ແກ່ນພັນ ແຫ່ງອານາຄົດ ໄດ້ຮ່ວມກັນສ້າງຜູ້ນໍາດ້ານດີຈີຕອນ ເພື່ອພາກພື້ນຂອງເຮົາ

ໂດຍ: ສ.ບຸດປະຊາ
    ເມື່ອເວົ້າເຖິງການບໍາລຸງສ້າງໄວໜຸ່ມ ເພື່ອສົ່ງເສີມເຂົາເຈົ້າເປັນທ່າແຮງໃຫ້ແກ່ການພັດທະນາດ້ານດີຈີຕອນ ສໍາລັບ 10 ປະເທດອາຊຽນ ແລະ ພາກພື້ນອາຊີປາຊີຟິກ, ໜຶ່ງບໍລິສັດເອກະຊົນ ທີ່ໂດດເດັ່ນກໍຄື ຫົວເຫວີຍ ຂອງ ສປ ຈີນ ແມ່ນມີສ່ວນສຳຄັນຕໍ່ກັບວຽກງານນີ້ ໂດຍໄດ້ດຳເນີນໂຄງການ “ແກ່ນພັນ ແຫ່ງອານານົດ” ຢູ່ບັນດາປະເທດໃນໂລກເມື່ອປີ 2008 ແລະ ສຳລັບ ສປປ ລາວ ແມ່ນເລີ່ມໃນປີ 2016. 
    “ແກ່ນພັນ ແຫ່ງອານາຄົດ” ຄືໂຄງການສົ່ງເສີມຜູ້ມີຄວາມສາມາດທີ່ໂດດເດັ່ນຂອງຫົວເຫວີຍ ຊຶ່ງຜູ້ທີ່ເຂົ້າຮ່ວມຈະໄດ້ສໍາຜັດກັບເຕັກໂນໂລຊີ ແລະ ປະສົບການດ້ານວັດທະນະທໍາທີຫຼາກຫຼາຍ, ການສະເໜີແນວທາງແກ້ໄຂບັນຫາສັງຄົມ ຜ່ານໂຄງການ Tech4Good ທີ່ມີິເປົ້າໝາຍໃນການສ້າງຜູ້ນໍາດ້ານໄອຊີທີ ແຫ່ງອານາຄົດ. ໃນປີນີ້, ຫົວເຫວີຍ, ມູນນິທິອາຊຽນ ແລະ ອົງການລັດຖະມົນຕີສຶກສາແຫ່ງອາຊີຕາເວັນອອກສຽງໃຕ້ (SEAMEO) ໄດ້ຮ່ວມກັນເປັນເຈົ້າພາບຈັດກອງປະຊຸມສຸດຍອດ “ແກ່ນພັນ ແຫ່ງອານາຄົດ” ປະຈໍາປີ 2023 ທີ່ ສປ ຈີນ ໂດຍຮ່ວມກັນ ເພື່ອອານາຄົດດີຈີຕອນຂອງພວກເຮົາ; ພ້ອມດຽວກັນນີ້, ການຮ່ວມມືແບບກວມລວມ ລະຫວ່າງ ຫົວເຫວີຍ ແລະ ສະຫະພັນໂທລະຄົມມະນາຄົມສາກົນ (ITU) ກໍໄດ້ເລີ່ມຕົ້ນ ດ້ວຍທ່າອ່ຽງຂອງການພັດທະນາດີຈີຕອນສໍາລັບພາກພື້ນ.
