕ່ລະອົງການ, ກະຊວງ, ກົມກອງ, ສຳເລັດການງານແຂ່ງຂັນສິລະປະ-ວັນນະຄະດີທົ່ວກອງທັບ ໂດຍຈັດຕັ້ງເປັນ 5 ເຂດ, ມີ 55 ຫົວໜ່ວຍກົມກອງເຂົ້າຮ່ວມ, ສໍາເລັດການຕ້ອນຮັບ ແລະ ນຳພາຄະນະສິລະປະກອນກອງທັບປົດປ່ອຍປະຊາຊົນຈີນ ເຄື່ອນໄຫວສະແດງມິດຕະພາບຢູ່ບາງກົມກອງເຂດໃຈກາງນະຄອນຫຼວງ ແລະ ແຂວງວຽງຈັນ, ສົມທົບພາກສ່ວນກ່ຽວຂ້ອງພິມ ແລະ ຕິດຕັ້ງຍ້າຍໂຄສະນາຮູບພາບມູນເຊື້ອກອງທັບຢູ່ຕໍ່ໜ້າສຳນັກງານກະຊວງປ້ອງກັນປະເທດ, ຢູ່ຕໍ່ໜ້າວິທະຍາຄານໄກສອນ ພົມວິຫານ ແລະ ໂຮງໝໍສູນກາງ 103 ແລະ ຢູ່ຕໍ່ໜ້າກອງພັນ 233, ບັນດາກົມກອງສື່ມວນຊົນກອງທັບເຄື່ອນໄຫວເກັບກໍາຂ່າວ, ຂຽນບົດຄວາມວຽກດີຄົນເດັ່ນ, ສຳພາດປະຫວັດພະນັກ ງານປະຕິວັດອາວຸໂສອື່ນໆ, ໂຄສະນາຜ່ານລະບົບພາຫະນະສື່ມວນຊົນກອງທັບຢ່າງເນື່ອງນິດລຽນຕິດ ເປີດຂະບວນການແຂ່ງຂັນສ້າງຜົນງານຂ່ຳນັບຮັບຕ້ອນວັນສ້າງຕັ້ງກອງທັບປະຊົນລາວ ຄົບຮອບ 75 ປີທີ່ຈະມາເຖີງໃຫ້ເປັນຂະບວນຟົດຟື້ນກວ້າງຂວາງ, ສຳເລັດການກໍ່ສ້າງ, ປັບປຸງ ແລະ ຈັດວາງຫໍພິພິທະພັນປະຫວັດສາດກອງທັບປະຊາຊົນລາວຄືນໃໝ່ໃຫ້ມີຄວາມສວຍງາມ ແລະ ທັນສະໄໝ ໄດ້ຈັດພິທີເປີດນໍາໃຊ້ຢ່າງເປັນທາງການໃນວັນທີ 13 ທັນວາ 2023 ຜ່ານມາ, ຈັດຕັ້ງການຄັດເລືອກຜົນງານ, ຍ້ອງຍໍໃຫ້ກົມກອງລວມໝູ່ ແລະ ບຸກຄົນດີເດັ່ນໃນໂອກາດສະເຫຼີມສະຫຼອງວັນສ້າງຕັ້ງກອງ ທັບປະຊາຊົນລາວ ຄົບຮອບ 75 ປີ. ສຳເລັດການຈັດຕັ້ງແຂ່ງຂັນກິລາມວນຊົນຢູ່ 5 ເຂດ, ກິລາຍິງປືນທະຫານຮາບ-ກຳລັງໄຟແບກຫາບຢູ່ 6 ເຂດ ຊີງຂັນລັດຖະມົນຕີກະຊວງປ້ອງກັນປະເທດ ແລະ ຄັດເລືອກເອົາຕົວແທນແຕ່ລະເຂດເຂົ້າຮ່ວມແຂ່ງຂັນກິລາກາຍະກຳຢູ່ນະຄອນຫຼວງວຽງຈັນ.