    ກອງປະຊຸມສຸດຍອດ “ແກ່ນພັນ ແຫ່ງອານາຄົດ” ປະຈໍາປີ 2023 ໄດ້ເປີດຂຶ້ນຢ່າງເປັນທາງການເມື່ອວັນທີ 19 ກັນຍາ 2023 ເພື່ອຮ່ວມກັນດຳເນີນງານ ການເສີ່ມສ້າງທັກສະດ້ານດີຈີຕອນ ພາຍໃຕ້ຫົວຂໍ້; “ເຊື່ອມຕໍ່, ຝຶກຝົນ, ມີສ່ວນຮ່ວມ ເພື່ອການເຕີບໂຕຂອງຜູ້ທີ່ມີຄວາມສາມາດດ້ານດີຈີຕອນຂອງພວກເຮົາ” ຊຶ່ງມີຜູ້ເຂົ້າຮ່ວມໂຄງການຈໍານວນ 91 ທ່ານ ທີ່ມາຈາກ 19 ປະເທດ ລວມທັງ 10 ປະເທດອາຊຽນ, ສປຈີນ ເຈົ້າພາບ ແລະ ສ ເກົາຫຼີ, ຍີ່ປຸ່ນ, ບັງກລາເທດ, ເນປານ, ສີລັງກາ, ມານດິບ, ຟີຈິ ແລະ ໝູ່ເກາະໂຊໂລມອນ. ທັງໝົດທີ່ເຂົ້າຮ່ວມໄດ້ຮັບການຄັດເລືອກໂດຍ ຫົວເຫວີຍ, ມູນນິທິອາຊຽນ ແລະ ITU. ໃນໂອກາດນີ້ ຫົວເຫວີຍ ກໍໄດ້ເນັ້ນເຖິງບົດບາດສຳຄັນຂອງໄວໜຸ່ມ ໃນວິວັດທະນາການທາງດີຈີຕອນຂອງພາກພື້ນ. ພ້ອມດຽວກັນນີ້, ທ່ານ ໄຊມອນ ຫຼິນ ປະທານບໍລິສັດຫົວເຫວີຍ ປະຈໍາອາຊີປາຊີຟິກ ກ່າວວ່າ: ປີນີ້, ເປັນອີກປີໜຶ່ງທີ່ ຫົວເຫວີຍ ໄດ້ເປັນເຈົ້າພາບຈັດກອງປະຊຸມສຸດຍອດ ແກ່ນພັນ ແຫ່ງອານາຄົດ ຂອງອາຊີປາຊີຟິກ. ທຸກປີ, ພວກເຮົາຈະເຫັນໄດ້ວ່າ ໂຄງການນີ້ ເຕີບໂຕໄປພ້ອມກັບສິ່ງ ໃໝ່ໆ ໂດຍມີຄູ່ຮ່ວມງານເຂົ້າຮ່ວມເພີ່ມຂຶ້ນ. ໃນຂະນະດຽວກັນ, ສິ່ງທີ່ບໍ່ມີການປ່ຽນແປງຄື: ການຮ່ວມມື, ຄວາມໄວ້ວາງໃຈ ແລະ ການເສີ່ມສັກຍະພາບໃຫ້ໄວໜຸ່ມ.
    ກ່ອນເປີດກອງປະຊຸມສຸດຍອດ, ໄດ້ມີການເລີ່ມງານດ້ວຍຂະບວນພາເລດ ວັດທະນະທໍາ ໂດຍມີຄະນະຜູ້ແທນເຂົ້າຮ່ວມທັງ 19 ປະເທດ ລວມທັງນັກສຶກສາ ທີ່ເປັນຕົວແທນຈາກບໍລິສັດຫົວເຫວີຍລາວ ດ້ວຍການແຕ່ງກາຍຊຸດປະຈໍາຊາດ ທັງມີການທັກທາຍຜູ້ຊົມ ແລະ ແບ່ງປັນວັດທະນະທໍາຂອງຕົນເອງຢ່າງພາກພູມໃຈ. ກ້າວສູ່ພິທີເປີດຢ່າງເປັນທາງການ, ທ່ານ ເກົາ ຄິມ ຮວນ ເລຂາທິການອາຊຽນ ກ່າວວ່າ: ຂ້າພະເຈົ້າຂໍສະໜັບສະໜູນຄວາມຄິດລິເລີ່ມ ນໍາໂດຍເອກະຊົນ ທີ່ມີວິໄສທັດໃນການດຶງດູດຄືກັນ ແລະ ບົ່ມເພາະຜູ້ມີຄວາມສາມາດດ້ານດີຈີຕອນເຊັ່ນ: “ໂຄງການ ແກ່ນພັນ ແຫ່ງອານາຄົດ”. ຂ້າພະເຈົ້າ ຫວັງວ່າ ໂຄງການນີ້ ຈະຊ່ວຍໃຫ້ໂອກາດແກ່ໄວໜຸ່ມ ພ້ອມທັງໃຫ້ຄວາມສຳຄັນກັບກຸ່ມທີ່ມີຄວາມສ່ຽງ ກໍຄືເພດຍິງ, ຄົນພິການ ແລະ ຜູ້ທີ່ມາຈາກຊົນນະບົດ ເພື່ອໃຫ້ເກີດການມີສ່ວນຮ່ວມ ແລະ ໃຫ້ມີຄວາມສົມດຸນ ບໍ່ມີການແບ່ງແຍກ.
    ໃນພິທີເປີດ. ຜູ້ແທນທີ່ເຂົ້າຮ່ວມ ຕາງກໍຕີລາຄາສູງຕໍ່ກອງປະຊຸມສູດຍອດ ຄັ້ງນີ້, ທ່ານ  ໂຫວ ຢານສີ ເອກອັກຄະລັດຖະທູດວິສາມັນຜູ້ມີອຳນາດເຕັມ ແຫ່ງ ສປ ຈີນ ປະຈໍາອາຊຽນ ໄດ້ກ່າວວ່າ: ສິ່ງນີ້ບໍ່ພຽງແຕ່ເປັນການປູກຝັງ “ແກ່ນພັນ” ເພື່ອການປ່ຽນແປງທາງດີຈີຕອນຂອງປະເທດໃນອາຊຽນເທົ່ານັ້ນ, ແຕ່ຍັງເປັນການຊຸກຍູ້ ໄວໜຸ່ມຄົນຮຸ່ນໃໝ່ ຍົກລະດັບການຮ່ວມມື ຈີນ-ອາຊຽນ. ທ່ານ ເຮັງ ສາຣິດ ຜູ້ແທນຖາວອນ ແຫ່ງຣາຊະອານາຈັກກຳປູເຈຍ ປະຈໍາອາຊຽນ ແລະ ປະທານຄະນະຮັບຜິດຊອບມູນນິທິອາຊຽນ ກໍໄດ້ກ່າວຂອບໃຈມາຍັງ ຫົວເຫວີຍ ວ່າ: ການຮ່ວມມືກັບມູນນິທິອາຊຽນ ເພື່ອສ້າງເວທີທີ່ສ້າງຄວາມເຂັ້ມແຂງໃຫ້ແກ່ໄວໜຸ່ມໃນພາກພື້ນອາຊີປາຊີຟິກ ເຮັດໃຫ້ເຂົາເຈົ້າສາມາດເສີມຂະຫຍາຍທັກສະດ້ານດີຈີຕອນ ແລະ ຂະຫຍາຍເຄືອຂ່າຍຂອງເຂົາເຈົ້າ ລື່ນກາຍຂອບເຂດລະດັບຊາດ. ທ່ານ ກິດສະໄຊ ສົມສະໝານ ຜູ້ອຳນວຍການສູນພູມມິພາ ວ່າດ້ວຍສະແຕມສຶກສາຂອງ SEAMEO (ສະເຕມສຶກສາ: STEM Education ຊຶ່ງແມ່ນການສຶກສາທີ່ບໍາລຸງກໍ່ສ້າງຄວາມຮູ້ໃນ 4 ສາຂາວິຊາຄື:  ວິທະຍາສາດ ທໍາມະຊາດ, ເຕັກໂນໂລຊີ, ວິສະວະກຳສາດ, ຄະນິດສາດ) ໄດ້ກ່າວຍໍ້າເຖິງຄວາມເລັ່ງດ່ວນຂອງການຝຶກຝົນຜູ້ມີຄວາມສາມາດດ້ານດີຈີຕອນວ່າ: ໃນສະພາບແວດລ້ອມທີ່ດີຈີຕອນ ມີການພັດທະນາຢ່າງວ່ອງໄວ, ການຝຶກຝົນຄວາມສາມາດດ້ານດີຈີຕອນ ມີຄວາມສຳຄັນຫຼາຍຂຶ້ນກວ່າແຕ່ກ່ອນ ຊຶ່ງເປັນຂໍກະແຈສຳຄັນໃນການສົ່ງເສີມການເຕີບໂຕ ແລະ ການປັບຕົວ ທັງມີອິດທິພົນຕໍ່ການປະຕິວັດອຸດສາຫະກຳ, ສັງຄົມ ແລະ ເສດຖະກິດ. ໂຄງການ “ແກ່ນພັນ ແຫ່ງອານາຄົດ” ຈຸດໃຈກາງຂອງໂຄງການ ໄດ້ຮັບການອອກແບບມາເພື່ອສ້າງແຮງບັນດານໃຈ ແລະ ອົບຮົມສັ່ງສອນຜູ້ນໍາຮຸ່ນຕໍ່ໄປ.