ນັບແຕ່ນີ້ຮອດວັນທີ 20 ມັງກອນ 2024 ພວກເຮົາຈະໄດ້ສືບຕໍ່ຈັດຕັ້ງເຄື່ອນໄຫວບັນດາກິດຈະກໍາຕ່າງໆເຊັ່ນ:
ເຄື່ອນໄຫວໂຄສະນາ, ປາຖະກະຖາມູນເຊື້ອກອງທັບປະຊາຊົນລາວ ຄົບຮອບ 75 ປີໃຫ້ທົ່ວສັງຄົມຮັບຮູ້ຢ່າງກວ້າງຂວາງ,ຕ້ອນຮັບຄະນະສິລະປະກອນກອງທັບປະຊາຊົນຫວຽດນາມມາສະແດງມິດຕະພາບຢູ່ສປປ ລາວ, ຈັດຕັ້ງແຂ່ງຂັນກິລາການທະຫານ ແລະ ກິລາມວນຊົນໂດຍຈັດຕັ້ງແຂ່ງຂັນຢູ່ເຂດໃຈກາງນະຄອນຫຼວງ (ເດີ່ນກິລາກອງທັບຫຼັກ 5, ຈັດຕັ້ງຊ້ອມຮົບສະແດງຍິງລູກປືນແທ້ຂອງບັນດາເຫຼົ່າຮົບຢູ່ສະໜາມຝຶກແອບວິທະຍາຄານກົມມະດໍາໃນວັນທີ 17/1/2024 (ຕອນເຊົ້າ) ເຊີນການນຳພັກ-ລັດລົງຢ້ຽມຢາມ ແລະ ເຂົ້າຮ່ວມພິທີສະເຫຼີມສະຫຼອງວັນສ້າງຕັ້ງກອງທັບປະຊາຊົນລາວ ຄົບຮອບ 75 ປີຢູ່ບັນດາກົມກອງຈໍານວນໜຶ່ງ, ຈັດຕັ້ງອວຍພອນການນໍາພັກ-ລັດ, ພະນັກງານປະຕິວັດອາວຸໂສ-ບຳນານ, ຢ້ຽມຢາມພະນັກງານຜູ້ຖືກບາດເຈັບ-ເຈັບປ່ວຍທີ່ນອນປິ່ນປົວຢູ່ໂຮງໝໍ ແລະ ບັນດາສູນເສຍອົງຄະ, ຈັດຕັ້ງວາງສະແດງຜະລິດຕະພັນສິນຄ້າການທະຫານຢູ່ເດີ່ນສະໜາມຫຼວງໃນລະຫວ່າງວັນທີ 12-18 ມັງກອນ 2024, ສຳລັບໃນວັນທີ 19 ມັງກອນ 2024 ການນຳພັກ-ລັດໄດ້ຕົກລົງຈັດຕັ້ງພິທີໂຮມຊຸມນຸມສະເຫຼີມສະຫຼອງລະດັບຊາດ ແລະ ຖ່າຍທອດສົດພິທີດັ່ງກ່າວຜ່ານໂທລະພາບ ແລະ ວິທະຍຸຢູ່ຫໍປະຊຸມແຫ່ງຊາດ, ຈັດຕັ້ງຍ່າງມາລາທອນເພື່ອສຸຂະພາບຢູ່ສວນນ້ຳບຶງທາດຫຼວງໂດຍແມ່ນແນວລາວສ້າງຊາດເປັນຜູ້ຈັດ, ຈັດຕັ້ງພົບປະວິລະຊົນ, ນັກຮົບແຂ່ງຂັນ, ພະນັກງານປະຕິວັດອາວຸໂສ, ຈັດຕັ້ງຮັບພິທີການອວຍພອນຈາກບັນດາກະຊວງ, ອົງການຕ່າງໆໃນວັນທີ 18 ມັງກອນ 2024, ການກະກຽມຈັດຕັ້ງສະເຫຼີມ ສະຫຼອງວັນສ້າງຕັ້ງກອງທັບປະຊາຊົນລາວ ຄົບຮອບ 75 ປີ, ກະຊວງປ້ອງກັນປະເທດໄດ້ດຳເນີນໄປຕາມຄຳສັ່ງຂອງຄະ ນະເລຂາທິການສູນກາງພັກ ແລະ ແຜນການທີ່ໄດ້ຕົກລົງເປັນເອກະພາບໃນທົ່ວກອງທັບ ເພື່ອເສີມຂະຫຍາຍມູນເຊື້ອ, ທາດແທ້ຜົນງານໄຊຊະນະອັນໃຫຍ່ຫຼວງ, ວິລະກຳອັນລ້ຳເລີດຂອງກອງທັບປະຊາຊົນລາວ ໃຫ້ທົ່ວທັງຊາດຮັບຮູ້-ເຂົ້າໃຈຢ່າງກວ້າງຂວາງທົ່ວເຖິງ ແລະ ເລິກເຊິ່ງ, ການເຄື່ອນໄຫວຈັດຕັ້ງສະເຫຼີມສະຫຼອງໂດຍຖືເອົາເນື້ອໃນຈິດໃຈເປັນຈຸດໜັກ. ຕາງໜ້າຄະນະນໍາກະຊວງປ້ອງກັນປະເທດ ຮຽກຮ້ອງມາຍັງບັນດາສະຫາຍຄະນະພັກ, ບັນດາກະຊວງ, ສື່ມວນຊົນທຸກພາກສ່ວນ ຈົ່ງໃຫ້ການສະໜັບສະໜູນ ແລະ ຮ່ວມມືຢ່າງເປັນຂະບວນກວ້າງຂວາງ ຮັບຮູ້ເຂົ້າໃຈຕໍ່ໄຊຊະນະ, ຜົນງານຂອງກອງທັບຕະຫຼອດ 75 ປີຜ່ານມາ.
ຄໍາເຫັນ