    ພ້ອມນີ້, ຫົວເຫວີຍ ແລະ ITU ໄດ້ປະກາດຖະແຫຼງການຮ່ວມ ໂດຍເນັ້ນ 6 ປະເດັນສຳຄັນຂອງການຮ່ວມມືທາງດີຈີຕອນ ໃນທົ່ວອາຊີປາຊີຟິກ ລວມເຖິງນະໂຍບາຍດ້ານໄອຊີທີ ແລະ ລະບຽບຂໍ້ບັງຄັບຕ່າງໆ, ການວິໄຈຮ່ວມກັນ, ວາງໂຄງຮ່າງພື້ນຖານຮ່ວມກັນ, ສ້າງຄວາມສາມາດດ້ານດີຈີຕອນ, ສ້າງຄວາມເຂັ້ມແຂງຂອງເດັກຍິງ ແລະ ໄວໜຸ່ມ, ການແບ່ງປັນການປະຕິບັດຕົວຈິງດ້ານດີຈີຕອນ. ໃນວາລະປິດທ້າຍ, ກໍໄດ້ມີເວທີເສວະນາ ນໍາໂດຍ ທ່ານ ປິຕິ ສີແສງນາມ ກຳມະການບໍລິຫານມູນນິທິອາຊຽນ; ຮ່ວມເວທີເສວະນາມີຜູ້ຊ່ຽວຊານຈາກ ມະຫາວິທະຍາໄລແຫ່ງຊາດ ສິງກະໂປ, ຕົວແທນຈາກຫົວເຫວີຍ ແລະ ຜູ້ເຂົ້າຮ່ວມ “ແກ່ນພັນ ແຫ່ງອານາຄົດ” ຊຶ່ງໄດ້ມີອະພິປາຍເຈາະເລິກເຂົ້າໄປໃນຄວາມຊັບຊ້ອນຂອງການສ້າງຜູ້ນໍາແຫ່ງອານາຄົດ ດ້ວຍການປິດຊ່ອງວ່າງ, ໝູນໃຊ້ທັກສະດ້ານດີຈີຕອນ ແລະ ບໍາລຸງສ້າງທັກສະໄປຕະຫຼອດຊີວິດ.
    ກ່ອນກອງປະຊຸມສຸດຍອດນີ້, ນັກສຶກສາ 91 ຄົນ ໄດ້ໄປທັດສະນະສຶກສາທີ່ວິທະຍາເຂດຂອງຫົວເຫວີຍ ໃນ ເຊີນເຈິ້ນ ແລະ ຕົງກວນ ປະເທດຈີນ ຊຶ່ງເປັນສ່ວນເສີມຂະຫຍາຍປະສົບການອັນໜ້າຈົດຈໍາຂອງເຂົາເຈົ້າ. ໃນບ່ອນນັ້ນ, ເຂົາເຈົ້າໄດ້ຮັບຂໍ້ມູນທີ່ເປັນເອກະລັກໃນດ້ານຕ່າງໆ ເປັນຕົ້ນ ດ້ານທິດສະດີ, ພະລັງງານດີຈີຕອນ, ເຕັກໂນໂລຊີລົດຍົນ ແລະ ຄວາມປອດໄພທາງໄຊເບີ.